Sauni Lolo faamalosia nisi fautuaga mo le Ofisa Aoga

Ua i ai le fuafuaga a le afioga i le Kovana Sili ia Lolo Moliga, e le o toe mamao se taimi e amata loa ona faamalosia nisi o fautuaga sa tuuina mai i le Fonotaga o Aoga sa faia i le masina na te’a nei, mo auala e faatino ai nisi o auaunaga a le Matagaluega o Aoga.

 

Na taua e Lolo i lana saunoaga i le fono a le Kapeneta i le vaiaso nei e faapea, o lo o galulue lona ofisa i le tau tuu faatasia o se ripoti faai’u e tusa ai o le fautuaga a le Komiti o le Fonotaga o Aoga, ma le faamoemoe e tatau foi ona i ai se fautuaga e tuuina atu i le Fono mo vaega e tatau ona mulimulita’i i ai le Ofisa o Aoga.

 

O nisi o fautuaga na taua e Lolo e tatau ona amata faamalosia e le Ofisa o Aoga i le tausaga fou 2014, o le tatau lea ona tofu uma faiaoga o le a galulue i le aoaoina o fanau ma faailoga BA, ae a maualalo ane o le AA degree mai le Kolisi Tuufaatasi.

 

“Ua i ai le manatu ua tatau loa ona amata faamalosia nisi o fautuaga sa tuuina mai e i latou na faafofoga ma auai i lea Fonotaga, ina ia iloa ai o lo o aoga talanoaga sa faia, ae le faapea o le a tatou nofonofo ai lava ma nei mau fautuaga e leai se mea e faia i ai,” o le saunoaga lea a Lolo.

 

Talu ona maea le Fonotaga o Aoga, e le’i maea lava ona tuufaatasia se ripoti faaiu e tusa ai o fautuaga uma sa tuuina atu e sui usufono.

 

Ae i le aotelega o lenei mataupu e pei ona saunoa Lolo, ua ia manatu ai e taua fautuaga sa tuuina atu e sui usufono, i le tatau lea ona faamamafa le faaaogaina o le gagana Samoa i soo se taimi e aoaoina ai fanau aoga, ma ia faamalosia ona galulue faatasi tagatanuu, pisinisi ma le atunuu atoa i le aoaoina o fanau.

 

O se tasi o auala na taua e Lolo e mafai ai ona faamalosia fautuaga ma ta’iala sa mafai ona tuufaatasia i le taimi o le Fonotaga, o le tuuina atu lea o se pili i le Fono Faitulafono mo se tulafono taufaaofi, e mafai ai ona faamalosia atili lenei mataupu.

 

Na taua fo’i e Lolo lona faia o se faaiuga, ina ia aveese mai nisi o matafaioi o lo o faatino e le Matagaluega o Aoga e pei o le faaleleia lea o faleaoga (Maintenance), ae tuu atu i le Matagaluega o Galuega Lautele latou te faatinoina, ina ia aua ai ne’i toe lavelave tiute tauave a le Ofisa o Aoga, ae tuu atu atoa lo latou taimi e a’oa’o ai fanau aoga.

 

“O le agaga maualuga o le malo, aua nei toe faatalale le Ofisa o Aoga i le faatinoina o ona tiute i le aoaoina o fanau aoga, e pei ona maitauina i tausaga ua mavae, ae ave atoa loa lo latou taimi, tamaoaiga ma le tomai e a’oa’o ai fanau ina ia popoto ma atamamai,” o le saunoaga lea a Lolo.

 

Sa ia taua foi lona fautuaina o le Peresetene o le Kolisi Tuufaatasi, ina ia faatulaga lelei auala e a’oa’oina ai faiaoga mo le sailiga o a latou faailoga, e fesoasoani ai i le pito laau a le Matagaluega o Aoga.

 

“E le mafai e le Faatonusili o Aoga ona faatino lenei galuega na o ia, e aunoa ma le tatou lagolago atu i ai,” o le isi lea saunoaga a Lolo i lana kapeneta.

 

Na faamaonia e le Faatonusili o le Matagaluega o Galuega a le malo ia Faleosina Voight e faapea, e lima vaega ua vaevae i ai e lana matagaluega le polokalame o le tausia ma le vaavaaia lelei o faleaoga uma i le atunuu.

 

O ia vaega e lima, ua maea ona tofia i ai i latou e faauluulu i ai le vaavaaia o nei galuega.

 

O vaega e lima ua vaevaeina i ai le tausia lelei o faleaoga e aofia ai le Itu i Sisifo lea ua taitaia e le susuga a Amituana’i Uini Atofau; o Sisifo Tutonu lea o lo o vaavaaia e le tofa Masaniai; o aoga i le taulaga o lo o vaavaaia e le afioga Pulu Ae Ae Jr; o Sasa’e tutonu o lo o vaavaaia e Tuimaseve Laupola, ma aoga i Sasa’e o lo o vaavaaia e le afioga Vaesa’u Talauega.

Comment Here