Ads by Google Ads by Google

SAUNI LE MANU SAMOA E FETAUI MA FALANI

O le 6 i le taeao a taeao, o le a feagai ai le ‘au lakapi a Samoa, le Manu Samoa ma se ta’aloga pito sili ona faigata i le latou taamilosaga i atunuu o le itu i matu o le lalolagi, o le latou ta’aloga ma le ‘au a Falani.

I se saunoaga a le ‘manager’ o le ‘au, le susuga Namulau’ulu Sami Leota, mai i Falani e pei ona lomia i le Samoa Observer, o lo o loto malolosi lava le ‘au ma fai filemu a latou tapenapenaga mo le latou taaloga ma Falani.  Na ta’ua e Namulau’ulu, o lo o silafia e le Manu, o le latou ta’aloga pito sili ona taua lenei ma o lo o taumafai lava ina leai se mea e fa’alavelavea i tapenapenaga a tama ta’a’alo.

Na ta’ua e Namulau’ulu, o lo o silafia e le ‘au, e le o se mea faigofie le fetauiga o loma nei ma le au o lo o numera fa i le faasologa o ‘au lakapi a le lalolagi ae o le a le fa’avaivai ai ma o le a o latou ta’a’alo ma lo latou malosi atoa.

Na ta’ua foi e Namulau’ulu, o lo o galue malosi le alii faiaoga o le ‘au, le susuga Stephen Betham ina ia le so’ona faatiga i mafaufau o le ‘au.

Na saunoa Namulauulu, o le fa’afaigata o lenei ta’aloga, o le a pa’u i luga o le ‘au a Falani, ona ua leai so latou masalosalo i le taimi nei, i le tulaga e mafaia  e le ‘au a le Manu, e pei ona molimauina i le latou ta’aloga ma Wales i le vaiaso ua mavae.  Aemaise ai, o luma o le atunu’u o Falani lea o le a feiloai ai le Manu ma le ‘au a Falani.

E ui i lea, o lo o i ai pea ni itu o lo o tula’i mai ai se popolega i le itu a le Manu, e aofia ai le le mautinoa i le taimi nei, pe o le a ta’a’alo ia Paul Williams ma Faatoina Autagavaia ia ma le alii o Daniel Leo lea lava o lo o afaina.

Na saunoa Namulauulu, o lo o galulue malosi foma’i ina ia mafai ona o’o atu i le taeao a taeao ua saunia uma le ‘au, i tulaga o latou soifua maloloina, ina ia mafai ona ta’a’alo.   Sa fa’aalia e Namulau’ulu, na i ai se manatu e toe aumai ni isi tama ta’a’alo e sui ai i latou ia, aep eitai, ua tonu i le pulega, o le a le faia lea tulaga.

Na saunoa Namulau’ulu, a tu’u o tatou faatuatuaga atoatoa i le ‘au, o le a leai se mea e toe popole ai se tasi.

Na momoli mai alofa’aga o le a’u atoa i tagata Samoa uma i so’o se itu o le kelope o lo o nofo tatalo ma o lo o tu’i le mulipapaga, aua lo latou alo atu i nei fa’agatama fa’alelalagi.  O le agaga fa’afetai ua fa’aalia e nei ali’i ta’a’alo ona o le le motu o faamanuiaga ua o’o atu ia i latou, sa faaalia foi, tauala mai ia Namulauulu.

Na folafola mai Namulauulu, ua toe tasi le ta’aloga o totoe ma o le a taumafai tama o le Manu ina ia avea ma ta’aloga e faamalieina ai Samoa uma.