Ads by Google Ads by Google

Sauniga Fa’apa’ia le Nofo

Afioga To’afiaoali’i Tupuola Laniselota Sopo’aga

Maota -  Maota o Apati,   Malaeti’a

tusia: Leua Aiono Frost

I le afiafi o le Aso Tofi Iulai 5, 2012 na fa’atasia ai aiga i ona itu tetele ma ona itu taulagi, ae maise le Ekalesia Fa’apotopotoga Kerisiano i Amerika Samoa i Fagasa lea na latou molimauina fa’atasi le auaunaga fo’i a le afioga le fa’anofonofo Tupuola Laniselota Sopo’aga ma le faletua o Suitupe Sopo’aga.

O le sauniga sa ta’ita’ina e le susuga le Fa’afeagaiga Taulagi a le Ekalesia Rev Uaiana Tanielu, ae tofu sao i ai le nofoa Fa’afeagaiga i le afio’aga i ona vaega ta’itasi. O pese ma vi’iga o le sauniga mamalu sa fofogaina e le aufaipese EFKAS i Fagasa lava, ae o le fa’apa’iaina o le nofo sa toto’o i ai a’ao o fa’afeagaiga taulagi i le afio’aga, susuga Rev. Filipo Tuigamala o le Ekalesia AOG, ma le susuga le Fesoasoani Pope Ezekiel, ae tatalo le Ta’ita’i o le sauniga.

Ina ua mae’a lea sa tu’uina le avanoa mo le lauga sa saunia lea e le susuga Rev. Filipo Tuigamala mo le Upu a le Atua e tima’ia ai le nofo, ma sa ia si’itia mai le mau Kenese 32: 25-30, lea na finau ai Iakopo mo se manuia o lona aiga fa’apea lona nu’u.

O le i’uga o lea finauga, sa ia fa’aigoaina ai lea eleele ia Penieli, “Na ou iloa ai le Atua, ua ma fesaga’i lava, ma ua ou sao mai ai!”

Peita’i o se i’uga sili, ona sa suia ai le igoa o Iakopo ia “Isaraelu” ona o le ola finau mo mea lelei, o lona aiga, ma lona nu’u.

O le a’oa’oga lelei i lenei tusi na faitauina mo le nofo, ua saunoa ai le Failauga, “Ua e le toe igoa ai ia Iakopo - o lona uiga “o le fa’asese” aua sa fa’asese e ia lona tama ma ia maua ai le tofi o lona uso. Peita’i ua fa’aigoaina nei oe ia Isaraelu, “Aua e pei o se ali’i, ua e finau i le ali’i ma le Atua.”

O le fa’ailo lea a le Failauga o le sauniga, e fa’afetaia ai le tautua matavela a le afioga le Fa’anofonofo ma le faletua i le afio’aga, ekalesia ma le aiga potopoto, ae ua fa’asili fo’i, aua ua au atu i le vasega o Fa’afeagaiga Taulagi uma i le afio’aga i so’o se mea!

“E le gata i lea, ae ua fa’ata’ita’i fo’i i ai le fanau, i so’o se taimi e asiasi mai ai i nu’u ma aiga, ua fa’asifo lava se meaalofa mo Fa’afeagaiga uma o le afio’aga atoa. Fa’afetai alofa!”

O toe fa’amanuiaga a le Failauga, sa ia tima’ia ai lana afioga le To’afiaoali’i, “Ia e faia measili mo le Atua i taimi uma, aua e te manumalo ai lava! Finau e pei o le finau sa finau ai Iakopo ma suia ai lona igoa, ona ua ia manumalo!”

Na toe fa’aopoopo se upu a le ta’ita’i o le sauniga, ma sa ia fa’apea ai, “Tupuola, ia e fa’amaoni i ala o le Atua!”

“Ua e pale i manuia, ina ia e auauna ai ma le fa’amaoni i mea uma i luma o lou Atua, ia avea fo’i oe ma se la’au mafala, e ofaga ai ma le saogalemu i ai ou tagata! Ia manuia le nofo!”

Ina ua mae’a le sauniga mamalu, sa fa’atasia aiga, nu’u ma le itumalo i maota o Apati i Malaeti’a, ae o le mamalu o le aufaigaluega a le Atua sa mautu atu i le Maota o le Galuega mo fa’aaloaloga masani a aiga, e talafeagai ma aso fa’aeaina fa’apenei o Aiga i ona itu tetele ma ona itu taulagi.