SEFE E LE TAMA LONA ATALI’I MAI LE FAA FALEPUIPUI MO LE 43 TAUSAGA

O loimata o le tama ma lana augani i le fa’amasinoga mo se isi avanoa mo si ona atali’i, o se tasi lea o itu na mafua ai ona manatu ali’i fa’amasino o le fa’amasinoga maualuga, o le a le tuuina atu le ali’i o Asofa Titio Jr i le toese mo se taimi umi, ae o le a nofovaavaaia o ia i lalo o poloaiga a le fa’amasinoga.

 

O le ali’i o Asofa Jr, 19 tausaga le matua, na ta’usala e le fa’amasinoga maualuga i le masina o Aokuso na te’a nei i moliaga mamafa e 5, ina ua talia e le fa’amasinoga se maliliega na sainia e le ua molia ma le malo.

 

O moliaga e 5 ua ta’usala ai Asofa Jr e aofia ai le moliaga o le talepe fale i le tulaga muamua, lea e mafai ona faasala ai o ia i le toese mai le 5 e o o atu i le 15 tausaga; lua moliaga o le gaoi e ta’i 7 tausaga e mafai ona fa’asala ai o ia i le toese; o le moliaga o le talepe fale i le tulaga lua ma le moliaga o lona taliaina o oloa sa ave faagaoi, e ta’i 7 tausaga e mafai ona faasala ai o ia i le falepuipui.

 

I le tu’u fa’atasiga o tausaga o nei fa’asalaga, e ono fa’asala o ia e le fa’amasinoga i le toese mo le umi e 43 tausaga.

 

E tolu mataupu eseese na molia ai Asofa Jr i luma o le fa’amasinoga, e lua mataupu na tula’i mai i le tausaga e 2012, ma le mataupu mulimuli na tula’i mai i le amataga o le tausaga nei.

 

A’o le’i tu’uina atu le fa’asalaga a le faamasinoga, na augani le ua molia i le faamasinoga mo se isi avanoa mo ia, ma ia taua ai lona salamo moni e tusa ai o lana solitulafono sa faia. Sa ia taua e faapea, o masina e 10 talu ona loka o ia i le falepuipui i Tafuna, ua ia aoaoina ai se lesona taua mo lona olaga i le lumana’i.

 

Na tau le mafai ona tautala le tama o le alii ua molia a’o taumafai e faaleo lana talosaga i luma o le fa’amasinoga, mo se avanoa se’i toe fo’i atu ai lona atali’i e saili sana galuega e fesoasoani ai ia te ia i le tausiga o le latou aiga.

 

Ae na taua e le loia a Asofa Jr ia Michael White e faapea, na amata mai lava a’o talavou lenei alii o molia i le tulafono, lea lava ua avea ma tagata matua o lo o fai pea lana amio lea, ma e foliga mai sa i ai lona manatu e le taitai maua o ia i ana mea valea sa faia.

 

Na finau White i le fa’amasinoga e faapea, na pau le auala e mafai ai ona maua se fesoasoani sili mo lenei alii talavou, o le tuu atu i ai e le fa’amasinoga o ni polokalame e toe a’oa’o ai lona mafaufau, pe tatala fo’i i tua e saili sana galuega pe afai e mae’a ona tuli sina fa’asalaga puupuu e faaopoopo i masina e 10 lea ua uma ona ia tuliina.

 

 E 11 tausaga na manatu ali’i fa’amasino e loka mo’i ai lava Asofa Jr i le toese i Tafuna, peitai o le a fa’amalumalu lona tuliina o lea fa’asalaga, ae o le a nofovaavaaia o ia mo le 5 tausaga i lalo o poloaiga a le fa’amasinoga.

 

O se tasi o poloaiga e aofia ai lona tuliina o masina e 20 i le toese i Tafuna, afai ae tatala o ia i tua, o le a auai i ni polokalame e fesoasoani ai i le faaleleia o lona olaga ma taofia mai ai o ia mai lona tagofia o le ava malosi ma fualaau faasaina.

 

Sa fautuaina e le alii faamasino sili lagolago ia Lyle L. Richmond ia Asofa Jr, afai e le usita’i i poloaiga ua tuuina atu ia te ia, o lona uiga o le nofosala i le toese mo se taimi umi.

Comment Here