Ads by Google Ads by Google

Siamupini Au volipolo a alii ma tamaitai mai AS taamilosaga sisigafu’a 2013

Na faaiu manuia le Taamilosaga Volipolo o le Sisigafu’a o lenei tausaga, lea na faatautaia e le Asosi Volipolo a Amerika Samoa (American Samoa Volleyball Association - ASVA) i le vaveao

 

 o le Aso Tofi na te’a nei, ina ua manumalo uma ‘au a alii ma tamaitai a Amerika Samoa i ni taaloga finau ma ‘au a alii ma tamaitai mai Samoa.

 

E 8 ‘au volipolo na malaga mai i Samoa e tausinio i lenei taamilosaga, na aofia ai ‘au e 4 a ali’i; 2 ‘au a tamaitai ma ‘au e 2 a faafafine.

 

I le vaega o Tama’ita’i, ua toe siamupini ai nei le ‘au volipolo a le Taumafai ina ua faiaina ai le ‘au volipolo a tamaitai mai le Aai o Fiti mai Samoa i se taaloga finau.  Ua faamanuiaina ai le ‘au a le Taumafai i le Ipu Siamupini ma le faailoga tupe e $1,000.  Ae maua e le Aai o Fiti ia le ipu ma le vaegatupe e $400.

 

O le tamaitai o Anastashia Manuia mai le ‘au a le Taumafai sa na maua le faailoga o le Tamaitai Taalo Lelei (MVP).

 

I le vaega o ali’i matutua na su’e siamupini ai le ‘au malosi a le 7-Play a Amerika Samoa ma le Laumua o Tumua mai Samoa.  Na manumalo ia le 7Play ma ua o latou sosola ai ma le Ipu .

 

I le vaega o Faafafine ‘Queen division’, ua sola ai nei le au a Faafafine mai Samoa, le “Star of Samoa” ma le siamupini o le 2013 ina ua faiaina ai le au a Faafafine mai Amerika Samoa nei, le ‘au a le “Le Eka” i se taaloga finau ma le mataina toe malie fo’i.  E le gata ina fo’i le Star of Samoa ma le Ipu ae faapea le vaegatupe e $600, ae ua nonofo le Le Eka ma le latou ipu o le tulaga lua ma le vaega tupe e $250.

 

O isi vaega mulimuli e lua o le taamilosaga o le Vaega o alii i lalo o le 13 tausaga le matutua, lea ua sola ai le au a le Taumafai ma le Ipu o le siamupini ma le faailoga tupe e $150, ina ua faiaina ai le All Sports lea ua o latou maua le ipu ma le faailoga tupe e $100.

 

Mo le vaega o alii i lalo o le 19 tausaga le matutua, ua toe sola ai nei le ‘au a le ‘Sideout’ ma le siamupini, ma ua atoa ai le lima tausaga o avea pea i latou ma siamupini i le vaega o alii.  E le gata ina o latou toe fo’i ma le Ipu ae faapea foi le faailoga tupe e $400.  O le tulaga lua na maua e le ‘au a le Annez faatasi ai ma se latou tupe e $250.  O le alii o Sam Luaiva na maua le faailoga o le Tama Taalo Lelei (MVP).

 

I le i’u manuia ai o le taamilosaga o lenei tausaga, na faafetaia ai e le faletua ia Valasi Gaisoa, o le Sui Peresetene ma le Faufautua a le ASVBA ‘au uma mai Samoa sa mafai ona masi’i mai e auai i le taamilosaga o lenei tausaga, ona o le maualuga ma le matagofie o la latou tamafaiga i soo se vaega na tausinio ai.

 

Na taua e Valasi e faapea, e ui i le tele o faafitauli ma se manatu ina ia aua nei faataunuuina lenei taamilosaga, peitai o lea lava ua i’u manuia i le lagolago mai a le Asosi Volipolo mai Samoa faapea ai ‘au mai Samoa.

 

O le taamilosaga lenei sa faaigoaina o le “Pacific Cup Volleyball Challenge”, lea fo’i na maua ai le avanoa e malaga mai ai sui o le Asosi Volipolo a Samoa e pei o le alii Peresetene ia Leu Fatu Faamausili, o ia fo’i lea o le Faiaoga o le ‘au volipolo a alii mai le Laumua o Tumua.

 

Na faafetaia e le Peresetene o le ASVA ia Savaliga Afu sui o le Asosi Volipolo a Samoa i lo latou lagolagoina o le faamoemoe o lenei tausaga.

 

O se tasi o tulaga mataina sa maitauina i lenei taamilosaga e pei ona saunoa Savaliga, o le lelei lea ona pulea e tama taaalo o latou amio ma tausisi i soo se tulafono o lo o faafoe ai le taamilosaga.

 

Na faafetaia e le peresetene o le Asosi volipolo a Samoa ia Leu le tulaga sa faatautaia ai e le ASVA lenei taamilosaga, e le gata o le lelei ona pulea ae sa maitauina foi le toatele o le atunuu na faaalia lo latou lagolagoina o lenei faamoemoe.

 

E silia i le to’a 300 le mamalu le atunuu i uo ma aiga na mafai ona lolofi atu e molimauina lenei taamilosaga, amata mai lava i le ulua’i aso seia oo atu i le aso faai’u.