O le faatula’i o polokalame e fesoasoani ai i le toe tapu’eina o olaga o tupulaga talavou i totonu o le atunuu, aemaise ai o le faalauteleina o agavaa ma tomai o tina ma tamaitai i le atunuu, o ni isi ia o fatuaiga na fautuaina e afioga i faipule le Faatonusili tofia o le Matagaluega o Tupulaga Talavou, Tina ma Tamaitai ina ia ave i ai lana faamuamua, pe afai ae pasia e le Fono tofiga a le kovana mo ia.O le taeao ananafi na molimau ai i luma o le Komiti o le Faagaioiina o le Malo a le maotao sui le afioga a Pa’u Fuiavailiili Roy Taito Ausage, e tusa ai o le tofiaina o ia e le alii kovana e avea ma faatonusili o lea matagaluega taua a le malo.E pei ona masani ai maota e lua, o le aso lava e maea ai le iloiloina o soo se tofiga a le kovana, e tuuina atu ai loa i luma o le maota mo le palotaina, ae talu ai e lei toatele faipule na auai i le taimi o le iloiloga ananafi, na pasia ai e le komiti le mau ina ia taoto le pasiaina o tofiga a le kovana mo le afioga a Pa’u seia oo i le taeao nei.O le toatele o faipule na maua avanoa e saunoa ai i le taimi o le iloiloga, e leai ni a latou fesili na tuuina atu i le molimau, sei vagana ai viiviiga o le kovana ina ua tafa lona finagalo e tofia le afioga Pa’u e avea ma faatonusili o lenei matagaluega taua.Na fesiligia e le faipule mai Aunuu ia Talaimatai Elisara Su’a le afioga Pa’u, ina ia faamanino atil le tautua a le matagaluega lea e ofoina atu ai fale o sulufaiga mo i latou e manaomia le fesoasoani, ae na saunoa le molimau, o le tautua lea e le Matagaluega o lo o mafai ona maua ai le fesoasoani mo aiga ua afaina o latou maota ma laoa i ni faalavelave e pei o mu, ona agai atu lea i le fale lea o lo o Tafuna e faaigoaina o le Mapusaga o Sulufaiga, e faamautu i ai mo sina taimi ao tau toe faaleleia ai nofoaga ma aiga na faatamaia i ni faalavelave.O le maota o le Sulufaiga na amata fausia mai i le tausaga e 2011 ma faaulufale ai loa i le masina o Fepuari 2012 i lona nofoaga autu i Tafuna, ma o se tasi lenei o tautua o lo o faatupe mai e le feterale mo le ataunuu, lea o lo o i lalo o le faatautaiga a le matagaluega.Na fautuaina e le afioga i le alii faipule ia Vaetasi Tuumolimoli Saena Moliga le afioga Pa’u, ina ia silasila toto’a i ni isi o mafuaga e ala ai ona tulai mai faafitauli ma aafia ai tupulaga talavou i totonu o nuu, ma i’u ina latou tagofia ai le ava malosi ma le sikaleti.Saunoa Vaetasi e faapea, o le isi lea afi mumu ua maitauina i le tele o tupulaga i nuu ma afioaga, o le tagofia o le ava malosi ma le sikaleti, ma o lo o masalomia foi le i ai o pisinisi o lo o faataga ona o latou faatauina atu mea nei i fanau talavou.“I totonu lava ia o lo’u nuu, toeititi leai se tamaititi e le mafai ona ia le faatauia le ava malosi ma sikaleti mai faleoloa, ma o ni isi nei o faafitauli e ao i lona Ofisa ona silasila toto’a i ai,” o le fautuaga lea a le alii faipule mai Atuu.Ae na taua e le tamaitai faipule ia Vui Florence Saulo e faapea, i totonu o lona itumalo o Tualauta, e toatele naua tupulaga talavou o lo o manaomia polokalame a le matagaluega, e fesoasoani ai i o latou olaga faigata ua i ai.O le toatele o tupulaga i lona itumalo ua aafia i solitulafono eseese e aofia ai ma le talepefale, ma ua avea ai le falepuipui ma o latou nofoaga mau, e mafua mai lea tulaga ona o le toatele o tupulaga, e uma loa a latou aoaoga ona nonofo ai lava lea i aiga ua le mafai ona toe o atu i fafo e faaauau aoaoga ona o tulaga vaivai i le tamaoaiga ma le mafaufau, ae afai e i ai ni polokalame e fesoasoani ai i o latou olaga, o le a mafai ona suia tulaga le lelei o lo o i ai i latou i le lelei.Sa ia fautuaina foi le afioga Pa’u ina ia faaauau polokalame sa amata mai e le afioga i le Faatonusili tuai sa i ai, le tina ia Leiataua Lesa Leauga Turner, lea foi sa auai atu e lagolago i le iloiloga a le afioga a Pa’u i le taeao ananafi.Ina ua fesiligia e ni isi o faipule le afioga a Pa’u pe o i ai sana fuafuaga na te toe faaauauina le tele o polokalame na amata mai e le afioga a Leiataua, na tali le molimau, “ioe.”Sa ia taua foi e faapea, e ui e le o toe galue le tina ia Leiataua i totonu o le matagaluega i le taimi nei, peitai o lo o maua lava le avanoa e fesoasoani atu ai o ia i taimi e faatautaia ai polokalame sa ia amataina mai i tausaga ua mavae.