E silia i le to’a 100 fanau aoga na lesitalaina o latou suafa i le polokalame a le Arts Council mo le tuuaga o aoga, lea na amata i le taeao ananafi i le nofoaga autu a le Ofisa i Fagatogo mo le umi e 4 vaiaso.

E amata atu i le ta’i 7 tausaga le matutua o fanau o lo o agava’a i le polokalame lenei, lea ua fa’amoemoe e fa’amuta i le aso 25 Iulai, 2014.

Na vaaia le lolofi atu o matua mo le lesitalaina o fanau, ina ia maua le avanoa e aoaoina ai i latou i matata eseese ao feagai ai ma le tuuaga o aoga.

Na taua e se sui o le Ofisa a le Arts Council i le Samoa News e fa’apea, o le polokalame lenei e faia lava i tausaga uma i le taimi e tuua ai aoga a le fanau, ina ia maua ai le avanoa e aoaoina ai fanau i isi foi matata eseese, e fesoasoani ai i lo latou olaga tupu tupu a’e i totonu o faleaoga ma aiga.

“O le taua o le polokalame lenei mo fanau aoga, o le a mafai ai ona latou aoaoina matata eseese e pei o le lalagaina o galuega taulima, tusi ata, siva ma le musika, e fesoasoani ai i le poto salalau o lo o aoaoina i totonu o faleaoga, ma o se fiafiaga i le Ofisa le to’atele o matua ua naunau e lesitala a latou fanau i lenei tausaga”, o le saunoaga lea a se sui o le Ofisa a le Arts Council.

E 6 vasega o lo o vaevaeina i ai le aoga, ma o ni isi o vasega nei o lo o fa’atinoina e ni isi o faiaoga o lo o galulue i aoga a le malo, lea ua maua le avanoa e fesoasoani ai i le polokalame i le tuua ai o aoga i lenei vaitaimi.

O vasega e ono o le a aoaoina ai fanau e a’o ai le lalagaina o galuega talima; aoga e a’o ai le ta kitara; aoga e a’o ai le siva Samoa; aoga e a’o ai le tusi ata ma le vaneina o fa’atagata i oga laau; ma le vasega e a’o ai isi vaega o le gagana faapea ai tu ma agaifanua.

O le lua ai lenei o tausaga o maitauina pea le su’i fefiloi o fanau aoga e lesitala o latou suafa i le polokalame, e le gata o fanau Samoa, ae fa’apea fo’i i fanau mai isi atunu’u e aofia ai Filipaina, Fiti ma tagata papalagi.

Na taua e le ali’i o Mark Williams i le Samoa News lona fiafia ina ua mafai ona lesitala lona atali’i i le polokalame lenei, e mafai ai ona fa’amasani o ia i le aoaoina o isi vaega o tu ma aganu’u a Samoa.

Na taua e Williams e fa’apea, o le tele o taimi e matamata ai lona afafine i siva ma gaioiga a isi tamaiti aoga Samoa e faia i totonu o le aoga o lo o aoga ai nei, e naunau lava lona loto e fia iloa siva Samoa, pe fa’atino fo’i isi gaioiga e popoto tamaiti Samoa e fa’atino.

“Ou te fa’amoemoe e tatau ona uma ane vaiaso nei e fa ua iloa e lo’u afafine lalaga galuega taulima a Samoa e pei o pulou, ‘ili po o se ato fo’i, a le o lena fo’i, e tatau ona uma ane le aoga ua iloa siva pe tautala fo’i i isi upu o le gagana”, o le saunoaga lea a Williams.

Na taua e ni isi o matua sa mafai ona fesiligia e le Samoa News, ua mafua ona latou filifilia le polokalame lenei, ina ia sui ai fo’i ni aoaoga e aoao e fanau mai aoaoga o lo o aoaoina ai latou i totonu o potu aoga.

Na taua e le isi tina e fa’apea, o le taua o le polokalame lenei a le Arts Council, o le a mafai ai ona toe a’ao’o fanau i tu ma agaifanua a Samoa e pei o le lalagaina o galuega taulima, aemaise ai o le toe fa’amasani i siva Samoa ma isi laga vaega o le aganu’u.

“Ou te mana’o ia uma atu le aoga lenei ua iloa e la’u tama lalaga le ‘ili, pulou po o le amata fo’i ona lalaga se papa laufala, o vaega ia o le aganu’u e to’atele fanau latou te le o iloa fa’atino”, o le saunoaga lea a Margret Faulafo o Satala e to’alua lana fanau ua lesitala i le polokalame.

Na taua e le ali’i o Tony Malaki, 9 tausaga o Fagatogo e fa’apea, o lona fa’anaunauga o lo o i ai, ia uma ane le aoga lenei ua lelei lana ta kitara ma le tusi ata.

“Ou te mana’o lava ia pei a’o o lo’u uncle e iloa ta kitara i totonu o le matou falesa, ou te mana’o fo’i ia avea a’u o se tagata e lelei le tusi ata, ou te fia tusia se ata manaia mo lo’u tina”, o le molimau lea a le ali’i o Malaki.

E ta’i 30 minute le umi e fa’atino ai le vasega ma fesuia’i fanau aoga, ina ia mafai ona maua uma e fanau aoga le avanoa e aoao ai latou i vasega e 6 ua vaevaeina i ai le polokalame.