Ads by Google Ads by Google

Sauni SIC fesiligia le polokalama o le ‘1602’

Ua faamaonia mai e le taitaifono o le Komiti Suesue a le Senate (SIC) le sauni e fesiligia le polokalame o le ‘Section 1602’, lea o lo o tele i ai faasea a ni isi o le atunuu.

I se faatalatalanoaga a le Samoa News ma le afioga i le alii Senatoa ia Lualemaga Faoa sa ia taua ai e faapea, e tolu aso ua faamoemoe e faia ai iloiloga a le komiti mo le mataupu lenei, ina ia maua ai se malamalamaaga o le komiti e uiga i le polokalame lenei.

O le Aso Lua e oo i le Aso Tofi lea ua faatulaga e faia ai lea iloiloga, ma ua sauni foi le komiti e fesiligia molimau ua maea ona tuuina atu i ai tusi valaau, ina ia oo atu i luma o le komiti e tali nisi o fesili o le a fesiligia ai i latou.

O le mataupu e faatatau i le polokalama o le 1602 na alia’e mai ina ua lomia e le Samoa News se ripoti faataitai mai le Ofisa o lo o latou vaavaaia tupe mai le feterale sa faatupeina ai lenei polokalame, ma taua ai nisi o faaletonu i le polokalame.

O nisi o fesili o lo o fiamalamalama i ai le komiti po o ai tonu ituaiga tagata e agavaa i le polokalama, pe sa mulimulita’i le polokalame i aiaiga ma tulafono mo le faaaogaina o tupe, ae pe faamata ua maea ona fausia uma fale sa faatupe i lalo o le polokalama.

E tusa ma le $30 miliona le tupe na tuuina mai e le feterale ia Amerika Samoa e faatupe ai le polokalama lenei, ma tuuina atu ai loa i lalo o le faatautaiga a le Faletupe o Atina’e a Amerika Samoa latou te faagaioiina le polokalama.

O le masina na tea nei na faamalamalama ai e le sa avea ma peresetene o le Faletupe ina ua fesiligia e le komiti a le Senate tulaga uma e uiga i le polokalama.

Saunoa le tofa Lolo Moliga, o se tasi foi ua sauni e tauva mo le tofi kovana i le palota o lo o loma nei, e ui i le tele o tala o lo o tuuaia ai le polokalame, ae o lana molimau e leai se mea o faaletonu i le faatautaiina o le polokalama, aua sa mulimulita’i lava le Faletupe ma le Komiti Faafoe i tulafono e faaaoga ai tupe.

E le faatapulaaina poo ai e agavaa i le polokalame, pau le itu taua e pei ona saunoa Moliga, ia ausia manaoga uma e manaomia ina ia agavaa ai se tasi i totonu o le polokalame.

O le aso 31 Tesema o le tausaga nei o lo o valoia e faamuta ai le polokalame, ma manino ai loa galuega e lei maea ona fausia.

O ni isi o fale sa fausia i le polokalama o lo o vaaia le tutu e le’i mae’a, ae o isi o maota ua maea ma ua nofoia e tagata.

I se vaega o le ripoti muamua mai le Ofisa o le American Samoa Economic Stimulus and Recovery Office (ASESRO) lea na molia i le Samoa News i le masina na te’a nei, o lo o taua ai le le  mulimulita’i o le Faletupe i ni isi o aiaiga o le polokalame.