Ads by Google Ads by Google

SIKAILI FA’A FARMER LE ALI’I TOSO TEINE

O le alii lea na sikaili pei o se fai faatoaga ma ia faamalosia ai se tama’ita’i i totonu o se togavao i Leone i le vaiaso na te’a nei, ua taofia nei i le toese i Tafuna ma ua molia e le malo i le  moliaga o le faatupu vevesi i nofoaga faitele, ma le faamoemoe o se taimi o le vaiaso fou e faila ai moliaga faaopoopo faasaga ia te ia.

 

O le alii ua tuuaia e le malo i lenei faalavelave, o ia lea o Viliami Lolohea, lea na tulai i luma o le faamasinoga faaitumalo i le vaiaso nei mo le taimi muamua, ma ua toe taofia nei i le toese e faatali ai le aso ua faamoemoe e toe valaau ai lana mataupu ma faila ai e le malo moliaga faaopoopo faasaga ia te ia.

 

O le mataupu lenei na tofu atu i le Ofisa o Leoleo, ina ua ta’u e le tamaitai na aafia gaioiga a le alii ua molia sa fai ia te ia.

 

Na faailoa e le tina o le tamaitai na aafia i leoleo e faapea, o le ula lea o Lolohea e tuaoi o latou fale i Leone, ma o ia na pisi e tau su’e solo lana tama i le aso lea, ae faafuase’i loa ona ia vaaia lana tama ua oso mai sa i totonu o le togavao, e le’i umi ae ona vaaia fo’i ma Lolohea o lo o oso mai fo’i i le itu lava foi lea e tasi o le togavao.

 

Na suesue e le tina lana tama e tusa ai o le faalavelave na tupu, ma faamatala ai loa e le tamaitai lea gaioiga uma sa faia e le ua molia ia te ia. O le taimi lava na iloa ai e le ua molia ua telefoni e le aiga le ofisa o leoleo, na sola ausulusulu ai loa e lafi.

 

Na fiu leoleo e sue le ua molia i le taimi na taunuu ai, ma manatu ai loa e taatia seia i ai se isi taimi, ma ina ua toe agai atu leoleo i le fale o lo o nofo ai le ua molia, sa maua atu i ai o ia ma taofia faapagota mai ai loa o ia e leoleo.

 

Ina ua fesiligia e leoleo le tamaitai na aafia e tusa ai o le mea sa tupu, sa ia taua ai e faapea, na faateia o ia ao savali atu i luga o le auala ina ua oso atu le ua molia ma toso o ia aga’i i le togavao, ma ia faamalosia ai loa o ia.

 

Na taumafai le tamaitai e una’i ese le ua molia peita’i sa le mafai ona o le malosi tele o le alii, na faaaoga e le ua molia ona lima e pupuni ai le gutu o le tamaitai na aafia, ina ia le mafai ai ona ee o ia i luga mo se fesoasoani.

 

Na musu le ua molia e fai sana faamatalaga i leoleo ina ua fesiligia o ia. Sa maitauina fo’i e leoleo sa ‘ona le ua molia i le taimi na o latou pu’eina mai ai o ia.

 

O lo o loka pea le alii faifaatoaga i le toese e faatali ai le aso e toe tulai ai i luma o le faamasinoga.