Ads by Google Ads by Google

Si’i totogi sui sinia Ofisa o Leoleo i taimi o Haleck

O si’itaga i totogi o sui Sinia o le Matagaluega o Leoleo e pei ona i ai i le taimi nei, sa faia uma lea i le taimi a o avea William E. Haleck ma Komesina o Leoleo, ma, e le o manino mai i le taimi nei pe aloaia e le faigamalo a Lolo ma Lemanu ia si’itaga, e pei ona fa’amaonia mai e le Komesina fou ia Save Liuato A. Tuitele.

 

O sui sinia o lo o aofia i nei si’itaga e pei ona saunoa Save e aofia ai le sui komesina, Ta’ita’i Leoleo, fa’apea ai ‘Commanders’ uma o lo o galulue i le matagaluega.

 

Na fa’amalamalama e le afioga a Save i le Samoa News e fa’apea, ua mae’a ona tauaao e le ali’i kovana lana fuafuaga fa’ataoto mo le si’itia o totogi o leoleo, e pei ona fa’atonuina ai o ia e le afioga i le ali’i kovana ia Lolo Matalasi Moliga, ma o lo o ia fa’atali mo se tali.

 

O si’itaga i totogi o leoleo e pei ona saunoa le ali’i komesina, e aofia ai le sui mai le $10,000 e aga’i atu i le $15,000 i le tausaga.

 

Sa ia taua fo’i e fa’apea, o ni isi vaaiga sa ia maitauina i le taimi sa ia galue ai e tau fuafua si’itaga i totogi o leoleo, o leoleo ua tele tausaga o galulue i le matagaluega, ae o lo o maualuluga atu ai totogi o leoleo fou e le i leva ona galulue, ma o lo o silasila toto’a i ai le Matagaluega i le sailia o se vaega tupe e fa’atupe ai si’itaga i totogi o leoleo nei, ona e tatau ma talafeagai lea si’itaga mo i latou.

 

E talitonu le Samoa News, o leoleo uma lava o lo o umia le tulaga o le ‘Commanders’, ua latou mauaina nei le totogi e $48,000 i le tausaga, o le Sui Komesina i le aofa’i e $52,000, ma le Ta’ita’i Leoleo i le $50,000.

 

E fia fa’ailoa atu fo’i e le Samoa News e faapea, i le Paketi a le Matagaluega mo le Tausaga Tupe lenei 2015, o lo o i ai le ‘Commander’ e to’atasi e $42,000 lona totogi, a o le totogi o le Ta’ita’i Leoleo e $40,092 i le tausaga, ma, e le o manino lelei mai po o ai le ‘Commander’ lea e maualuga atu lona totogi nai lo le Ta’ita’i Leoleo.

 

I se saunoaga a le Faufautua fa’apitoa a le ali’i kovana ia Iulogologo Joseph Pereira i le Samoa News i le tausaga na te’a nei ina ua fesiligia o ia i lenei mataupu, sa ia taua ai le fa’agasolo o se fuafuaga mo le faia o si’itaga o leoleo, ona o le tulaga faigata o le latou galuega, atoa ai ma le lamatia ai o latou soifua.