Ads by Google Ads by Google

Silia 200 nofoa fa’atavale mai Amerika mo AS

E silia i le 200 nofoa fa’ata’avale o lo o faamoemoe e taunuu mai i le teritori i le aso 25 o le masina nei, o se foa’i mai a le Faalapotopotoga a le AWM (America Wheelchair Mission) mo nisi o le atunuu o lo o i ai le manaoga, mo le faaaogaina o lea  tautua e fesoasoani ai i manaoga o le soifuaga o lo o ola ma soifua ai.

O le vaiaso atoa lenei na amata tufatufa atu ai e sui o le AWM nei i tagata matutua, atoa ai ma i latou e i ai manaoga faapitoa o le tino e manaomia ai lo latou faaaogaina o nofoa nei, ma faai’u ai i se sauniga faapitoa na faataunuuina i le taeao ananafi, i le nofoaga autu o loo i ai le Ofisa o le YWCA i Tafuna, mo le tufatufaina atu ai o isi nofoa e 10.

O lenei sauniga sa molimauina e le mamalu lautele o le atunuu, o taitai o le malo atoa ai ma sui o le AWM na malaga mai mo le faaooina mai lea o lenei foa’i.

O le masina o Aperila 2010 na  ulua’i malaga mai ai sui o le AWM mo le tuuina mai o lenei foa’i ma le faamoemoe, o le a faaauau pea ona malaga mai i Amerika Samoa i le lumanai mo le ofoina mai o le latou fesoasoani, e le gata ia Amerika Samoa, ae o loo aofia ai isi atunuu o le lalolagi o loo oo atu i ai la latou fesoasoani.

O le Peresetene o le AWM ia Chris Lewis ma se tasi o totino o le komiti faafoe a le Faalapotopotoga ia Dan Danielson, o ia lea ma lona aiga o loo tutu malosi i le faatupeina o lenei fesoasoani mo Amerika Samoa.

Na taua e Lewis i lana saunoaga e faapea, e 240 nofoa o lo o faamoemoe e taunuu mai i le faaiuga o le masina lenei i Amerika Samoa, ina ia mafai ai ona fesoasoani ia i latou uma o loo manaomia lenei fesoasoani.

Sa ia taua lona fiafia tele e faaauau lenei fesoasoani mo Amerika Samoa, ma ua faamoemoe o le a faaauau pea i le lumana’i lenei fesosaoani.

O le afioga i le alii faipule ia Galumalemana Bill Satele na fai ma fofoga o le malo e faaoo atu ai le agaga faafetai i le AWM e tusa ai o lenei foa’i. Saunoa Galumalemana, o fesoasoani faapenei e maua fua e aunoa ma se totogi, o loo atagia mai ai le faataunuuina lea e nisi o uso a tagata o fetalaiga a le Faaola, ina ia alofa atu i soo se tasi.

Sa maua foi le avanoa o le afioga i le alii faipule ia Faleomavaega Eni Hunkin e faaleo ai le agaga faafetai i sui o le AWM ona o le fesoasoani ua mafai ona maua e tama ma tina matutua o le atunuu, atoa ai ma i latou uma o loo i ai manaoga faapitoa o le tino.

Ua mafua ona maua lenei fesoasoani, ona o se tautua sa ofoina atu e le Faalapotopotoga a le YWCA, e pei ona galulue soosoo tauau ai ma le Ofisa o le TAOA atoa ai ma le Ofisa e puipuia aia tatau o i latou e i ai manaoga faapitoa o le tino.

O se tasi o tama sa faamanuiaina o ia i se nofoa o le susuga ia Mose Fuimaono. Ina ua fesiligia e le Samoa News, sa ia faailoa ai lona agaga faafetai ona o le feoa’i ua mafai ona maua, e fesoasoani ai ia te ia ma lona gasegase.

O se tasi na faamanuiaina i lenei foa’i o se tamaitai aoga e 18 tausaga, o ia lea o Fausaga Taufete’e, lea foi ua ia maua le nofoa e alu ai i lana aoga.