Si’itia le Auaunaga Ofisa Turisi Amerika Samoa

E tusa ai ma se fa’aaliga ma’oti mai le ali’i pule o le Ofisa o Turisi a le tatou Malo, [American Samoa Visitors Bureau] le susuga David Vaiafe, sa ia fa’aalia ai, “O le tausaga 2014, ua fa’aauau fo’i ona toe fa’ateleina Meli Tetele la’u pasese e afea le tatou atunu’u mo le aso e tasi ma toe tu’uva’a ese atu.”

 

O lana fa’aaliga lea, na ia fa’ailoa mai ona o se fa’afesili aua o le tausaga ua tuana’i e 14 meli la’u pasese sa latou afea i tatou ma ua iloga ai fo’i le aoga o lea tulaga, i le sailiga o le tamaoaiga tausi o pisinisi laiti e feso’ota’i a latou oloa ma fefaataua’iga ma nei pasese e faitau fia sefulu afe i le tausaga e tasi.

 

“O le masina o Ianuari e amata tatou talimalo ai i le ulua’i malaga a le tasi meli tele o le ‘Silver Whisper’ ma e ese mai lea meli e lua isi meli fa’ato’a afea fo’i i tatou i masina mulimuli mai o lenei lava tausaga. O se mea lelei lea, aua ua fa’ato’a iloa lea e nei fo’i kamupani tetele, e matagofie si o tatou atunu’u, e ao ina afea i a latou malaga tafafao.” O se tala lea a Vaiafe.

 

I le tausaga atoa 2014, e 18 malaga a Meli La’u Pasese e afea i tatou i Amerika Samoa. Mai lea aofa’iga e tolu malaga Meli tetele e fa’aigoaina o “Queen” ae fitu malaga a meli tetele e fa’aigoaina o “Princess.”

 

E tolu fo’i malaga a Meli tetele o lo’o ta’amilo i le lalolagi mo le 116 aso e afea i tatou,  ae lua Meli tetele e afea fa’alua i tatou i le tausaga e tasi. Ua fa’ailoa mai fo’i, o le to’aititi lava o pasese a meli ua fa’atulaga e afea i tatou o le 684 tagata o malaga mai ai, ae o le tele o pasese i le malaga e tasi ua fa’ailoa mai o le 4,270 tagata.

 

I le aotelega o pasese a nei malaga e 18 a meli la’u pasese e afea i tatou ua manino ai, e tusa i le 44,000  le pasese ma le auva’a.

 

Ua fa’ailoa mai o le a i ai fo’i le aso e tasi o le tausaga a sau, e lua meli e taula fa’atasi i le tatou uafu tele i Fagatogo, ma ua lapata’ia ai le mamalu o le atunu’u fa’apea le aufaipisinisi, ina ia fa’autagia mai, alolofa fa’ailoa laufofoga fiafia.

 

I le masina lava ia o Fepuari 2014, e ono lelei meli e afea ai i tatou, ma o se mea lelei tele lea tulaga, o le a tatou pisi i lea fo’i masina pu’upu’u o le tausaga.

Comment Here