I le ripoti a le Teutupe a le Fono sa tuuina atu i luma o le Fono i le aso Faraile na te’a nei, e otooto atu ai le tulaga o le paketi a le malo mo le tausaga tupe fou 2013, o loo taua ai le silia i le $2 miliona tupe o loo aitalafu ai pisinisi, nuu ma tagata taitoatasi i le malo e le o totogiina.

Na taua e le susuga Talaolemotu Mauga i lana tusi e faapea, i suesuega sa faia e lona ofisa, na mafai ai ona maua le tusa ma le $2,083,482.93 o loo aitalafu ai pisinisi tua i le malo, ma e lata i le 200 le aofai o pisinisi o loo taua i le lisi sa tuuina atu i taitai ma sui o le Fono.

O nisi o nei aitalafu e amata atu lava i le $5.00 e oo atu i le $400,000.00

E tasi le pisinisi e $452,000.00 lana aitalafu i le malo o loo i ai, ona sosoo ai lea ma pisinisi e 5 e i le va o le $130,000 ma le $150,000 a latou aitalafu, ma pisinisi e fa e i le va o le tai $80,000 i le $92,000 a latou aitalafu.

Na taua e Mauga i lana tusi i sui o le Fono, o tupe nei e tatau ona aofia ai i totonu o le tupe faasoasoa a le malo, aua o tupe e mafai ona maua mai ma fesoasoani ai i le tamaoaiga o le atunuu, aemaise ai lava le tulaga manaomia o le itu tau tupe e le malo i le taimi nei, e faatupe ai nisi o manaoga e pei o le auina atu lea o gasegase i fafo mo togafitiga, faapea ai ma le faatupeina lea o femalagaaiga mo Manu’a.

E pei ona manino i le paketi a le Falemai o le LBJ lea ua i luma nei o le Fono i le taimi nei, e le o faatulaga mai ai se tupe e faatupe ai le auina atu o gasegase i fafo mo togafitiga mo le tausaga tupe fou 2013.

Na taua e nisi o faipule, o le a faatoa manino ma malamalama le fono i le mafuaaga o le leai o se tupe e ave ai gasegase i fafo, pe a fesiligia le paketi a le LBJ e le iloiloga tuu faatasi a le fono lea ua faamoemoe e amata i le aso 4 Setema.

Na taua e Mauga i lana fautuaga i taitai o le fono, e tatau ona matua fesiligia e le komiti o le paketi a maota e lua le Teutupe a le malo ia Magalei Logovii e uiga

O se tasi o vaega o loo fesiligia e Mauga i lana tusi i taitai o le fono, o alagatupe ua fuafua le malo e maua mai ai tupe lotoifale mo le paketi o le tausaga fou.

Mo se faataitaiga e pei ona taua e Mauga, e $7.1 miliona lea ua valoia mai e le malo o le a maualuga ai tupe mo lafoga totogi a tagata faigaluega mo le tausaga tupe 2013 nai lo le tausaga tupe tuai lenei 2012, ma o lea faaopoopoga o loo taua ai le siitia o lafoga maua mai tagata faigaluega, faapea ai ma le tupe e $6.8 miliona lea na maua mai e le malo i le ‘Tobacco Settlement’ ma le Ofisa o le Initeria.

Na talosagaina e Mauga sui o le fono ina ia fesoasoani atu i le auala o loo faaaoga e maua mai ai le lafoga o loo totogi e tagata faigaluega, ina ia mafai ai ona fesoasonai i ana faamaumauga o loo i ai.

I le tulaga ol e $6.8 miliona lea ua taua e le malo i lana paketi, o loo manino i lalo o le tulafono, o le tupe lea o loo faaigoaina, o le tupe mo le tausaga tupe 2012, ae o le fesili, “aisea na le tuuina mai ai i le Fono e faasoasoa atu ai e pei o ala o le tulafono,?” o le fesili lea a Mauga i taitai o le fono i lana tusi.

“Faamata o i ai lava le $6.8 miliona lea ua valoia mai e le malo i totonu o le faletupe mo le isi tausaga tupe fou,?” o le fesili lea a Mauga i sui o le fono.

I le otootoga o le paketi lea ua tauaaoina nei e sui o le fono, o loo taua ai alagatupe e 5 o loo faamoemoe e faatupe mai ai le paketi o le tausaga tupe fou.

I ia alagatupe, o loo taua ai le faaitiitia o tupe ua faamoemoe maua mai i le Ofisa o le Initeria (DOI Aid) i le aofai e $35,000, tusa lea o le 2%, ma tupe mo Galuega Tetele (CIP funds) i le aofai e $83,000, tusa lea o le 1%, mai tupe sa tuuina mai i le tausaga tupe lenei.

Ae mo isi alagatupe e tolu, o loo taua i le ripoti a Mauga le siitia o tupe ua faamoemoe e maua i le tausaga tupe fou, e pei o tupe lotoifale lea ua valoia le siitia i le $10.4 miliona, tusa ua 16% ua maualuga ai nai lo le tausaga tupe lenei, $8.8 miliona ua maualuga ai tupe fesoasoani mai le feterale, ma alagatupe mai le ‘Enterprise fund’ i le aofaiga e $95.1 miliona.

O kopi o lea tusi sa tuuina atu lea i taitai o maota e lua, faapea ai ma taitaifono o komiti o le paketi a le Senate ma le Maota o Sui, le afioga i le alii Senatoa ia Lemanu Peleti Mauga ma Vailiuama Steve Leasiolagi.