E tasi lava le mafuaaga na ala ai ona le tuuina atu e le faamasinoga maualuga le tina talavou o Lega Oa e loka i le falepuipui i le amataga o le vaiaso, ona o lana pepe e 3 vaiaso lea faatoa fanau mai, peitai, e le avea lana pepe e taofia ai le loka o ia mo le 28 masina, pe afai na te le tuuina atu i luma o le faamasinoga se auala na te toe totogia ai le tupe a le kamupani lea sa ia faaaogaina.

O le Aso Gafua na lau ai le faasalaga o lenei tina talavou i luma o le alii faamasino sili ia Lyle L. Richmond, ina ua tausala o ia i le solitulafono mamafa o lona ave faagaoi lea o se vaega tupe tele mai le kamupani a le Kooline Refrigerator sa galue muamua ai.

O le masina o Oketopa na amata taofia mai ai e leoleo ia Oa i le toese i Tafuna, ina ua faila e le malo moliaga faasaga ia te ia, peitai ina ua talia e le faamasinoga maualuga le maliliega na sainia e le ua molia ma le malo i le aso 12 Tesema 2012, na faia ai loa ma le poloaiga a le faamasinoga ina ia tatala le ua molia i tua mai le toese, e faatali ai le taimi o lona masina atoa ai ma le faatalitaliina o le aso e lau ai lana faasalaga.

Na tau le mafai ona tautala le ua molia i le taimi na faia ai lana faatoesega ona o le maligi o ona loimata, ao ia faailoa i le faamasinoga ma le malo o Amerika Samoa lona salamo e tusa ai o le solitulafono sa ia faia.

Sa ia faatoese foi i ona matua, o lona toalua ma le la fanau i le tauvalea ai o le aiga ona o ia, aemaise ai o lona faatoese i le kamupani sa galue ai i lona faaaoga faasolitulafono tupe sa tuuina atu na te vaavaaia.

Na faaiu lana faatoesega i lona talosagaina lea o le faamasinoga mo se isi avanoa mo ia, sei fo’i ai i lona aiga e tausi lana pepe e 3 vaiaso le matua, atoa ai ma si ana tama teine e 4 tausaga le matua, ona e pisi lona toalua i lana galuega.

E ui na talosaga le alii loia fautua ia Mike White i le faamasinoga e faanofovaavaaia le ua molia ona ua vaaia lona salamo moni e tusa ai o le solitulafono sa ia faia, aemaise ai o si ana fanau e leai se isi e tausia, peitai na finau le loia a le malo o Julie Pasquale ina ia faasala o ia i le falepuipui mo le 28 masina.

Na taua e Julie i le faamasinoga e faapea, afai ua faailoa e le ua molia lona salamo ma lona mafatia ona o lana fanau, sa tatau ona manatunatu i tulaga uma ia i le taimi sa ia faatinoina ai le solitulafono.

Fai mai Julie, e ova ma le $43,000 le tupe a le Kooline Refrigerator na faaaoga faasolitulafono e le ua molia, e ala i lona sainia o siaki e 54 a le kamupani ma ave ua tala.

E talitonu le loia a le malo, o Oa o se tina talavou e atamai toe lelei lona aoaoina, peitai o le gaioiga sa ia faia ua atagia mai ai le matuia o le solitulafono sa ia faia. Na faaiu le faafinauga a Julie i lona talosagaina lea o le faamasinoga ina ia poloa’i Oa e toe totogi uma le tupe a le kamupani sa ia faaaoga faasolitulafono.

E silia i le 20 minute o malolo le faamasinoga a’o alo atu alii faamasino e toatolu mo le iloiloina o sa latou faaiuga, ma ina ua maea ona iloilo e alii faamasino la latou faaiuga, sa saunoa ai loa le alii faamasino sili ia Richmond mo le tuuina mai o le faaiuga, ae saunoa le alii faamasino lagolago ia Mamea Sala Jr i le tuuina atu lea o fautuaga mo le ua molia.

E 7 tausaga na manatu le faamasinoga e faasala ai Oa i le falepuipui, peitai ua faamalumalu lona tuliina o lea faasalaga, ae ua nofovaavaaia o ia mo le 5 tausaga i lalo o poloaiga a le faamasinoga.

O ni isi o ia poloaiga e aofia ai le loka mo’i o ia i le falepuipui mo le 28 masina, totogi le salatupe e $2,000, atoa ai ma lona toe totogiina o le tupe a le kamupani e $43,058.04.

Ua manatu le faamasinoga o le a taofi le tuliina e Oa o masina e 28 i le toese, ona e leai se isi e tausia lana pepe lea faatoa fanau mai, peitai e 30 aso lea ua tuu atu e le faamasinoga ia te ia, e mafaufau ma saili ai se auala na te totogiina ai le lana salatupe atoa ai ma le tupe e toe totogi i le kamupani, ona ia faailoa lea i luma o le faamasinoga o lana fuafuaga pe afai ae toe valaau lana mataupu i le aso 25 Mati 2013.

Na faailoa e le alii faamasino lagolago ia Mamea ia Oa e faapea, e le faigata i le faamasinoga ona tuuina atu o ia e loka i le falepuipui, peitai ua vaavaai alofa le faamasinoga i lana talosaga ona o lana pepe faatoa fanau mai, lea ua mafua ai ona tuu atu aso e 30 e alu ai e mafaufau i se auala na te toe totogiina ai lenei tupe.

“Oa, e le avea lau pepe lena ma auala e taofia ai le tuuina atu o oe e le faamasinoga i le falepuipui,” o le feau tuusa’o lea na tuu atu e Mamea ia Oa.

O afioga i alii faamasino lagolago ia Mamea ma Muasau Tasina Tofili na lagolagosua i le iloiloina o le faaiuga o lenei mataupu.