O ali'i talavou e to'alua ia o lo o loka i le falepuipui i Tafuna ona o tu'uaiga i lo la osofa'ia lea o ni fale a ni aiga i nofoaga 'ese'ese e lua, ua la fa'amoemoe o le a tu'uina atu ni a la tali ioe i luma o le fa'amasinoga e tusa ai o gaoioiga sa la'ua faia.

O le ali'i o Taligalu Ah Siu, 20 tausaga o lo o tu'ua'ia i lona ulufale fa'amalosi lea i totonu o se fale a se aiga i Vaitogi, ma taumafai e fa'ao'o ni manu’a i se tagata sa ia maua atu i totonu o le fale, ae o le ali'i o Pelasio So'otaga, e 20 tausaga le matua lea ua tausala i le moliaga muamua na toe sui e le malo, ina ia fa'ailoa ai le moliaga o le talepe fale i le tulaga lua, ae solofua ai isi moliaga e lua o lo o totoe ai e fa'asaga ia te ia.

I le tali ioe ai o So'otaga i le moliaga o le talepe fale  i le tulaga lua sa ia ta'ua ai e fa'apea, na mafua ona latou talepeina le ofisa o le a'oga, ona ua le fiafia ali'i talavou ia sa latou to'atolu i le Faufautua a le a'oga, i le faia lea o ni tala e f'aalumaina ai i la'ua ao tumu tamaiti a'oga.

Na ta'ua e So'otaga lo latou aga'i atu ma le 'auali'i ia ma talepe le faitotoa o le ofisa, ma latou ulufale ai i totonu, ae iloa atu loa i latou e le leoleo po, o lea na latou toe sosola 'ese ai loa.

O le aso Faraile o le vaiaso fou lea ua fa'amoemoe e lau ai le fa'asalaga a le ali'i talavou lenei, ina ua talia e le fa'amasinoga maualuga le talosaga a le Ofisa Fa'anofova'ava'aia, mo se  isi taimi fa'aopoopo e mafai ai ona tapena se ripoti mo lenei mata'upu.

O lo o taofia pea So'otaga i le falepuipui i Tafuna talu mai le masina o Setema na te'a nei, e fa'atali ai le lauina o lona fa'asalaga.

Ae mo le  alii' o Ah Siu, o lo o taofia pea o ia i le to'ese ma le fa'amoemoe o le aso Faraile fo'i o le vaiaso fou lea o le a toe vala'auina ai lana mata'upu, ma sauni ai loa e tu'uina atu lana tali ioe i le fa'amasinoga e tusa ai o moliaga sa ia faia.

Na fa'ailoa e le loia a Ah Siu lona mauaina lea o fa'amaumauga e uiga i lenei mata'upu mai le malo, atoa ai ma se ofa ua tu'uina atu e le malo mo lenei ali'i pe na te taliaina pe leai fo'i, o le mafua'aga lea sa talosagaina ai e le loia le tu'u atu o se isi taimi e talanoa ai ma le ua molia, ina ia fa'amautu ai lana tali ioe lea ua fa'amoemoe e tu'uina atu i le fa'amasinoga.

I fa'amaumauga a le fa'amasinoga o lo o ta'ua e fa'apea, na talepe e le ua molia se fale o se aiga i Vaitogi, ona ia ulufale fa'amalosi lea i totonu ma le fa'amoemoe e fa'ataunu'u ai se isi solitulafono.

Ao i ai Ah Siu i totonu o le fale, sa ia va'aia le tagata e ana ia le fale o lo o moe i luga o le moega, o lea na ia alu atu ai loa ma sasa le ulu o lea tagata i se vaega o se computer, ma avea ai ma itu na te'i ai i luga lea al'ii ma ia iloa ai gaoioiga a le ua molia o lo o faia.

Na fa'amatala e le tagata lea i leoleo e fa'apea, ina ua ala i luga, sa ia va'aia le ua molia o alu atu ma se seleulu ma le fa'amoemoe e fa'ao'o ai ni manu’a ia te ia, peita'i na vave lana gaoioi ma mafai ai ona fa'asaoina o ia, ma ia logoina ai loa le ofisa o leoleo ao ia taofia le ua molia.

Na taunu'u leoleo ma lokaina loa le ua molia ma auina atu loa i le ofisa mo su'esu'ega, mulimuli ane ai taofia i le to'ese.

E $25,000 le tupe lea ua fa'atulaga e tatala ai le ua molia i tua mai le to'ese, ma o le taimi nei, o lo o taofia pea o ia i le to'ese ina ua le mafai ona totogiina lea tupe.