Ads by Google Ads by Google

Siamupini Samoa ina ua faiaina ai Niu Sila ta’ito’a 7 i Dubai

E le’i mafai e le aasa e le au ta’ito’a 7 a le Olopeleki a Niu Sila ona taofiofi le malosi ma le saua o le Manu Samoa, i le ta’amilosaga sa faia i Dubai i le faaiuga o le vaiaso na te’a nei, ina ua la’asia fa’a fa e Samoa le latou laina sikoa ma avea ai loa ma siamupini i ‘ai e 26-15.

O le ulua’i taimi lea ua manumalo ai Samoa i le taamilosaga lenei a le ‘Emirates Airline Dubai Rugby Sevens Cup’, o le vae lona lua lea o vae e 9 o le taamilosaga a le ‘HSBS Sevens World Series’ 2012/2013.

Na muamua faatoilalo e Samoa le au a Wales ma Falani ma maua ai lona avanoa i le sailiga o le siamupini ma Niu Sila, a’o Niu Sila sa ia faatoilaloina Portugal ma Kenya a’o le’i faiaina ia Samoa i le taaloga faaiu.

O se matati’a na faatu e Samoa i le la taaloga ma Niu Sila, ina ua laasia e Paul Perez le laina sikoa i sekone e 9 talu ona amata le taaloga, sosoo atu ai ma le isi sikoa mai ia Patrick Faapale, ma tula’i mai ai Samoa e 12-0 a Niu Sila.

E le’i faavaivai ai Niu Sila i lo latou finau mai mo sa latou ‘ai, ma laasia ai e le alii o Ben Lam le laina sikoa a Samoa ma maua ai ai e 5 mo Niu Sila, peitai na toe tali mai i ai Samoa e ala i le sikoa a le alii o Lio Lolo, ma tulai mai ‘ai Samoa 19-10 a Niu Sila i le afa muamua.

E lei umi ona amata le afa mulimuli o le taaloga ae vaaia loa le finau malosi mai o Niu Sila mo se isi a latou ‘ai faaopoopo, ma laasia ai e le alii o Kurt Baker le laina sikoa ma maua ai le isi 5 faaopoopo mo Niu Sila, ma tulai mai ‘ai Samoa 19-15 a Niu Sila.

Ina ua toe 4 minute o lo o totoe o le taaloga, sa faia ai loa le isi suiga mo le Manu Samoa, ina ua sui atu i totonu Tulolo Tulolo, Levi Asi Faamatala ma Robert Lilomaiava, ma vaaia ai loa finauga a Tulolo ma Tomasi Cama o Niu Sila i le polo, peitai na mataalia le alii o Tulolo ao ia kikiina le polo agai i le laina sikoa a Niu Sila, ma ia maua ai loa le sikoa lona fa o le taaloga, o le sikoa foi lea na faamautuina ai le manumalo a Samoa i Dubai.

“E lagona le mimita ona o le faaiuga o le taaloga i le aso (Aso Toona’i na te’a nei),” o le tala lea a le alii kapeteni o le au a Samoa ia Afa Aiono ina ua fesiligia e le au faasalalau.

 “E le gata i le mataina o le taaloga, ae ua taunuu foi le miti sa tulimata’i i ai la matou vaai, o le avea lea ma siamupini i Dubai nei, lea ua avea ai i matou ma siamupini i Dubai mo le taimi muamua,” o le isi lea tala a Aiono.

Na faailoa e Aiono i le au faasalalau e faapea, “e ui o Niu Sila o le au e sili atu lona malosi ma lelei nai lo Samoa, peitai na faaaoga e tama o le au o latou fatu e faatino mai ai le taaloga ma matou manumalo ai loa...”

E le’i taalo Aiono i le taaloga ma Niu Sila ina ua faasala e le Komiti a le IRB o ia mo taaloga e tolu e le taalo ai, ona o se gaioiga sa ia faia i se sui o le au a Falani, lea na ia faaaoga ai lona lima e tu’i ai lalo le ulu o le tasi o le au a Falani i le taaloga o le ‘semi-final’.

“O se lagona mimita ma ua ou fiafia lava i lenei aso,” o le tala lea a le faiaoga o le au taitoa 7 a Samoa o Tausa Faamaoni Lalomilo ina ua fesiligia e le au faasalalau.

“E to lo’u pulou i tama o le au ona o lenei taaloga mataina, ma ou te faamoemoe o le a tumau ai pea le lelei lea ao matou sauni atu i le taamilosaga o le vaiaso fou (vaiaso lenei).”

“Avea foi lenei malo e momoli atu ai o matou alofaaga i Samoa uma o lo o tapua’i mai i maota ma laoa, aemaise ai sui fou o le au lea ua filifilia e amata tapena ai le Manu Samoa mo le Olimipeka i Brazil i le 2016,” o le saunoaga lea a Tausa.

I le faaiuga o le taamilosaga i Dubai, ua faatulaga mai ai Niu Sila i le tulaga muamua i ‘ai e 38, sosoo ai Fiti, Kenya ma Samoa i le tulaga lua i ‘ai ta’i 32, o Falani i le tulaga 5 i ‘ai e 27 a’o Enelagi i le tulaga 6 i ‘ai e 24.

O le aso 8-9 o Tesema ua faatulaga mo le taamilosaga a le ‘Cell C Nelson Mandela Bay SA Sevens’ i Georgia i Aferika i Saute, ma ua faatulaga mai ai Samoa i le pool A faatasi ai ma Falani, Aferika i Saute ma Ausetalia.