Ads by Google Ads by Google

Si’itia le tulaga ua i ai le lakapi i Amerika Samoa

E ui e leai se ‘au mai kalapu lakapi i le atunuu na faamanuiaina i se faailoga i le taamilosaga lona lua a le TMP Marist Pago 7 i le vaiaso na te’a nei, peitai o le tulaga ua i ai le lakapi i Ameria Samoa e pei ona molimauina e ni isi o iloga o le taaloga lakapi e aofia ai ma alii laufali, e le gata ua siitia le tulaga ua i ai le faatinoina o le taaloga ae ua maitauina fo’i le lelei o lona atina’eina.

 

O molimau ia mai faiaoga o le Manu Samoa ta’ito’a 15 ma le 7, faatasi ai ma le alii laufali mai Niu Sila sa faauluulu i ai laufali na faatautaia taaloga o le taamilosaga mo aso e lua e pei ona tuana’i atu.

 

Na faaaoga e le Iuni Lakapi a Samoa (SRU) le taamilosaga taitoa 7 a Malisi e fili atu ai se au taitoa 7 a le atunuu mo taamilosaga e lua o lo o totoe a le ‘HSBC Seven World Series’ lea e faia i Sikotilani ma Enelagi i le amataga o le masina fou, o le pogai lea o le malaga mai o le susuga ia Steven Betham ma Tauasa Faamaoni Lalomilo.

 

Na taua e Betham i le Samoa News e faapea, e laiti lava ni nai vaega e moomia ona toe faaleleia i le atina’eina o le taaloga lakapi i Amerika Samoa.

 

“E moomia le lifi i luga o le maualuga e faatinoina ai le taaloga, ia lava le malosi o tama, lelei le fesootaiga i taimi e faia ai gaioiga a le ‘au i totonu o le malae, atoa ai ma le faaaogaina o le mafaufau o le tama taalo lava ia i taimi uma o le taaloga,”o le saunoaga lea a le susuga Betham lea o lo o avea nei ma faiaoga o le au taitoa 15 a le Manu Samoa, ae o ia foi lea na avea ma faiaoga o le au taitoa 7 a Samoa ina ua avea ma siamupini o taamilosaga taitoa 7 a le IRB i le 2009-2010.

 

Ina ua fesiligia Lalomilo i sona finagalo, sa ia taua ai e faapea, “pau lava le itu e tatau ona faaleleia, o le malosi ma le faaaogaina o le polo, ae o tulaga i le lakapi ma le malamalama i tulafono, ua lelei ma ua malamalama ai fo’i tama taaalo.”

 

Ua i ai le fuafuaga a Betham ma Lalomilo o se taimi o le vaiaso nei e faalauiloa ai le lisi o tama e koleni e saili mai ai le to’a 12 mo le au taitoa 7 a Samoa.

 

Na taua e le alii laufali mai Niu Sila ia Steve Pierson e faapea, ua sili atu le tulaga ua i ai le faatinoina e au mai Amerika Samoa nei o le taaloga lakapi nai lo le tausaga na te’a nei.

 

“O le tausaga na tea nei na tele faaletonu, faaletonu le puipui atoa ai ma le faatinoina o gaioiga i totonu o le taaloga, e leai fo’i se au na oo i le sailiina o faailoga e 4, peitai o le tausaga nei, e lua au ia ua oo i le sailiina o le siamupini, ma o le ata lena e faamaonia mai ai ua laalaa i luma le lakapi i Amerika Samoa,” o le saunoaga lea a Pierson.

 

O le au a le Laulii - Pago na pito maualuga lona tulaga mai kalapu lakapi uma i le atunuu i lenei tausaga, ina ua au i le sailiina o le siamupini o le ‘bowl’, ma faiaina ai i le au malosi a le Apia Maroon i ‘ai e 21-0, ae o Fagatogo Blues na au i le sailiga o le siapini o le talita, ma faiaina ai i ‘ai e 19-15.

 

Ina ua fesiligia le alii laufali poo a ni isi auala e moomia ona faaleleia e kalapu lakapi taitasi i le atunuu, sa ia taua e faapea, e tatau ona siitia le tomai e faatinoina ai le taaloga ma ia atoatoa le malosi.

 

“O se tasi o itu taua e tatau i tama taaalo i Amerika Samoa ona faaleleia, ia sauni le mafaufau i soo se taimi o le taaloga, afai e malosi le osofa’i mai a le isi ‘au, ia to’a lelei le mafaufau ma iloa le gaioiga e tatau ona fai,” o le isi lea fautuaga a Pierson, o se alii laufali mai Niu Sila ua silia i le 10 tausaga o avea ma laufali i taaloga taitoa 7.

 

Sa ia taua i le Samoa News e faapea, e vave atu ona atina’e ma lelei le taalo lakapi pe a koleni muamua i le taitoa 7, e le gata o se taaloga e televave ae toa laiti fo’i tagata e faatinoina le taaloga.

 

O ananafi na toe tuua ai e i latou nei le teritori ae toe fo’i atu i Samoa ma Niu Sila.