Ads by Google Ads by Google

Sauni le taamilosaga taito’a 7 o le fu’a mo lona amataina

Ua le o toe i ai lava se isi mea o  totoe i tapenaga a le Kalapu a le Malisi Sagato Iosefo faapea ai ma le Iuni Lakapi a Amerika Samoa, mo le amatalia o le taamilosaga taitoa 7 o le  sisigafu’a i le faaiuga o le vaiaso nei, sei vagana ai le ili o le faili a le laufali.

O le Aso Faraile ma le Aso Toonai o le vaiaso nei ua faamoemoe e faatauaia ai le taamilosaga taitoa 7 faavaomalo, e sailia ai se siamupini o le sisigafu’a i lenei tausaga, i lalo o le faatautaiga a le Malisi fa’atasi ai ma le lagolago malosi a le kamupani a le Tautua Mo Oe.

O le fonotaga mulimuli a kalapu uma ma le komiti faafoe i le aso ananafi na faamautuina mai ai fuafuaga mo le taamilosaga, sei vagana ai le fonotaga a faiaoga ma pule o ‘au taitasi lea o le a faia ma le komiti faafoe a taeao, i le malae taalo o le V.A Stadium i Tafuna.

I se faatalatalanoaga a le Samoa News ma le peresetene a le Malisi ia Toleafoa Isitolo Wulf, e tusa ai o tapenaga a le kalapu mo le faamoemoe, sa ia taua ai le tulaga lelei o fuafuaga  uma mo le faamoemoe i lenei tausaga, atoa ai ma le naunau ina ia amataina loa le taamilosaga sei faamalieina ai le maimoa a le atunuu.

O le aso ananafi na taunuu mai ai le au taitoa 7 mai Tonga, ae o le aso ma le aso a taeao lea ua faamoemoe e taunuu mai ai isi au mai Fiti ma Samoa tuaoi, ae o lo o fa’atalitali pea le ‘au mai Ausetalia, a le o nei, o taeao e taunu’u mai ai.

Na faaaoga e le taitaifono o le Iuni Lakapi a Amerika Samoa, le afioga i le kovana sili, le matua ia Togiola Tulafono, ia le fonotaga i le aso ananafi, e faaoo atu ai nisi o ana fautuaga faatama i sui o kalapu lakapi uma i le atunuu, ina ia tausisi i le amio tausaafia ma ia taalo faatausala, ina ia iu manuia le faamoemoe o le malo i lenei tausaga.

“E le toe manaomia le ituaiga taaloga lea sa tatou taaalo ai i le 20 tausaga talu ai, e amata i fusuaga toe faaiu i fusuaga, ae ua tatau ona sui le sitepu tatou te laa i ai Amerika Samoa, afai ua matua le taaloga i le atunuu, ua tatau foi ona matutua tagata e faatinoina,” o nisi ia o lu’itau na tuuina atu e le kovana i le fonotaga sa faia i le aso ananafi.

O le fonotaga foi ananafi na faamautu ai lesitala o ‘au atoa ai ma le lesitalaina o isi tama taaalo e le o i ai o latou igoa i faamaumauga i faamaumauga a le Iuni, lea na fautuaina ai e le alii kovana kalapu taitasi ina ia mautinoa e lesitala uma o latou sui ae le’i amataina le taamilosaga i le Aso Faraile nei.

“Tusa lava pe ua lesitala lau ‘au ae afai e le’i lesitalaina tama ta’a’alo e le mafai ona tausinio lau ‘au, e le tatau foi ona toe suia tulafono ua maea ona pasia ona o  tulafono nei e tatau ona mulimulita’i i ai le Iuni mo ana faaiuga,” o le saunoaga lea a le alii kovana.

O nisi o malo faaaloalogia ua fuafua e auai mai mo le taamilosaga taitoa 7, e aofia ai le alii kapeteni o le au taitoa 7 a Niu Sila ia D.J Forbes, o Jerome Kaino atoa ai ma nisi o tama iloga i le taaloga lakapi e aofia ai sui o le Manu Samoa.

O le au taitoa 7 mai le afioaga o Vailele o lo o umia le siamupini o le taamilosaga o le fu’a mo tausaga e lua, ma ua faamoemoe e toe malaga  mai e puipui le Ipu o le siamupini.

“O se avanoa lelei lenei mo tatou tama taalo e feiloai ma taalo faatasi ai ma nisi o tama lakapi i iloga i le Pasefika e aofia ai Fiti, Tonga ma Samoa, ma o se avanoa lelei foi latou te aoaoina mai ai nisi o metotia i le faatinoina o le taaloga i lona tulaga maualuga ma lelei atoatoa,” o le saunoaga lea a Toleafoa.

I le vaavaai atu i ai i tapenaga a au mai kalapu eseese i le atunuu, ua maitauina ai le leai o se au o toe faatamala, ae ua naunau uma ina ia o latou maua le tulaga manumalo.

O alii laufali mai Samoa o le a faafoeina le taamilosaga o le fu’a i lenei tausaga, i lalo o le lagolagosua a alii laufali mai Amerika Samoa nei, ma ua i ai foi le faamoemoega o tulafono uma lava mai le Faalapotopotoga o le taaloga lakapi i le lalolagi, le IRB o le a faafoeina ai le taamilosaga, i lalo o le faamalumaluga a le ASRU, lea ua galulue soosoo tauau ma le kalapu a Malisi i lenei tausaga.  Aemaise ai o le lagolago malosi mo le fa’atupeina o lenei fa’amoemoe, le susuga Frank Gaisoa ma le aiga, ma le latou pisinisi o le Tautua Mo Oe.