Ads by Google Ads by Google

Sauni Faleomavaega galulue ma se Kovana fou

A’o sauni atu ai le tofa ia Faleomavaega Eni Hunkin lea ua toe filifilia i le nofoa o le atunuu i le laumua i Uosigitone, e galulue ma se kovana fou o le a filifilia e le atunuu i le aso 20 Novema i le ‘run off,’ sa ia taua ai e faapea, e lua lava upu e tatau i le nofoaiga fou ona tausisi i ai, o le faailoa o mea moni (accountability) atoa ai ma le fai o mea sa’o (transparency).

O upu ia e lua na taua e Faleomavaega, ua tiga taliga o tagata e faalogo so’o ai.

E le gata na ia faafetaia le atunuu ina ua o latou toe filifilia o ia e avea ma o latou sui i le konekeresi, ae sa ia saunoa foi e faapea, o le tulaga pito i taua lea o lo o totoe nei mo le palota, o le sailia lea o se kovana fou mo le teritori.

Fai mai Faleomavaega, o ai lava e filifilia e Amerika Samoa e avea ma Kovana mo le isi nofoaiga, ua ia sauni latou te galulue faatasi, atoa ai ma taitai fou o le Fono Faitulafono.

“E manaomia lo matou galulue faatasi, e le toe manaomia le tulaga o le le galulue faatasi,” o le saunoaga lea a Faleomavaega ao faaauau ona faaee atu pu o taavale i luma o le nofoaga o lo o faatu ai lana saini faafetai i le atunuu, i le taelega i Utulei.

A’o lumana’i le palota a le atunuu, na taua e Faleomavaega mafaufauga sa ia te ia, poo ai o le a manumalo i le palota.

Sa ia taua e faapea, o paga e lua ia ua sauni atu mo le ‘run off’, o ni paga lelei, ae o le a taoto atu lava i le atunuu mo la latou filifiliga, poo ai le taitai latou te filifilia mo Amerika Samoa.

Saunoa Faleomavaega e faapea, o sui tauva uma sa tausinio i le tausaga, o upu lava nei e lua sa latou talanoa i ai, o le ‘accountability’ ma le ‘transparency’, peitai o le fesili ua tulai mai, e faapefea ona ausia e le faigamalo foi le faataunuuina o upu nei.

Saunoa Faleomavega e faapea, o se tasi o itu taua mo le manuia o le teritori, o le galulue faatasi lea ma le latou sui i Uosigitone.

Sa ia taua e faapea, e ui lava ona o tulaga faaleaganuu, peitai e tolu lava vaega maioio o le faigamalo a Amerika Samoa, ma e foliga mai e le o aofia ai lava le Ofisa o le sui i Uosigitone i ni isi o mataupu e alia’e mai i le lotoifale poo fafo foi.

“Ae mo se faamanatu i o tatou tagata, e lua lava tulaga o lo o palota aoao ai le atunuu mo le teritori, o le tofi kovana ma le tofi i le konekeresi, ae o le eseesega i tulaga ia ona o le tofi i le konekeresi, o le tulaga pito maualuga lea a le feterale i le teritori, ae o le tofi kovana, o le tofi pito maualuga lea i lo tatou atunuu faalotoifale,” o le saunoaga lea a Faleomavaega.

E ui e masani ona i ai mataupu e eseese ai lagona o taitai o le atunuu, peitai na saunoa Faleomavaega, e tatau ona galulue faatasi mo le manuia o le teritori, e le avea foi le eseese o manatu ma itu e taofia ai tulaga tau fesootaiga, aua afai e leai se fesootaiga, o le a sili atu ona faigata le tau sailia o auala e foia ai faafitauli o lo o feagai ma Amerika Samoa.

I le agai atu ai o Faleomavaega mo lana nofoaiga lona 13 i le nofoa i Uosigitone, sa ia taua ai mataupu e lua o lo o ia naunau pea mo le au palota ina ia faailoa mai ai o latou finagalo, o le mataupu i le sitiseni faapea ai ma le mataupu i le faigamalo o lo o i ai Amerika Samoa, lea ua 112 tausaga o tausia pea ma le malo tele.

fa’aliliu Ausage Fausia