O le taeao nei lea ua faamoemoe e faataunuuina ai sauniga mo le faamanatuina o le fu’a i le motu o Manu’a, ma aloaia ai le Feagaiga sa sainia ma le Iunaite Setete o Amerika talu mai le 1904.

E le gata o le ulua’i fu’a lea mo le faigamalo fou a Lolo ma Lemanu, ae o se ulua’i taimi fo’i lea ua faasalalau tu’usa’o mai ai sauniga o le fu’a mai Manu’a, e ala i le tautua a le Fale Televise a le KVZK-TV, i lo la galulue fai paaga ai ma le Kamupani Telefoni a le malo (ASTCA).

O le vaiaso na te’a nei na tuuina aloaia mai ai se poloaiga mai le afioga i le kovana sili ia Lolo Matalasi Moliga, e faailoa mai ai le avea o le aso lenei,Iulai 16, 2013 ma aso malolo mo le malo atoa o Amerika Samoa, a’o faamanatuina ai e ta’ita’i ma tagata uma o Manu’a lona aso fiafia.

I se vaega o lana poloaiga, na taua ai e Lolo le tatau i tagata o Amerika Samoa ona tutu faatasi e lagolago le aso faapitoa o Manu’a, e ala i le faatinoga o gaioiga masani e pei o pese faaleaganuu, ae sili ai ia saunia loto ma agaga e talia le faamanatuina o lenei aso taua.

O le po o le Aso Sa na te’a nei na tuua ai e le vaa a le malo, le MV Sili ia Tutuila mo Manu’a, ma le momoli atu o le toatele o le atunuu faapea ai taitai o le malo o le a auai i le fu’a a Manu’a.  Ma ua tapunia galuega a le Fono Faitulafono mo aso e tolu, faatoa toe usuia i le Aso Tofi.

I le toa’i taunuu a le kovana sili ma le faigamalaga i Manu’a i le aso ananafi, na fa’asasa’o loa i Ofu ma Olosega/Sili mo le tatalaga aloaia o ni isi o ofisa a le malo o i ai.

O le afioaga i Ofu na talimalo i le aso ananafi i le faigamalaga a le malo, ma ina ua maea lea feiloaiga, sa tapena ai loa le malaga mo le toe fo’i atu i Faleasao i le MV Sili, e sauni ai mo le sisiina o le fu’a i le taeoa nei i le malae i Malaetele i Ta’u, Manu’a.

O faafiafiaga o le fu’a a Manu’a o le a faatinoina lava e le itumalo atoa, o le a mafai foi ona molimauina ai ma le tatala aloaiaina o ofisa uma a le malo i Faleasao, Ta’u ma Fitiuta, faapea ai ma le tatalaina o le ulua’i pamu kesi a le malo i Ta’u.

O le ofisa o le alii kovana o le a tatalaina i Ta’u, o iina fo’i o le a tuu faatasi ai ma ni isi o ofisa o le malo e pei o le Ofisa o Tupe, Ofisa o Tautua Lautele, faapea ai ma le Ofisa o Tagata Faigaluega a le malo.

Na faailoa e Lolo i le fonotaga a le kapeneta i le vaiaso na te’a nei, o le taimi lava e maea ai ona tatala ofisa a le malo i Manu’a, o le taimi fo’i lena e amata galulue ai loa tagata faigaluega mo le ofoina atu o le tautua mo le itumalo o Manu’a.

faaliliu Ausage Fausia