Ads by Google Ads by Google

SCHUSTER: FEFEFE AU LAKAPI LALOLAGI IA AMERIKA SAMOA

E talitonu Lefau Tauiliili Harry Schuster, e ono fefefe mai foi isi atu lakapi o le lalolagi i se au e afua atu i Amerika Samoa, pe afai e vaavaai i le tulaga matautia lea o loo i ai le au a Samoa, le Manu Samoa i le taimi nei.

O upu faamalosi mai le Peresetene o le FORU, o ia foi lea o le sui o Samoa ma le Pasefika i totonu o le IRB, le afioga i le alii faipule ia Lefau Tauiliili Harry Schuster, na lagalaga ai finagalo ma lagona o faiaoga ma tama taaalo o kalapu lakapi eseese i le atunuu, ina ia aua nei manatu faatauvaa i le avea ai o Amerika Samoa ma totino o le IRB, aua o Amerika Samoa o se tasi lea o atunuu e lelei i soo se faaga tama e pei foi o Samoa.

O le saunoaga a Lefau na aiaiuli mai i tua i le saunoaga a le afioga i le Kovana Sili, o ia foi lea o le Peresetene o le Iuni Lakapi a le atunuu, i se fonotaga sa faia i le aso ananafi e toe faailoa ai nisi o tapenaga ua agai atu nei i ai le Iuni lakapi e faatino, aua le faataunuuina o lana miti lea ua vavala mai nisi o vaega.

Talu le taimi na talia ai e le IRB le talosaga a Amerika Samoa ina ia avea o ia ma totino tumau (full membership) i le ogatotonu o le masina na te’a nei, o lea faatoa faia se ulua’i fonotaga e aofia ai ma le sui o le IRB ia Lefau.

Na taua e Lefau lona agaga fiafia, mimita ma le faafetai ina ua talia e le IRB le talosaga a Amerika Samoa.

“Ua tumu au i le fiafia aemaise ai ua talia le talosaga a Amerika Samoa i le taimi tonu lava na pasia ai e le IRB lana tulafono, e faasa ai ona toe talia ni atunuu e lei tutoatasi e avea ma sui o le faalapotopotoga,” o le saunoaga lea a Lefau.

E ui i le tele o auala na vaavaai mai i ai le IRB ao iloilo le talosaga a Amerika Samoa, o se tasi o itu taua na taua e Lefau na taulai i ai le latou silasila, o le taulamua atu lea o le kovana sili a Amerika Samoa, o ia o le taitai i le unaia o lenei faamoemoe.

Na umi lana saunoaga e tau faamanino ai nisi o vaega o lenei aiaiga e pei ona tuuina mai e le IRB, peitai i le faaiuga sa ia faaloto tele ai i tama taaalo, faiaoga ma kalapu lakapi ina ia finau e faaleleia le taaloga ina ia ausia tulaga maualuluga.

“Atonu ua tuu fesili isi atunuu pe aisea ua lua ai au a Samoa i le IRB, aua o le latou manatu, o Samoa le isi atunuu e matautia i taaloga nei e aofia ai fusuaga ma lakapi, ma ou te iloa o le a faapena foi o latou manatu i le au a Amerika Samoa lea ua agai atu i luga, o lona uiga, e le o vaai maualalo mai atunuu ia Amerika Samoa, ae o loo fefefe mai,” o le saunoaga faamalosi lea a Lefau.

O lana fautuaga mulimuli i le Iuni a Amerika Samoa, ia aua nei avea le talia o le talosaga e le IRB ma itu e faatuutuu ai i le atinaeina o le taaloga, a ia finau e faailoa i le IRB e mafai e Amerika Samoa ona latou atinae ma faalelei le lakapi.

O lagona foi ia na momoli atu e le alii kovana i lana saunoaga faaiu e laei ai saunoaga o le fonotaga sa faia.

Fai mai Togiola, e le tatau ona manatu mama kalapu lakapi i le faatinoina o le taaloga i le taimi nei.

“Aua toe toe manatu faapea o le lakapi o se taaloga e faapasi ai le taimi i le faaiuga o le vaiaso, talu lava o le o mai e faaafu, a maea, ona outou o lea e fai tou BBQ, inu tou pia ona toe o mai foi lea i le isi vaiaso e toe faataunuu, ia fai o se taaloga e avea ai i tatou ma paga e sili ona fefefe mai ai isi au,” o le saunoaga faamalosi lea a le alii kovana.

“Tatou faailoa i isi au mai fafo e mafai foi e Amerika Samoa ona ausia tulaga maualuluga e pei ona latou ausia, tatou tatala le faitoto’a ina ia faalautele le taaloga lakapi, ma maua ai le avanoa mo isi tupulaga o loo mulimuli mai, aua nei avea i tatou ma tupulaga e fiafia e tatala le faitotoa ma toe tapuni, ae ia tatala pea ma faatumau ai, ina ia maua ai se ai mo isi tupulaga o loo mulimuli mai,” o le isi lea saunoaga faamalosi a le alii kovana.

Na toe faatepa e le alii kovana kalapu ma tama taaalo i le tulaga maualuga ua ausia e le Manu Samoa i le taitoa 7 ma le 15, ma o se auala foi na tau amata atu i lalo e pei foi ona taumafai atu i ai Amerika Samoa.

Saunoa Lefau, “Afai e i ai o outou loto e i ai le aso e laina tutusa ai le au a Amerika Samoa ma le Manu Samoa.”

O le afiafi nei i le itula e 4:00 o le a taaalo ai le Manu Samoa ma Iapani i le taamilosaga lona tolu o le Ipu a le Pasefika o loo faagasolo i Iapani i le taimi nei.

E pei ona silafia e le atunuu, o loo sili ai a le Manu Samoa i le faatulagaina o ai o au e fa o loo i ai i lenei taamilosaga, i le maea ai lea o ana malo e lua i ana taaloga e lua ua maea atu ia Tonga ma Fiti i le vaiaso na te’a nei.

O Samoa e 8 ana ai o loo i ai, sosoo ai Fiti ma Tonga e tai 5 ae o Iapani lea o loo avea ma Siamupini o le 2011 e 2 ina ua sosoo lava ana faiaina e lua ia Fiti ma Tonga.

O le tatou au o le a ta’aalo ma Iapani i le afiafi nei e aofia ai: 1. Sakaria Taulafo. 2. Tii Paulo. 3. Logovii Mulipola. 4. Faatiga Lemalu. 5. Joe Tekori. 6. Alafoti Faosiliva. 7. Maurie Faasavalu. 8. Kane Thompson. 9. Kahn Fotualii. 10. Ki Anufe. 12. Paul Williams. 13. Lolo Lui. 14. Paul Perez. 15. Faatoina Autagavaia. FA’ALEOLEO: Ole Avei, Census Johnson, Daniel Crichton, Benjamin Masoe, Jeremy Sua, Fautua Otto ma Ken Pisi.

Ia manuia le tapuaiga a le atunuu mo le toe taaloga a le Manu Samoa. GO MANU.