Ads by Google Ads by Google

Silia to’a 10 taofia leoleo talu ona amata poloka o le Kerisimasi

E silia i le to’a 10 ua mafai ona taofia e Leoleo i le faaiuga o le vaiaso na te’a nei, talu ona amata mai le poloka a le Matagaluega mo aso fiafia o le Kerisimasi atoa ai ma le Tausaga Fou.

O i latou e toa 11 na taofia i le faaiuga o le vaiaso, o lo o tuuaia i solitulafono eseese e pei o le ave taavale ‘ona atoa ai ma le faatupu vevesi i nofoaga faitele, ma ua faamoemoe o le taeao nei o le a tutulai uma ai i latou i luma o le Faamasinoga Faaitumalo, mo le tuuina atu o a latou tali e tusa ai o tuuaiga ua faia faasaga ia te i latou.

E ese mai ia i latou e toa 11 ia na taofia i le faaiuga o le vaiaso, e toa 3 isi o lo o taofia pea i le toese i Tafuna i le taimi nei, ona o mataupu e aafia ai faiga mataga i tamaitai o lo o tuuaia ai i latou, ma ua faamoemoe o le taeao nei o le a faila ai e le malo moliaga faasaga ia i latou nei.

E pei ona silafia e le atunuu, o le aso Faraile na te’a nei, Tesema 21, 2012 na amata ai le poloka masani a le Matagaluega o Leoleo mo aso malolo o le Kerisimasi ma le Tausaga fou.

I se  pepa o faamatalaga na sainia e le afioga i le Komesina o Leoleo, tofa Tuaolo Manaia Fruean, o lo o taua ai e faapea, o le poloka o le Kerisimasi e amata mai i le aso 21 Tesema e oo atu i le aso 31 Tesema, ae o le poloka o le Tausaga fou e amata atu i le aso 1 Ianuari 2013, e oo atu i le aso 4 Ianuari, lea e aofia ai ma le taimi o le Faauuga o le Konvana Sili fou ma le Lutena Kovana fou.

E 3 sifi ua vaevaeina i ai le poloka a leoleo, ma o sifi uma ia e ta’i 8 itula o le a galulue ai ona faatoa faia lea o fesuiaiga.

E tusa ai o le poloaiga na tuuina mai i le alii Komesina, o le afioga i le Sui Komesina ia Leseiau Laumoli o le a faauluulu i ai le poloka atoa a leoleo mo le kerisimasi ma le tausaga fou,faatasi ai ma le lagolago a le alii Taitai Leoleo ia Vaimaga Maiava.

O le pule o le toese ia Lumanai Maifea, o le Pule o le Vaega a le Fuimu ia Cliff O’Brien ma le taitai o le Ofisa o Leoleo ia Manu’a ia Vasega, o i latou ia o le a gafa ma le vaavaaia o a latou tiute masani i le taimi o le polokalame faapitoa a le matagaluega.

I le Ofisa Tutotonu o Leoleo i Fagatogo, ua tofia i ai taitai e toatolu e faauluulu i ai sifi e tolu o le a tiute, ma o i latou ia e aofia ai Comdr. T. Sagapolutele mo le sifi o le taeao; Capt. T. Laolagi mo le sifi lona lua; a’o Lt. T Solaita mo le sifi lona tolu.

O le Ofisa Leoleo i Tafuna ua tofia i ai Comdr V. Sunia e taitai i le sifi o le taeao, a’o Capt. F. Fo’ifua e taitaia le sifi lona lua.

O le Ofisa o Leoleo i Fagaitua ua tofia i ai Comdr. L. Vaouli e taitaia le sifi muamua, a’o Capt. M. Tavai i le sifi lona lua, ma le Ofisa o Leoleo i Leone, ua tofia i ai Comdr. T. Letuli e taitaia le sifi muamua, a’o Capt. L. Togia e taitaia le sifi lona lua.

O le poloka mo le sailia o i latou e tagofia le ava malosi ma feoai i taavale ua tofia i ai Capt. J. Cendrowski na te taitaia, ae lagolago i ai Lt. S. Aiono, ae o le sailia o fanau o lo o tagofia le avamalosi ae le’i atoa le 21 tausaga le matutua, ua tofia i ai Capt. L. Togia na te taitaia le vaega lea ae lagolago i ai Lt. F. Malaefono.