Na avaavau le afioga i le ali’i Senatoa ia Soliai T. Fuimaono i le taimi na ia fa’ailoa ai i le afioga i le tama’ita’i Faipule ia Vui Florence Saulo e soia le le mafaufau, i le taimi na fetalia’i ai Vui ma le afioga i le ali’i Senatoa ia Laolagi Fonoti Savali Vaeao, ina ua iloilo e le Komiti Soofaatasi a le Fono le paketi a le Matagaluega o Leoleo i le taeao ananafi.

O le vevesi na mafua mai ina ua pasia e le komiti soofaatasi le mau e fa’aagafua ai le afioga i le Komesina o Leoleo ma lona ofisa, ae se’i fa’aauau galuega a le komiti mo le iloiloina o paketi a isi Ofisa e tolu o lo o mulimuli mai tua, peita’i sa si’i pea le aao o Vui ma ia talosaga i le ta’ita’ifono mo se avanoa, ae na fa’ailoa i ai e Laolagi, e to’a 7 isi sui o le komiti o lo o si’i atu fo’i aao mo ni avanoa, ae faigata ona o lea ua pasia le mau e fa’agafua ai molimau.

E ui ua mae’a ona pasia le mau, ae na fa’ailoa e Vui ia Laolagi e fa’apea, “e taua le mataupu o lo o o’u naunau atu ai mo se avanoa lau afioga i le ta’ita’i komiti,” ae na tali fuaitau Laolagi e faapea, “Vui, se faamolemole ia, se’i tula’i ese molimau ona tu’u atu loa lea o le avanoa ia te oe, e le tatau ona tatou vevesi a o lea e iinei molimau fa’amolemole,” ae na toe tali Vui, “E le o se vevesi lea ou te fai atu ai, o lea e fia maua so’u avanoa.”

Ina ua tuua e le afioga i le ali’i komesina ia Save Liuato Tuitele ma lona ofisa le maota fono, na saunoa ai loa Laolagi i le komiti e fa’amalamalama le mafua’aga o le fa’aiuga, ina ia aloaia loa le mau ua leva ona fa’alua ma fa’atolu e le komiti atoa.

“Pei ona avatu se lagona, e to’a 7 suafa e le i o o i ai le fa’asologa, ae ua oo mai i le ta’ita’i komiti se lagona, ua tatau ona aloaia loa le mau ua leva ona pasia, aua afai e tu’u atu pea le avanoa, lona uiga e po le aso e le i mae’a tatou fesili i le Komesina, a o lea o lo o i ai isi a tatou Ofisa e le i o o i ai le fa’asologa a le tatou komiti, ma te le i faia fo’i le fa’aiuga ina ia aloaia le mau, ae na fai e le komiti atoa, o le mafua’aga lena e fa’amalulu atu ai i le komiti mamalu, ae o lo o i ai i le laulau le malosi e fa’afoe atu ai la tatou fonotaga,” o le saunoaga lea a Laolagi i le komiti, ona ia tuu atu lea o le avanoa ia Vui o lo o sii atu lona aao i le taimi lea.

E tau amata atu le saunoaga a Vui e fa’amatala le mafua’aga o lona naunau mo sona avanoa, ae oso fa’alava loa le afioga i le ali’i senatoa ia Soliai ma saunoa e fa’apea, “Vui! Vui! ku’u laia, ua kumu oe i le le mafaufau.”

Ae na tali fuaitau le afioga i le tama’ita’i faipule ia Vui e fa’apea, “E leai se lagona fa’apena o ia te a’u, o lea e fia fa’aali so’u lagona i le paketi ....,” ae na toe fa’auilavea Soliai ma saunoa e fa’apea, “Fa’akali, fa’akali, ku’u laia, ua kumu oe i lou le ‘ago’ago sei kulou le Fogo, ga amaka mai lava i le la vaiaso lou le mafaufau, vaai i le mamalu o le Fogo, ku’u, a fai aku loa e ku’u oga ku’u lea, kumu oe i le le mafaufau,” o le avaavau atu lea a Soliai na toe fa’auivalea mai ai loa le afioga a Laolagi ma ia talosaga i le komiti ina ia maua pea le onosa’i, a o le tama’ita’i faipule ia Vui, sa ia saunoa e fa’amalulu i le maota ma ia fa’ailoa i ai, “e le o i ai se lagona fa’apena o ia te a’u.”

O le mae’a ai o saunoaga a sui o le komiti, na faia ai loa e Laolagi le fa’aiuga ina ia fai se malologa a le komiti mo le 10 minute, ae sei saili atu le komiti i le Atua mo lona filemu.