O le vaiaso na te’a nei ina ua toe taliu mai i fanua le Ausiisii U’amea Mamafa a le atunu’u, i le mae’a ai o Ta’aloga lona XV a le Pasefika i Papua Niu Kini, na toe amata ai loa a latou koleniga masani e tapena ai se ‘au mo ta’aloga a le Oceania, lea ua fa’amoemoe e talimalo ai le atunu’u o Fiti i le masina o Me 2016.

I se fa’atalatalanoaga a le Samoa News ma le faiaoga o le ‘ausiisii, na taua ai e Alo Lopesi Fa’agu le amata o tapenaga a le ‘au mo le ta’amilosaga a le Oceania Weightlifting Championship (OWC) lea e fa’agasolo i tausaga ta’itasi.

“O lea ua toe amata a matou koleniga masani mo ta’aloga a le OWC i le tausaga fou, ae to’a 5 isi sui fou lea ua fa’aopoopo mai i le ausi’isi’i i le taimi nei, o i latou fo’i ia o loo ave i ai le faamuamua i le taimi lenei i le taumafai lea e a’oa’o ma fa’amasani i metotia e fa’atino ai le ta’aloga,” o le saunoaga lea a Alo.

“O le OWC i le 2014 sa fo’i mai ai Amerika Samoa ma pine e 5, ae o le tausaga lenei i Papua, e 8 pine sa mafai ona maua, ma o loo i ai le fa’anaunauga ia sili atu ni isi pine e maua e le tatou ‘ausiisii pe afai ae malaga atu i Fiti i le tausaga fou,” o le saunoaga lea a Alo.

I pine e 5 na maua e Amerika Samoa i le ta’amilosaga a le OWC i le 2014 i Niu Kaletonia, sa aofia ai le pine auro e tasi na maua e le tama’ita’i o Orepa R. Talo, lea fo’i sa ia toe manumalo ai i le isi pine auro i le ta’amilosaga sa faia i Papua i le amataga o le masina lenei.

O isi pine na maua e Amerika Samoa mai le ta’amilosaga a le OWC i le 2014 e aofia ai le pine siliva e tasi, faapea ai ma pine apamemea e 3. I le tausaga lenei, e tasi le pine auro, 2 pine siliva ma pine apamemea e 5.

Saunoa Alo e fa’apea, e le gata o lea ua amata tapenaga mo le au si’isi’i, ae o lea fo’i ua amata sailiga tupe e fesoasoani ai i tapenaga a le ‘au mo Fiti.

E to’a 6 sui o le ‘ausiisii a Amerika Samoa sa tausinio i Papua i le amataga o le masina lenei, o i latou nei e aofia ai tama’ita’i e to’atolu faapea ai ali’i e to’atolu.

O ali’i e to’atolu e aofia ai Tanumafili Jungblut ma Apineru Vaoga o loo aooga sikolasipi i Niu Kaletonia, faapea ai ma le ali’i o Malaki Sitagata Jr. Ae mo le vaega o tama’ita’i, o i latou sa tausinio e aofia ai Orepa, Jenade F. Ausage ma Monica T. Afalava.

Saunoa atili Alo e fa’apea, o le agaga maualuga o loo i ai a le Asosi Siisii a Amerika Samoa, ia mafai pea ona fa’aopoopo atu alo ma fanau e koleni i le ta’aloga, ina ia mafai ai pea ona maua ni isi e tausinio i aupaga taitasi i soo se tausaga e tausinio ai i ta’aloga tetele a le Pasefika.