Sauni le Tolotolo o Tama Uli e toe malaga mai

E tasi le fautasi mai Samoa lea ua faamaonia le malaga mai e tausinio i le tuuga fautasi o le fu’a o lenei tausaga, e pei ona faamaonia mai i se saunoaga a le afioga i le alii Palemia o Samoa, susuga Tuilaepa Lupesoliai Sailele Malielegaoi i luga o le TV3 a Samoa i le amataga o le vaiaso nei, ma o lea Sa, o le Sa mai le afioaga o Salelologa, lea fo’i o lo o umia le siamupini o tuuga fautasi o le 2013 i Samoa, le Tolotolo o Tama Uli.

 

E ui e le i faamaonia mai e le Failautusi o le Ofisa o Mataupu Tau Samoa i le Samoa News ananafi po o ai le fautasi mai Samoa o le a malaga mai, peitai na pau le saunoaga a Satele Galu Satele sa tuuina mai, ua maea ona tuuina atu le valaaulia i Samoa mo se fautasi ma le ausiva e auai i le faamanatuina o le fu’a a le atunuu i lenei tausaga, ma ua taliaina fo’i e le malo o Samoa le valaaulia.

 

“Ua maea ona feiloa’i le alii kovana ia Lolo Matalasi Moliga ma le Palemia o Samoa i le vaiaso na te’a nei, ma ua maea fo’i ona faaoo atu i ai le valaaulia mo le fautasi ma le ausiva ma le pese faaleaganuu e tasi mai Samoa e faafiafia i le tatou sisiga fu’a, pau le faaiuga a le Palemia e fai o le filifili lea o le fautasi ma le au siva e malaga mai e tali i le valaauli,” o le saunoaga lea a Satele.

 

I se ripoti sa faasalalauina i luga o le TV3 i le amataga o le vaiaso nei, sa faamaonia ai e Tuilaepa i tusitala i Samoa le malaga mai o le va’a na siamupini i le tuuga fautasi o le 2013 e tausinio i le fu’a a Amerika Samoa mo lenei tausaga.

 

O le tausaga e 2012 na siamupini ai le Tolotolo o Tama Uli i le tuuga fautasi o le fu’a a le malo o Samoa, ma malaga mai ai le va’a mo le ulua’i taimi e tali i le valaaulia na avatu i Amerika Samoa nei, e tausinio i le tuuga fautasi o le fu’a a Tutuila ma Manu’a.

 

E le i manuia taumafaiga a le Tolotolo o Tama Uli i lea tuuga, ina ua sola le Aeto mai Pago Pago ma le siamupini, ae tulaga lima ai le Tolotolo o Tama Uli, ae ina ua fesiligia le alii kapeteni o le va’a ia Pauli Ivan Williams i sona finagalo e tusa ai o le tuuga, sa ia taua ai e faapea, afai ae toe maua se isi avanoa e toe malaga mai ai le latou auva’a i Amerika Samoa nei, o le a sili atu se tulaga e o o i ai la latou taumafai.

 

I le siamupini ai o le Tolotolo o Tama Uli mai Salelologa i le tuuga o le fu’a a Samoa ia Iuni 2013, na vaaia ai se suiga tele i le tulaga ua i ai le malosi o le auva’a faapea ai ma le tulaga lelei ua i ai le toe faafouina o le va’a, ma ua tulimata’i fo’i le vaai a fautasi uma i Amerika Samoa nei mo le faataliina o le toe malaga mai a le Tolotolo o Tama Uli e osi lona toilalo i le 2012.

 

Mo fautasi o le a tausinio i le tuuga o lenei tausaga, na taua e Satele e faapea, e tele fautasi o le a tausinio i le tuuga o lenei tausaga e ui e le i faamautuina mai le aofa’i.

 

O fautasi ua mautinoa lava le auai i le tuuga o lenei tausaga e aofia ai le siamupini o le tuuga fautasi o le fu’a o le 2013 mai Vatia, le Fuao; Paepaeulupoo II mai Aua; Aeto mai Pago Pago; Fealofani Samoa III mai Fagasa; Matasaua mai Manu’a; Satani mai Nuuuli; Fetuoleafiafi mai Fagaalu ma le Fa’asaulala mai Vailoatai.

 

Na taua e le tufuga fau vaa ia Leoititi Ioane Maselino o lo o gafa ma le fausiaina o le va’a fou a le Paepaeulupoo II e faapea, e maea le vaa e le i taitai o o i le masina o le tuuga o lenei tausaga, ma ua sauni fo’i le au va’a mai Aua e tausinio ma le faamoemoe, o le a latou sosola ma le siamupini o lenei tausaga, ona o le fausaga fou lea ua fausia ai le Paepaeulupoo II.

 

PESE MA SIVA FAALEAGANUU

 

O se tasi o vaaiga mataina ua vaaia e le toatele o le atunuu i le taimi nei, o le aami lea e ausiva mai Amerika Samoa o ni isi o faiaoga iloga i le taleni o le a’oina o pese ma siva faaleaganuu mai Samoa, e fesoasoani i a latou tapenaga mo lenei tausaga.

 

E pei ona silafia, o le susuga ia Tupa’i Faasalafa, o se tasi o tamalii ua iloga i le taleni o le fai pese ua aami faapitoa e le afioaga o Pago Pago na te a’oina la latou pese faaleaganuu mo le fu’a o lenei tausaga.

 

Na faamaonia mai e le afioga i le Matua ia Pulu Ae Ae Jr i le Samoa News e faapea, o le susuga a Faasalafa lea ua maea ona filifilia e le afioaga na te taitaia le pese mo le fu’a.

 

Mo le siva ma le pese faaleaganuu a le kamupani o le StarKist Samoa, lea e lua i ai pese ma siva faaleaganuu mai Amerika Samoa nei mo le fu’a, ua tofia ai le susuga ia Agaali’i Pese mai Samoa na te a’oina le pese ma le siva a le kamupani.

 

Na faamaonia mai e se sui sinia a le kamupani sa fesiligia e le Samoa News, o le amataga o le vaiaso nei na amata ai a’oga pese a le kamupani ma le faamoemoe ia lava le taimi e tapena ai mo le valaaulia, ma o lo o latou faaaogaina le Fale Samoa a le malo i Utulei e faatino ai la latou tapenaga.

Comment Here