O le vaiaso nei lea ua faamoemoe e toe feiloai ai le afioga i le kovana sili o le malo ma taitai o le Fono Faitulafono, mo le tuu faatasia o ni a latou fautuaga e tusa ai o le fa’aiuga ua tu’uina mai e le Komiti Fa’afoe ma le Pulega a le falemai o le LBJ, i le fa’amamaluina o a latou si’itaga i pili i le po o le kerisimasi o lo o lumanai nei.O le feiloaiga i le vaiaso nei lea ua fa’amoemoe e tau’a’ao atu ai e ta’ita’i o le fono sa latou fautuaga ua mae’a ona ‘autasi i ai, ona tu’u fa’atasi foi lea ma se sa’iliga o le a tu’uina atu e le kovana ma le malo, ina ia mafai ai ona maua se fofo o le fa’afitauli tau tupe o lo o feagai ma le falemai, ma tau’a’ao atu ai loa fautuaga nei i se latou feiloaiga ma le Pulega a le Falemai i le vaiaso nei lava.Na faamaonia mai e le afioga i le matua ia Togiola Tulafono i luga o lana polokalama i le faaiuga o le vaiaso na tea nei, o le toatele o le atunu’u ua amata ona latou faitio i le malo, ona o le taumafai e taofiofi sili a le falemai ae le o mafai lava ona taofia siitaga a le ASPA, o nisi foi ua faitio i le leai o se faaiuga amiotonu a le malo e faia ina ia foia ai nei faafitauli ua tutupu mai.Saunoa le alii kovana, tusa lava pe oso i luga pili a le ASPA, e mafai lava ona alu le toeaina ma le olomatua e fa’atau mai lana fagu karasini ona fa’amumu ai lea o le moli fagu ina ia malamalama ai totonu o le fale, peitai afai e sii pili a le falemai i le $50, e leai lava se gaioiga a le atunuu e mafai ona faia i ai i le tulaga lea, sei vagana ai lava le nofonofo i le fale, ua leai se tupe e totogi ai le pili a le falemai.“O le eseesega lena o mataupu ia e lua, aua o tua atu o siitaga a le ASPA o le moli matagi ma le fagu karasini, ae o tua atu o siitaga a le falemai o le oti,” o le saunoaga lea a le alii kovana, ma ia fautuaina ai le atunuu o loo faitioina o ia ma le malo i lenei mataupu, ina ia aua foi nei matele na o le faitio, ae faitio ma avatu ni fautuaga e fesoasoani ai i le malo i le taumafaiga o lenei mataupu.“Taumafai e faitio atamai, afai ete faitio, fai ma aumai ai ma sau fautuaga, ae le na o le faitio aua o le upu a le tusi paia, e poto lava le tagata i ona mafaufauga ao le Atua na te silafia le loto o le tagata,” o le saunoaga lea a le alii kovana.O le aso Lulu na tea nei na feiloai ai le afioga i le kovana sili ma taitai o le Fono Faitulafono, i le soalaupuleina lea o se auala e mafai ona fesoasoani atu ai le malo i le manaoga tau tupe lea ua tulai mai i le falemai i Fagaalu.O lea fonotaga na aofia ai le alii kovana, le peresetene o le Senate ia Gaoteote Palaie Tofau, ma le sui fofoga fetalai ia Talia Faafetai Iaulualo, ina ua tauaao e taitai o le fono se tusi mai le alii kovana, lea sa faailoa atu i ai e Togiola sona finagalo e tusa ai o siitaga a le falemai lea ua faalauiloa mai.Na faailoa e Togiola i taitai o le fono, e ui na te lagolagoina le manaoga tau tupe e pei ona tulai mai i le falemai i le taimi nei, e i ai foi sona popolega ina nei avea siitaga o pili a le falemai ma itu e faavaivaia ai manatu o tagata e saili fofo i le falemai mo togafitiga.Na faafetaia e nisi o le atunuu le alii kovana e tusa ai o taumafaiga ina ia foia ai siitaga a le falemai, ae o nisi foi sa latou faailoa i ai, e leai lava se isi faatuatuaga o le atunuu i le taimi nei, ua na o le kovana lava ma taitai o le Fono Faitulafono, o i latou ia o le a maua mai ai se faamama avega o lenei mataupu.O siitaga a le falemai lea ua faamoemoe e faamamaluina i le po o le kerisimasi o loo lumanai nei, e aofia ai le sii mai i le $10 i le $50 pe afai e fia vaai le fomai i soo se fale talavai, atoa ai ma le sii atu i le $40 le tau o le fagu fualaau e tasi. O le potu failele lea ua sii atu i le $200, o le potu e taofia ai gasegase ua sii atu i le $100 i le po e tasi, ma le fale faamama toto ua sii atu i le $250.