Sauni le malaga lona lua a le Kovana mo Manu’a

O le Aso Faraile o le vaiaso nei lea ua faamoemoe e ave ai le ulua’i uta a le malo mo Manu’a, e fa’aagaaga i mea uma e mana’omia mo le malaga lona lua a le kovana lea ua fuafua mo le isi lua vaiaso, e pei ona faamaonia i le fonotaga a le komiti o lo o gafa ma le tuu faatasia o lenei faamoemoe, i le aso ananafi.

 

O lea fonotaga na taitaia e le susuga ia Nofoaiga Sualevai, ma sa aofia ai ni isi o Fa’atonusili, atoa ai ma le afioga i le Lutena Kovana ia Lemanu Peleti Mauga.

 

O ni isi o mataupu sa talanoaina i lea fonotaga na aofia ai uta mo le faatotogaina o ofisa fou a le malo o le a tatalaina i Manu’a, atoa ai ma ta’avale ua faamoemoe e ave e faaaoga e Ofisa i Manu’a.

 

I le ulua’i malaga a le afioga i le kovana sili ia Lolo Matalasi Moliga i Manu’a i le faaiuga o le masina o Me na te’a nei, sa ia faatonuina ai Faatanusili o Ofisa ma Matagaluega uma a le malo ina ia amata tapena le tatalaina o lala uma o ofisa a le malo o lo o i Tutuila i totonu o Manu’a ae e le’i aulia le aso o le fu’a a Manu’a ia Iulai 17, 2013.

 

O le malaga a le MV Sili i le Aso Faraile nei o le a faapitoa mo le la’uina o tane suau’u ma kesi ta’avale ona sosoo ai lea ma isi malaga i le vaiaso fou mo le la’uina o ta’avale a matagaluega uma ma ofisa a le malo mo Manu’a.

 

O se tasi o fuafuaga mataina e pei ona fautuaina e le alii kovana, o le fausia o se pamu kesi fou a le malo i le nofoaga o lo o i ai le Ofisa o le Matagaluega o Galuega i Ta’u, ina ia fesoasoani i le utuina o ta’avale ona o le taimi nei, e le o i ai se pamu kesi i Manu’a se’i vagana ai kalone kesi ma suauu o lo o la’u atu i le va’a mai Tutuila nei.

 

Na pau le faafitauli o lo o feagai ma le MV Sili i le taimi nei e pei ona faamaonia e le Faatonusili o Pulega o Uafu ma Taulaga i le komiti, e le o lelei le le vaega e ui atu ai ta’avale mai luga o le va’a aga’i atu i le uafu, ma ua faamoemoe o le vaiaso fou e tatau ona faaleleia lea faaletonu.

 

O lo o i ai le faamoemoe o le komiti e tatau ona oo atu i le aso 15 Iulai ua maea uma uta a le malo i Manu’a, ona o le malaga mulimuli e soso’o ma le fu’a o le malaga lea e faapitoa mo tagata e malaga i  Manu’a mo le fu’a atoa ai ma le malaga a le ali’i kovana.

Comment Here