Ads by Google Ads by Google

Silia $100k totoe Falelima i Sisifo mai le latou tupe e $1miliona

I se ripoti ua tauaaoina nei e le Samoa News e faatatau i le faaaogaina o le $1miliona sa tuuina atu i le Falelima i Sisifo, o lo o taua ai le paleni e $150,827 o lo o totoe i le teugatupe talu mai le aso 27 Fepuari 2013.

 

E pei ona silafia, sa tofu Falelima i Sisifo, Falelima i Sasa’e ma le Falelima i Manu’a ma le ta’i $1miliona na tuuina atu i ai e le faigamalo a Togiola ma Faoa, mo le faamoemoe e fausia ai ni isi o galuega o lo o moomia le fia faaleleia i totonu o afioaga o le itumalo.

 

E ta’i $100,000 na aveese mai e le malo mai ta’i $1miliona a Falelima ta’itasi e faatupe ai le Ofisa sa gafa ma le vaaia atoa ai ma le faasoasoaina o lenei vaega tupe.

 

I totonu o le ripoti o lo o taua ai le lisi o pisinisi, kamupani e oo lava fo’i tagata ta’ito’atasi sa tuuina atu i ai vaega o lenei tupe.

 

E le o taua mai ai i le ripoti mafuaaga o le totogi atu o tupe i pisinisi, kamupani ma tagata taitoatasi, sei vagana ai lava le aofa’i o le tupe

 

ma le aso na totogi atu ai le tupe.

 

O le afioga i le Fofoga Fetalai o le maota o sui ia Savali Talavou Ale, o lo o taua i le ripoti e faapea, o ia le tagata taitoatasi pito tele le tupe sa tuuina atu i ai i le aso 23 Me, 2012 i le aofaiga e $50,000, sosoo ai ma Liua P. Taifane i le aofaiga e $40,000 sa tuuina atu i ai i le aso 28 Tesema 2012.

 

O le aso 27 Iulai 2009 o lo o taua i le ripoti na amata totogi atu ai vaega tupe mo le faaaogaina, ae o le aso 28 Tesema 2012 le aso mulimuli o lo o taua na totogi atu ai le vaega tupe faaiu.

 

O ni isi o kamupani o lo o taua i le ripoti sa totogi atu i ai tupe e aofia ai kamupani o lo o faatau ai mea faufale, ae o konekarate o lo o taua i le ripoti e aofia ai konekarate fau auala atoa ai ma konekarate o lo o sapalaia uta oneone mo galuega o auala.

 

Ae o ni isi o tagata taitoatasi o lo o taua o latou suafa i le ripoti sa faapea ona totogi atu i ai ni isi o vaega tupe, e aofia ai Satele G.T Satele i le aofa’i e $30,000 na tuuina atu i ai i le aso 21 Me, 2010, ae $20,000 na tuuina atu i ai i le aso 21 Me, 2012 e pei ona taua i le ripoti.

 

E 5 siaki o lo o taua i le ripoti sa tuuina atu i le afioga ia Magalei Logovii. E 3 siaki na tuuina atu i ai i le aso 28 Setema 2010, ma siaki e lua sa tuuina atu i ai i le aso 5 & 13 Oketopa 2010, i le aofaiga e silia i le $4,600.

 

O lo o taua foi i le ripoti e faapea, o Galu Satele ma Joyita Satele o le toalua lea mai le to’afa na mauaina le ulua’i siaki i le aso 23 Iulai 2009 i le aofai e ta’i $3,040, ma le siaki lona lua na toe tuuina atu ia Galu Satele i le aso 31 Me, 2012 i le aofa’iga e $5,000.

 

O le aso 17 Tesema 2010 o lo o taua i le ripoti na tuuina atu ai le siaki e $2,800 mo Leofili Poutoa, ae o le aso 22 Iulai 2011 na tuuina atu ai le siaki e $5,000 ia Iese Aasa. O le aso 31 Mati, 2012 na tuuina atu ai le siaki e $30,000 ia Lualemaga Faoa, ma le siaki lona lona e $20,000 na tuuina atu i le aso 1 Me, 2012, ae o Annilyn & Etelini Fuifui sa la mauaina le siaki e $1,813 i le 29 Fepuari, 2012.

 

O lo o taua foi i le ripoti le tuuina atu o le $25,000 i le pulega a alii ma faipule o le afioaga o Pago Pago i le aso 29 Ianuari, 2010.

 

O se tasi lenei o mataupu o lo o fesiligia pea e le fono i le taimi nei, o le auala na faasoasoa i ai tupe ta’i $1miliona a Falelima, ona o lo o i ai ni isi o afioaga o itumalo taitasi nei o lo o faasea i le leai o ni atina’e sa fausia i le tupe lenei i totonu o latou nuu.