Ads by Google Ads by Google

Silia $16,000 maua sailiga tupe mo le malaga i Guam

E silia i le $16,000 le tinoitupe na mafai ona foa’i e le atunu’u i le sailiga tupe sa fa’atautaia e le Ofisa o le Arts Council a le malo i le fa’aiuga o le vaiaso na te’a nei, e fesoasoani ai i le fa’atupeina o le au malaga a le Aoga Maualuga a Fa’asao/Marist lea ua fa’amoemoe e fai ma sui o Amerika Samoa, i Fa’aaliga lona 12 o Tu ma Aganu’u a le Pasefika e faia i Guam i le masina o Me 2016.

 

O le itula e 7:00 i le taeao o le aso To’ona’i na te’a nei na amata ai le sailiga tupe e pei ona fa’asalalau tu’usa’o i luga o le leitio a le 93KHJ ma le televise fa’asalalau a le malo, le KVZK-TV, ae mae’a i le itula e 1:00 i le aoauli.

 

I se fa’atalatalanoaga a le Samoa News ma le Fa’atonusili o le Ofisa o le Arts Council ia Uta Dr. Laloulu Tagoilelagi i le aso ananafi, na fa’amaonia mai ai e Uta e fa’apea, e silia i le $16,000 le tinoitupe sa mafai ona maua i le sailiga tupe, ae le aofia ai isi vaega tupe ua mae’a ona ofo atu e le atunu’u e le’i mae’a ona fa’amaopoopo.

 

Afai ae mae’a ona fa’amaopoopo uma le foa’i e pei ona fesoasoani mai ai le atunu’u, e silia i le $17,000 le tupe e tatau ona maua mai ai, e pei ona saunoa le afioga a Uta.

 

“E momoli atu le fa’afetai i le mamalu o le atunu’u i lo outou lagolago mai i lenei fa’amoemoe, ae pei ona silafia, o le vaega muamua lenei o le sailiga tupe mo Guam, ma le fa’amoemoe e i ai se isi taimi o i luma e toe faia ai fo’i se isi sailiga tupe,” o le saunoaga lea a Uta.

 

Saunoa atili Uta e fa’apea, sa i ai le fa’amoemoe e aapa le Ofisa i se isi sailiga tupe e pei o se Tauvaga Tapolo e faia pe a mae’a le sisgafu’a, peita’i i le vaavaai atu a le Ofisa, e foliga mai e pito sili atu ona faigofie le auala saili tupe lenei o le Leitiofoni nai lo se isi lava auala

 

O le faigamalaga e pei ona saunoa Uta, e silia i le to’a 70 le aofa’i, o lo o va’ava’ai fo’i i se vaega tupe e tusa ma le $200,000 e fa’atupe atoa ai pasese ma mea uma mo le fa’amoemoe.

 

Saunoa atili Uta e fa’apea, o le tusi valaaulia sa maua mai i le malo o Guam, o lo o valaaulia mai ai le afioga i le Kovana Sili ia Lolo Matalasi Moliga e fai ma sui o le atunu’u, ua mae’a fo’i ona la feutana’i ma le kovana e uiga i lenei fa’amoemoe, ma ua ia fa’ailoa mai fo’i lona sauni e malaga mo le taliaina o le valaaulia, peita’i, o le lisi fa’ai’u mo le malaga fa’atoa fa’amautu pe a mae’a le fu’a, ina ne’i toe i ai ni isi suiga mai le afioga i le ali’i kovana.