Na fa’ailoa e le Fofoga Fetalai o le maota o sui ia Savali Talavou Ale i le vaiaso nei, e le o i ai se fa’aletonu i teugatupe a le Litaea, ae o loo tulaga lelei ma malosi teugatupe o loo tua i ai tagata faigaluega a le malo i le lumana’i.

O le saunoaga a Savali, o sana tali atu lea i le mataupu sa fa’atula’i e le afioga i le ali’i faipule ia Puleleiite Li’amatua Tufele Jr. i luma o le maota i le vaiaso nei, po o i ai se fuafuaga a le Komiti o le Litaea e fofo ai le gasegase o loo tula’i mai i le Ofisa o le Litaea i le taimi nei.

Saunoa atili Puleleiite e fa’apea, o lona popolega o loo i ai, ina ne’i avea fa’afitauli o loo tutupu mai i le ofisa ma itu e a’afia ai teugatupe o loo fa’amoemoe i ai le lumana’i o tagata faigaluega a le malo.

Na matua talosagaina e Puleleiite le komiti o le litaea a le maota o sui, tauala atu i le Fofoga Fetalai, ina ia silasila toto’a i le fa’afitauli e pei ona tula’i mai i le ofisa o le litaea, na saunoa Savali e fa’apea, e leai se tulaga fa’aletonu o loo tula’i mai i teugatupe a le ofisa o le litaea.

“O lea fo’i sa tatou malaga i le fonotaga a le litaea i le tausaga nei i Hawaii, o loo manino fo’i i fa’amaumauga tulaga lelei ma le malosi o loo i ai teugatupe, pau le tulaga lea ou te tau fa’alogologo atu i ai, o fa’afitauli i tulaga o galuega fa’atino a le Ofisa lea o loo manatu ai le atunuu ma le Fono o loo i ai se fa’aletonu i le litaea, ae o se tulaga i le teugatupe, o loo lelei ma malu puipuia,” o le saunoaga lea a Savali na lagolagoina fo’i e le afioga i le ali’i faipule ia Vailoata Eteuati Amituana’i, o ia lea o le taitaifono o le komiti o le litaea a le maota o sui.

Saunoa Vailoata ananafi e fa’apea, ua mae’a ona faia suesuega ma fesootaiga a le komiti ma le ofisa o le litaea, ma ua fa’ailoa mai fo’i e le tama’ita’i o loo avea ma pulesili le tumau i le taimi nei, o loo tulaga lelei pea lava teugatupe a le litaea o loo i ai.

“Aua fo’i le fa’apopoleina fua le atunuu aemaise tagata faigaluega a le malo i tulaga o loo tula’i mai, o mataupu lava na e fitoitonu i le ofisa ma a latou galuega fa’atino, ae o tulaga i le teugatupe, o loo malu puipuia ma tulaga lelei e oo mai i le taimi nei,” o le sauoaga lea a Vailoata.

E to’atolu isi totino o le teugatupe o le litaea a le malo sa latou fa’ailoa i le Samoa News e faapea, e le tatau ona manatua mama afioga i faipule i le suesueina atili o lenei mataupu, aua o tupe o le litaea o loo faalagolago i ai le lumana’i o nai tagata faigaluega ua malolo litaea mai i a latou galuega.

Na taua e le isi totino o le teugatupe a le litaea e le’i finagalo e fa’ailoa lona suafa e fa’apea, afai o loo masalomia e le Komiti Fa’afoe le i ai o ni faiga le fa’amaoni i le fa’aaogaina o tupe a le litaea, o le mea moni lava la, o loo i ai le afaina i le teugatupe e tatau ona matua suesue ma auiliili ina ia manino ma malamalama i ai totino o le teugatupe.

E pei ona silafia, o le masina na te’a nei na fa’amalolo ai e le Komiti Fa’afoe o le Litaea le sa avea ma Pulesili o le Ofisa o le Litaea ia Luatua Filisouaiga Tafua ae maua pea lona totogi, e mafua mai i tu’uaiga o lona faia o ni fa’aiuga le sa’o e aofia ai le fa’aaogaina o tupe e totogi ai lona pasese faapea ai tupe sa totogi atu i se kamupani e leai se laisene pisinisi.

Ua talosagaina fo’i e le Komiti Faafoe le Komesina o Leoleo mo se suesuega, aemaise ai se Kamupani Su’etusi mai Amerika mo le sueina o fa’amaumauga tau tupe a le Litaea.