O le sola mai ai o le au kirikiti a le Manuula mai Vatia ma le siamupini o le ta’amilosaga o kirikiti faa Samoa lea sa fa’agasolo i le fa’amanatuina o le 50 tausaga o le fu’a a Samoa, e le gata ua o  latou faatuina ai se matati’a maualuga i Samoa, ae ua avea fo’i lea ma auala ua latou faatula’i ai se lu’i ia Samoa, ina ia o latou sauni mo le toe lu’iina o le siamupini i le isi sisiga fu’a o loo soso’o nei.

O le talita tele lava na tapena e le malo o Samoa mo le taamilosga faatasi ai ma le faailoga tupe e (ST)$20,000, ua malaga mai ma le afioaga o Vatia, lea na tauaao atu i ai i le taimi na tufatufaina ai faailoga, a’o lumana’i le tuuina ifo i lalo o le tagavai a le atunuu i le po o le aso Lua na te’a nei (taimi Samoa), ae o le po lena o le aso Gafua i Amerika Samoa nei, lea fo’i sa to’atele le mamalu o le atunuu na o latou molimauina lenei sauniga i luga o le televise, tauala mai i le tautua a le TV3 mai Samoa lea na fai paaga ma le KVZKTV i Amerika Samoa nei.

E fa au kirikiti sa sailia le siamupini o le fu’a i Samoa lea e aofia ai le siamupini mai Savai’i, Upolu, Niu Sila ma le au a Vatia i Amerika Samoa nei.

Na taua e le tofa Nanai Afuola i le Samoa News e fa’apea, o Vatia na valaaulia fa’apitoa mai lava e le Komiti o le fu’a a Samoa, e fai ma sui o Amerika Samoa i le ta’amilosaga o le fu’a o lenei tausaga, o le pogai lena na malaga ai Vatia ae le malaga le au sa siamupini i le ta’amilosaga o le fu’a a le atunuu sa faia i le masina o Aperila na te’a nei, le au a Faleniu.

Sa fai faataamilosaga le sailiga siamupini i le taaloga kirikiti, ma su’e mai ai loa lea o au e lua pito i luga la te sailia le siamupini lea ua faamanuiaina ai le au a Vatia.

I le saunoaga faaiu o le fu’a mai le afioga i le alii Minisita o le Matagaluega o Tina ma Tamaitai, o ia foi lea o le taitaifono lagolago o le Komiti o le fu’a ia Tolofuavalelei Leiataua Falemoe, e fai ai o ia ma sui o le Ao o le Malo o Samoa ma ona tagata, sa ia faafetaia ai le au kirikiti mai Vatia ona o le latou finau ma le saili malo i le taamilosaga, lea ua mafua ai ona avea i latou ma siamupini o lenei tausaga.

“Ua iloa i le aso o loo olaola pea i Tutuila ma Manu’a se tasi o faagatama a le atunuu sa o taaalo ai o tatou tuaa mai aso ua mavae,” o le saunoaga lea a Tolofuavalelei.

Saunoa Tolofua i lana saunoaga, ua avea le manumalo a Vatia ma itu ua manatu ai le alii Palemia, o le a toe tapena au kirikiti a Samoa ina ia toe lu’i le siamupini ma toe faafo’i atu le talita ua umia e Vatia i Samoa ina ia mau ai i le tausaga fou.

“O le a matou taumafai pea lava ina ia faagasolo le taamilosaga lenei i tausaga uma, ina ia mautinoa e toe fo’i mai lava le talita ma le tulaga siamupini i Tumua ma Pule nei, lea ua se’e atu nei i laufanua o Tutuila ma Manu’a,” o le saunoaga lea a Tolofuavalelei na tali e ai le aofia, o ia foi lea na fai ma fofoga o le Ao o le malo, le alii Palemia ma tagata uma o Samoa, e faafetaia faapitoa ai malo valaaulia mai atunuu eseese na faatasi atu ona o lo latou sao i le faamatagofieina o le aso fanau o le atunuu.

Na taua e Tolofua e faapea, o le finagalo o le alii Palemia ia Tuilaepa Lupesoliai Malielegaoi, e le toe faia ni taamilosaga kirikiti faa Samoa i le taimi o le Teuila ia Setema o tausaga taitasi, ae o le a faataunuu ai le taamilosaga o kirikiti faaperetania, ona o se tasi lea o taaloga ua maitauina le aga’i atu ai o au a Samoa i luga, aemaise ai o se taaloga e mafai ona maua ai manuia mo alo o le atunuu e agai atu ai i fafo mo konekarate.

E ui e to’alaiti au taaalo a le atunuu na auina atu i Samoa mo lana sisiga fu’a, peitai o lea ua fo’i mai nisi o au taaalo ma le manumalo, e pei ona i ai le afioaga o Vatia i le taaloga kirikiti, faapea ai le au fusu lea ua sosola mai ma le Ipu a le Alii Palemia ina ua manumalo i le aufusu a Samoa.

E le’i mafai ona maua se tulaga i au volipolo faapea ai le au tenisi lea na auina atu, ae i ai le faamoemoe o le a maua se isi ripoti pe a taliu mai i fanua au malaga sa autova’a atu i Samoa.

O le vaiaso nei lea ua faamoemoe e amata gasolo mai ai afioaga sa malaga atu e tali i valaaulia a Samoa mo lana sisiga fu’a, e aofia ai le uluai malaga na taunuu mai i le afiafi ananafi a le Lady Naomi.