E tasi le aso o se mafutaga faamasani (Orientation)  na valaauina ai afioga i faipule fou o le maota o sui mo le Nofoaiga lona 33, peitai na taua e le Failautusi o le Maota o Sui ia Fialupe Lutu, e le gata na auai faipule fou i le mafutaga faamasani lea, ae na auai atu ai foi ma le toatele o isi faipule tuai o le maota.

O Loia a le Fono faatasi ai ma le Failautusi a le maota o sui, o i laua ia na gafa ma le faatautaia o lea mafutaga faamasani, lea na faamalamalama ai i faipule ai auala e faatautaia ai galuega a le maota i le taimi o ana tauaofiaga.

Ina ua fesiligia le afioga i le Fofoga Fetalai o le Maota o Sui i le autu o lenei mafutaga faamasani, na saunoa ai Savali Talavou Ale e faapea, o le mafutaga sa faapitoa lava i le faamaninoina o tulafono a le maota, ina ia silafia e faipule fou auala uma e faatautaia ai galuega a le maota pe a oo ina amata tauaofiaga a le fono i le vaiaso fou.

“E pei foi ona faia i soo se taimi e ulufale mai ai faipule fou, o lenei mafutaga e faapitoa lava i le faamaninoina o tulafono a le maota ma auala e faatautaia ai taualumaga o galuega a le fono,” o le saunoaga lea a Savali.

Ae ina ua fesiligia le Failautusi o le maota o sui sa ia taua ai e faapea, e le gata na auai faipule fou uma lava i le mafutaga faamasani, ae sa toatele foi isi faipule tuai o le maota na faatasi atu ai.

“O le autu o le mafutaga faamasani, o le faamatala lea i faipule o auala e faatino ai galuega a le fono, e pei o taimi e tauaofia ai le maota, lea e amata i le sauniga lotu, sosoo i ai ma le tauvalaauga o suafa o faipule uma, sosoo ai loa ma le faitauina o le tala otooto o galuega a le maota mo le aso ua mavae, ma faasolo atu ai lava i taualumaga masani,” o le saunoaga lea a Fialupe.

E le gata la i taualumaga o galuega a le maota i aso taitasi, ae sa faamalamalama foi i faipule fou taimi e faaulufale ai ni tulafono fou i luma o le maota, poo pili.

“Sa faamanino foi i le mafutaga lea tulaga o pili pe a ulufale i totonu o le maota, poo fea e ave i ai pe a maea ona faitau muamua, aemaise ai o taimi e valaau ai e taitai komiti sui o lana komiti mo iloiloga i ni mataupu sa laga i afioga i faipule, po o ni mataupu fou e faatatau i ni pili ua faaulu i luma o le maota,” o le isi lea saunoaga a Fialupe i taualumaga o le mafutaga faamasani ma faipule fou.

I le savalia ai o nofoaiga sosoo e 8 o avea pea le faletua ia Fialupe ma Failautusi o le maota o sui, sa ia taua ai lona fiafia tele i le tulaga sa i ai le faatasi atu o faipule fou i le latou mafutaga i le vaiaso nei, ma ua tulimata’i le vaai i le amataina ai o galuega masani a le fono i le vaiaso fou.

Mai faipule fou e toa 7 ua ulufale mai i le nofoaiga lona 33 lenei a le Fono Faitulafono, o le toa 4 o i latou nei o le taimi muamua lenei ua filifilia ai e avea ma faipule o latou itumalo, ae o le isi toa 3, sa avea muamua foi ma faipule a o latou Itumalo i isi nofoaiga ua mavae atu, peitai o lea ua toe filifilia.

O faipule fou e aofia ai Vui Florence Saulo; Talimatasi Elisara Su’a; Timusa Lam Yuen ma Lagee Mauga, o i latou ia faatoa filifilia mo le ulua’i taimi, ma i latou tuai e aofia ai Maugaoalii Leapai Sipa Anoai; Atualevao Gafatasi Afalava ma Fagaosaia Lealaitafea.

O le aso Lulu la na te’a nei na faia ai loa se mafutaga tuu faatasi a faipule uma o le maota o sui i totonu o le latou Fale Samoa, mo le talanoaina o tulaga i a latou komiti mo lenei nofoaiga.

Saunoa le Fofoga Fetalai, e le’i maea lelei le faataotoina o a latou komiti mo lenei nofoaiga, ae i ai le manatu atonu o le aso Lulu o le vaiaso fou e maea ai le vaevaeina o komiti ma taitai komiti, ma faalauiloa ai loa i luma o le maota.

Ina ua fesiligia le tofa Savali pe i ai ni suiga tele i komiti a le maota mai le nofoaiga na mae’a atu nei, na saunoa Savali, “e le tele naua ni suiga, ae o le a faatoa manino lava i se aso o le vaiaso fou.”