FOBRES: OU TE FIA VAAI I SE AU A AMERIKA SAMOA TAAMILOSAGA IRB

O le fonotaga a le Faalapotopotoga o Taaloga Lakapi a le lalolagi, le IRB i le aso 15 Me ua faamoemoe e iloiloina ai le talosaga a Amerika Samoa ua maea ona tuuina atu, ina ia avea ai o ia ma sui totino tumau e pei ona i ai isi foi atunuu o le lalolagi ua ofi atu ai i totonu.

O le fonotaga a le Iuni Lakapi a Amerika Samoa (ASRU) ma sui o kalapu eseese sa faia i le vaiaso na te’a nei, na faamaonia mai ai e le Taitaifono a le Iuni Lakapi lea tulaga.

Saunoa le afioga ia Togiola Tulafono, o ia foi lea o le kovana sili o le malo o Amerika Samoa, sa ia maua mai se imeli mai le Peresetene a le FORU, poo atunuu o le Pasefika o loo i lalo o le faamalumaluga a le IRB e faapea, ua talia e le IRB faamaumauga a Amerika Samoa i tulaga o peimeni sa faia e le ASRU, ma ua faamoemoe o le a tuu faatasi ripoti ma le talosaga lea ua maea ona taoto i luma o le IRB, ina ia tuuina atu ai mo lona iloiloina i le fonotaga a le IRB lea o le a faia i le masina o Me.

“E taua tele le fonotaga lea o le a mafai ai ona iloilo la tatou talosaga ma iloa tonu ai, pe faamata o le a talia le avea o i tatou ma totino tumau a le IRB,” o le saunoaga lea a le alii kovana.

O le taimi nei, o Amerika Samoa o loo avea ma totino faamalumalu a le IRB, ma o loo i ai tulaga o tulafono ma aiaiga o loo tuuina mai i ai e le IRB e ao ona mulimulita’i i ai, ina ia mafai ai ona ausia tulaga e tatau ona ausia, ona mafai lea ona avea se atunuu ma sui tumau o le IRB.

Na faamanino foi e le alii kovana e faapea, afai ae talia le talosaga  a Amerika Samoa, ona avea loa lea o Amerika Samoa o le atunuu mulimuli lava e le tutoatasi o le a ofi atu i totonu o le IRB ma avea ai ma totino tumau.

Fai mai Togiola, o le masina o Oketopa o le tausaga na tea nei na tuu aloaia atu ai le talosaga a Amerika Samoa i luma o le IRB, ae o le masina o Novema na sosoo ai sui le tulafono, ma faasa ai ona le toe taliaina ni atunuu e lei tutoatasi ona toe talia e avea ma totino tumau a le IRB.

Na fautuaina e le alii kovana kalapu lakapi  uma lava i Amerika Samoa ina ia galulue malosi mo le faataunuuina o lea moemitiga.

Ae ina ua fesiligia e le Samoa News le alii kapeteni a le au taitoa 7 a Niu Sila o loo i Amerika Samoa nei, le susuga ia DJ Fobres i sona finagalo e uiga i le taumafaiga a Amerika Samoa, na taua ai e lea alii tautaua i le taaloga lakapi lona fia vaai lea i se au e avatu i Amerika Samoa nei, o tausinio i taamilosaga a le IRB o loo faagasolo i tausaga taitasi.

“Ou te iloa o le au a Samoa o se tasi lea o au malosi i au lakapi taitoa 7 i le lalolagi, e faigata foi ona faatoilalo i nisi o taimi, ma ou te iloa e faapena foi Amerika Samoa, aua o Samoa lava e tasi, ae sili atu ai i lou manatu pe afai e i ai se au filifilia a Amerika Samoa e ofi atu i taamilosaga eseese a le IRB o loo faagasolo pea,” o le molimau lea a le alii o Fobres.

O le manatu foi lea a le alo a Samoa lea ua avea ma laufali lautogia faavaomalo a le IRB, afioga Anae Tui Komiti ina ua fesiligia i sona finagalo.

Na taua e Anae e faapea, o le taimi lava e ofi atu ai se au mai Amerika Samoa nei i totonu o taamilosaga a le IRB ma  avea ma totino tumau, o le a faigofie ai foi ona atina’e ma faaleleia le  taaloga i soo se itu.