Ads by Google Ads by Google

Sauni le faigamalo e aloaia le Aso o Tagata Matutua

I le kalena na tuuina mai i le Ofisa o le Kovana Sili i le vaiaso na te’a nei, o lo o taua ai ni isi o aso faamanatu iloga i le atunuu ua sauni le malo e tuuina atu i ai lana lagolago, e aofia ai le  ‘Aso o Tagata Matutua’ i le masina o Me, o le a faatauaina ai tama ma tina matutua uma i le teritori; o le aso 4 o Iulai lea e faamanatu ai le Tutoatasi o Amerika, lea ua faatulaga e Lolo ma Lemanu o le a faatauaina ai ‘Tupulaga Talavou’ uma i le teritori; o le faatauaina o ‘turisi’ i le masina o Novema; aemaise ai o pesepesega o le kerisimasi i le masina o Tesema, lea ua finagalo Lolo ma Lemanu e faatauaina ai ‘aiga uma i le teritori.’

 

Saunoa le alii kovana e faapea, “o aso faapitoa nei e tatau i le faigamalo ona sauniuni ma tapenapena i ai,’ e le gata o le tausaga lenei ae faapea foi i isi tausaga e tolu o lo o totoe o le la nofoaiga ma Lemanu.

 

O le ulua’i aso faapitoa o le nofoaiga a le afioga i le alii kovana ia Lolo Matalasi Moliga ma le lutena kovana ia Lemanu Peletei Mauga, o le aso o le fu’a e pei ona faamanatuina i le lua vaiaso talu ai.

 

ASO O TAGATA MATUTUA

 

O le aso 15 & 16 o Me, 2013 ua faatulaga e faamanatuina ai le aso mo Tama ma Tina matutua, e pei foi ona faamanatuina i isi setete ma teritori o le malo tele.

 

E ui e lei faalauiloaina mai se polokalame mo lenei aso taua, peitai ua faailoa e Lolo ma Lemanu i le kapeneta le tatau lea ona latou auai uma i le faamanatuina o lea aso taua, ina ia iloa ai e tama ma tina matutua o le atunuu o lo o amanaia e le malo la latou tautua i aso ua mavae.

 

Na taua e le Faatonusili o le Ofisa o Tagata Matutua (TAOA) ia Tifiale Malae i le Samoa News e faapea, o lo o i ai le faamoemoe e faia faafiafiaga faa Samoa a Toomaga taitasi i lea aso lea, ina ia lagona ai e tama ma tina matutua le taua o i latou i le malo.

 

I tausaga ua mavae ao avea le afioga ia Tuiteleleapaga Fue Ioane ma faatonusili o le TAOA, sa amata ai le aso faapitoa o tagata matutua i se solo tele e amata mai i luma o le Pago Plaza ma aga’i atu ai i le nofoaga autu a le TAOA lea e faafeasaga’i ma le Faletalimalo o le Evelani i Pago Pago lava.

 

FU’A O LE IUNAITE SETETE - IULAI 4

 

O le faamanatuina ai o le aso fiafia o le Iunaite Setete e pei ona i ai le aso 4 Iulai, ua manatu ai le malo, o le a autu le faamanatuina o lea aso i tupulaga talavou a le atunuu, ina ia lagona ai foi e tupulaga talavou le taua o i latou i le silasila a le malo.

 

Ua taoto atu i le Matagaluega o Tagata Faigaluega a le malo atoa ai ma le Matagaluega o Tupulaga Talavou, Tina ma Tamaitai le faatulagaina o ni polokalame e mafai ai ona faalauiloa le manulauti i lea masina.

 

O ni isi o polokalame ua fautuaina e Lolo ma Lemanu e tatau ona faia e aofia ai le faia o ni gaioiga e amata ai ona faa faigaluega tupulaga talavou ina ia latou lagonaina ai le taua o le i ai o agavaa i galuega a le malo.

 

FU’A A MANU’A

 

E ui e le o aofia ai le sisigafu’a a Manu’a i polokalame ua faalauiloa e Lolo ma Lemanu e tatau ona faamanatu i lenei tausaga, peitai o le isi lea aso taua e le mafai ona misia e pei ona saunoa le alii lutena kovana ia Lemanu.

 

Na taua e Lemanu e faapea, ua maea ona i ai le polokalame mo le aso e faamanatu ai le fu’a a Manu’a i lenei tausaga. E lei faamautuina mai pe faamanatuina i Tutuila nei le aso o Manu’a pe faataunuu i Manu’a  e pei ona masani ai i ni isi o tausaga ua mavae.

 

I tausaga sosoo e lua ua tuana’i atu, sa fa’amanatuina ai le fu’a o Manu’a ia Iulai 17 i Tutuila nei, i lalo o se malileiga sa faia e le alii kovana sa i ai o Togiola Tulafono, ma ni isi o ta’ita’i o le itumalo ona o le mafuaaga e tasi, o le faaletonu lea o le itu tau tupe a le malo ua le mafai ai ona faataunuu lea aso taua.

 

PESEPESEGA O LE KERISIMASI

 

O nai suiga ua finagalo Lolo e tatau ona faia i le taimi o pesepesega o le kerisimasi o lenei tausaga, o le ave lea o le avanoa i faalapotopotoga, o autalavou, ekalesia ma aufaipese e pesepese ai, nai lo le toe tuuina atu foi o le avanoa i ofisa ma matagaluega a le malo e pepese ma sisiva ai e pei ona faia i tausaga ua mavae.

 

“Ua ma manatu ma Lemanu e tatau ona faia ni nai suiga i le polokalame o pesepesega o lenei tausaga, e ala i le faataua lea o tatou aiga, ina ia tuu atu i ai le avanoa e o mai ai e faafiafia e ala i autalavou, faalapotopotoga ma ekalesia, mo le tuuina mai o so latou sao i le faamanatuina o le kerisimasi ma le tausaga fou o lenei tausaga,” o le finagalo lea o le alii kovana.

 

O soo se aso faamanatu ua sauni le malo e faailoga i lenei tausaga, ua maea foi ona tofia komiti latou te faatulagaina fuafuaga, ma o sui o komiti o lo o filifilia mai lava i totonu o le kapeneta a le alii kovana.