Ads by Google Ads by Google

Sauni malo faasala tagata faigaluega e le o usitaia le tulafono taavale malo

Talu ai o lo o faatupulaia pea le faafitauli i tagata faigaluega a le malo o lo o aafia i le soona faaaoga le tatau o taavale a le malo i taimi le tatau, ua manatau ai le kovana sili o le a faamalosia loa le vaega o le tulafono lea e faasala ai le tagata faigaluega e faamaonia lona soli o lea vaega o le tulafono.

 

I se tusi na tuuina atu e le afioga i le kovana sili ia Lolo Matalasi Moliga, i le Faatonusili o le Matagaluega o Tagata Faigaluega a le malo ia Le’i Sonny Thompson i le aso 6 Aokuso 2013, o lo o faamanino ai e le alii kovana le faaiuga ua tatau ona faia i tagata faigaluega latou te le o usitaia le tulafono i faasa ai le soona faaaoga le tatau o taavale a le malo.

 

Na taua e Lolo i lana tusi ia Le’i e faapea, ua maitauina le i ai pea lea o ni isi o tagata faigaluega a le malo e le o manatu mamafa, i le tulafono e faasa ai ona toe sona faaaoga le tatau taavale a le malo.

 

“Sa tatou tutu faatasi ina ia faamalosia auala uma e taofia ai le toe soona faaaoga le tatau o taavale a le malo, ae talu ai le amo e Faatonusili o le mamafa o le avega i taimi e ripotia mai ai ni taavale a le malo o lo o aafia i faalavelave ma soona faaaoga le tatau e tagata faigaluega, e foliga mai e le o lagona mai e i latou o lo o faia lea amio lo tatou naunau e faamalosi lenei tulafono,” o le saunoaga lea a Lolo ia Le’i.

 

Na pau le itu taua e pei ona taua e le alii kovana, e le o i ai se soifua o aafia ai i faalavealave tau taavale ia o lo o aafia ai taavale a le malo e pei ona ripotia atu i lona ofisa.

 

“Ua oo i le taimi nei ua tatau ai loa ona pagatia i latou o lo o faia le amio o le le usitai i le tulafono, e ala i lo tatou faamalosia loa o le Tulafono e faasala ai se tasi e faia lea amio, e pei ona faatulaga mai i totonu o Tulafono ma Ta’iala a le malo,” o le saunoaga lea a Lolo ia Le’i.

 

“Afai e faalua ona maua se tagata faigaluega a le malo o ia faia lea amio o le solitulafono, o le a faamalolo loa lea tagata mai le toe avea ma tagata faigaluega a le malo,” o le saunoaga lea a Lolo i lana tusi ia Le’i.

 

O ni isi mataupu e faatatau i taavale a le malo e maua o faaaoga i auala le tatau, o le a tuuina atu le faia o se faaiuga i le tagata faigaluega o lo o aafia ai i le tofa Le’i, e pei ona taua e le alii kovana i lana tusi.

 

O le kopi o le tusi a le alii kovana sa tuuina atu i le afioga i le Lutena Kovana ia Lemanu Peleti Mauga, o Faatonusili ma Faauluuluga o Matagaluega ma Ofisa uma a le malo, faapea ai ma le tofa Fiu Saelua o lo o faauluulu i ai tagata faigaluega uma a le malo i le Ofisa o le Kovana Sili.

 

Na taua e le Masela o le Auala ia Alu Faamasino i le Samoa News i le aso ananafi, o lo o faaauau pea lona taofia o taavale a le malo na te maua e le o usitaia ala o le tulafono e pei ona faatonuina e le alii kovana, e pei o le leai o se pemita e faataga ai ona fealuai le taavale pe a tuanai taimi faigaluega a le malo, faapea ai ma se faatanaga mo le tagata faigaluega a le malo na te faafoeina ai le taavale.

 

E tolu isi taavale na taua e le Masela o le Auala na ia taofia i le vaiaso ua te’a ina ua maua e le o usitaia tulafono o le tulafono e pei ona moomia.

 

“O le tele lava o taavale a le malo o lo o o’u taofia i luga o le auala, o le leai lea o se pemita o le tagata ave ta’avale o lo o faafoeina le ta’avale, ae i lalo o le tulafono, e tatau i le Faatonusili ona mautinoa o lo o i ai se pemita e faataga ai le tagata faigaluega ona ia faafoeina le taavale a le latou ofisa,” o le saunoaga lea a Fa’amasino.

 

I le fonotaga a le kapeneta na faatoa maea atu nei, na toe faamamafa ai e le alii kovana le mataupu lenei, ina ua maitauina pea le toatele o tagata faigaluega a le malo e le o usitai i le tulafono.

 

O se tasi o faalavelave na taua e Lolo i lana saunoaga o le faalavelave lea na aafia ai se taavale a le Ofisa o le KVZK-TV i Fagaalu, ina ua mafuli i luga o le auala i se taimi o le po.