Ads by Google Ads by Google

Sauni Swains e faaleo ona lagona e ala i lana siva ma le pese

 

“AMERIKA SAMOA, ALOFAGIA SE LEO O SWAINS I LAU FAIGAMALO”

 

E lata i le to’a 200 le aofa’i o tagata o le motu o Swains o le a fai ma sui o le motu, e faatinoina la latou sao e ala i le latou siva ma le pese i le faamanatuina ai o le 113 tausaga o le fu’a a Amerika Samoa i le aso Lulu o le vaiaso nei.

 

E tusa ai ma le polokalame o le fu’a ua tuuina mai e le komiti, o le au faafiafia mai Swains e tatalaina faafiafiaga i le aoauli, ma faasolo atu ai loa lea i Falelima e tolu ua lautogia mo faafiafiaga faa Samoa.

 

E aga malie taga o le siva ma le pese a Swains ua faamoemoe e faatinoina i le aso o le fu’a, ma o se avanoa lelei fo’i lea i le mamalu o le atunuu e maimoa ai i taga ma siva faa tokelau ua faaigoaina o le ‘fatele’ e pei ona saunoa le afioga i le alii faipule ia Su’a Alexander Eli Jennings, o ia fo’i lea o lo o taitaia maia le aufaafiafia a Swains.

 

FAAFETAI LOLO MO LE VALAAULIA

 

E tomua lava le pese a Swains i le viiga ma le faafetai i le Atua ona o lana tausiga ia Amerika Samoa, lea ua mafai ai ona aulia mai lenei aso taua, atoa ai ma viiviiga o laufanua o Amerika Samoa.

 

O lo o faafetaia foi e Swains le kovana sili ia Lolo Matalasi Moliga ma le faigamalo, ona o le avanoa ua mafai ona valaaulia ai i latou e fai so latou sao mo lenei faamoemoe.

 

Fai mai Swains, e ui o lea faatoa tula’i mai Lolo ma Lemanu i le taitaiga o le malo, peitai ua tele suiga ua vaaia i le taimi nei, ma o ni isi o nei suiga ua maitauina le manuia ai o le atunuu.

 

‘SO’U LEO I LAU FAIGAMALO AMERIKA SAMOA’

 

O se tasi o talosaga o lo o faaleo e Swains i totonu o lana pese, o sona leo i totonu o le faigamalo a Amerika Samoa, e pei o le palota lea i totonu o le maota o sui i soo se taimi e faatinoina ai galuega a le maota.

 

Na taua e Su’a e faapea, talu mai lava le amataga e oo mai i le taimi nei, e lagona le leo o Swains i taimi o galuega a komiti, ae a oo loa i le taimi e palota ai le maota i ana faaiuga, e leai se leo o Swains, ma o se tasi lea o mataupu ua tele tausaga o taumafai pea le afioga i le alii faipule ia Su’a e una’i, ona o lona naunau e tatau lava ona fai se leo o tagata Swains i totonu o le faigamalo a Amerika Samoa, e ala i le Fono Faitulafono.

 

MANATUA A’U I TAIMI O LE FAALELEIA O ATINA’E

 

O tulaga i le faaleleia o femalagaaiga mo Swains, o se tasi lea o vaega o lo o aofia i le latou faafiafiaga ua sauni e faatinoina. Fai mai Swains, o le galulolo na aafia ai le atunuu i le 2009, sa afatia ai ni isi o ona aiga i le motu o Swains, peitai e lei mafai ona fesootai i se telefoni poo ni leitio, e oo lava foi i se vaa sa le mafai ona alu i ai.

 

O le latou talosaga, ia manatua Swains i soo se taimi e faasoa ai le atinae o Amerika Samoa. O lo o toe faatepa foi i le latou pese le Feagaiga na osia ma le malo o Amerika i tausaga ua mavae, o lo o aofia ai Tutuila, Manu’a, Aunuu ma Swains i lea feagaiga.

 

O susuga a Bird Thompson o lo o gafa ma le a’oina o le siva a Swains ae o Jacklyn Soonafai o lo o gafa ma le a’oina o le latou pese faaleaganuu.