Ua fa’aalia e le Fa’atonusili o le Matagaluega o Aoga a le malo i se feiloaiga ma tusitala i le vaiaso nei, le atoatoa lea o sauniuniga a le matagaluega mo le toe amataina o lenei tausaga aoga fou mo le fanau aoga.

O vaega sa fa’amaonia mai e Vaitinasa Dr. Salu Hunkin-Finau ua atoatoa i ai tapenapenaga a le matagaluega, e le gata ua tapena faleaoga ma potu aoga mo le toe fo’i mai o le fanau, ae faapena fo’i i faiaoga, tagata faigaluega, pasi aoga, atoa ai ma le auaunaga i le polokalame o le School Lunch.

“Ua sauni le matagaluega o aoga mo le toe amataina o lenei tausaga aoga fou,” o le saunoaga lea a Vaitinasa ina ua fesiligia o ia e tusitala e tusa ai o le tulaga ua i ai tapenaga a le matagaluega o aoga.

O le aso 17 Aokuso, o le aso Gafua lea o le vaiaso fou ua fa’amoemoe e ripoti uma ai puleaoga i o latou ofisa mo le faatulagaina o a latou kalena mo le tausaga aoga, ao lumana’i ai le a’e mai o faiaoga uma i le aso 24 Aokuso, e fa’atali ai le a’e atu o fanau aoga i le aso Tofi, Aokuso 27 mo le amata aloaiaina o a latou aoaoga mo lenei tausaga.

Saunoa Vaitinasa e fa’apea, o le a faia se sauniga fa’apitoa e tatala aloaia ai le toe fo’i atu o faiaoga i a latou galuega masani, lea ua fa’amoemoe e faia i le taeao o le aso Gafua, 24 Aokuso, ma ua fa’amoemoe fo’i o lea sauniga fa’apitoa o le a auai ta’ita’i o le malo.

PASI AOGA

O se tasi o itu taua mo fanau aoga pe a toe a’e aoga, o le lelei lea ma lava pasi aoga e fesoasoani ai mo i latou i le taeao ma le taimi e tuua ai aoga.

O se tala fiafia e pei ona saunoa Vaitinasa, ua fa’aopoopo nei le aofa’i o pasi aoga mo le la’uina o fanau aoga i le 18, mai le aofa’i e 13 pasi e tapunia le tausaga aoga tuai o loo i ai, ina ua mae’a ona toe fa’aleleia pasi aoga e 5 sa tula’i mai ai ni fa’aletonu laiti, ma ua mautinoa le lelei atoatoa o pasi aoga ia mo le la’uina o fanau aoga.

I le tulaga o pasi aoga fou e 10 sa fuafua e tatau ona taunu’u mai i le amataga o le tausaga aoga lenei, na saunoa Vaitinasa e fa’apea, o loo tumau pea le okaina mai o pasi aoga ia, sei vagana ai nai suiga laiti ua mae’a ona toe faia i ai.

O ia suiga laiti e aofia ai le aumai na o pasi aoga e iva (9), fa’atasi ai ma Van e lua (2) ua fa’amoemoe e fa’aaoga mo aoga i Manu’a ma Aunu’u.

Saunoa le tama’ita’i fa’ataonusili e fa’apea, o le tupe lea sa fa’amoemoe e aumai ai le isi pasi aoga e atoa i ai le 10 pasi aoga, o lea ua fa’aaoga e fa’atau mai ai Van mo Manu’a ma Aunu’u, e lelei lea e talafeagai ma le aofa’i o tamaiti aoga o loo aooga ai i nofoaga nei e lua, ona e le talafeagai i ai se pasi aoga lapo’a.

O se tasi lenei o mataupu sa finauina malosi e le afiogai le ali’i Senatoa mai Saole ua tu’umalo, le afioga i le Maopu ia Saole Mila, o se pasi aoga poo se Van fo’i e la’u ai fanau aoga i totonu o Aunu’u.

SCHOOL LUNCH

O se tasi o tala fiafia ua mafai ona maua e le matagaluega, o le fa’aopoopoina lea o le vaega tupe o loo maua mai i le malo tele, e fa’atupe ai le polokalame o Taumafa mo fanau aoga (School Lunch Program) mo lenei tausaga aoga.

Saunoa Vaitinasa e fa’apea, e $19 miliona le tupe sa fa’atupe ai le polokalame o Taumafa mo fanau aoga i le tausaga aoga tuai, peita’i o le tausaga aoga fou lenei, ua oo atu i le $21 miliona ina ua fa’aopoopo e le malo feterale le isi $2 miliona.

O se tasi o vaega taua o le auaunaga a le polokalame o taumafa mo fanau aoga, sa mafai ai ona fafaga fanau aoga uma sa aofia i le polokalame a le susuga a Troy Poamalu ma lana au malaga, lea sa fa’atautaia le polokalame mo fanau aoga i le fa’aiuga o le masina o Iuni o lenei tausaga, e fesoasoani ai i le atina’eina o le ta’aloga Football i totonu o fanau aoga a le atunu’u.

ISI VAEGA TUPE

E lua isi vaega tupe fesoasoani o loo maua mai i le feterale ua mafai ona fa’amanuiaina ai le Ofisa o Aoga, e pei ona saunoa Vaitinasa.

O le vaega tupe muamua e aofia ai le $2.2 miliona lea ua maua mai mo le vaega a le ECE, i lalo o le ta’ita’iga a le tama’ita’i Fa’atonusili o lea Vaega ia Milaneta Tinitali ma lana aufaigaluega, aemaise ai o le vaega tupe e $1.2miliona mo le Vaega o Fanau e i ai manaoga fa’apitoa o le tino (SPED), lea fo’i ua mafai ona fa’amanuiaina ai le ofisa o aoga.

“O se lagona fiafia ina ua mafai ona maua mai lenei tala fiafia, e fa’afetai atu ai i Ta’ita’i ma tagata faigaluega uma o vaega a le Ofisa o Aoga ua fa’amanuiaina i ia vaega tupe, i lo latou galulue fa’amaoni i le tuuina atu o talosaga, lea ua mafai ai ona fa’amatuu mai nei vaega tupe e fesoasoani ai i le aoaoina o fanau aoga,” o le saunoaga lea a Vaitinasa.

Mo le Vaega a le SPED, o le isi vaega mulimuli o le vaega tupe e $4.8miliona ua fa’amoemoe fa’atoa fa’amatu’u mai i le masina o Oketopa, ma fa’agasolo ai lava lea o tautua a lea polokalame.