Ads by Google Ads by Google

SAUNI DAVID TUA E TOE FO’I I LE MAEA

O le masina o Tesema o le tausaga nei poo le amataga o le tausaga fou 2013, ua faalauiloa e le alii fusu ia David “Tuamanator” Tua, e tatau ona oo atu i ai ua toe sitepu i totonu o le maea mo le toe faaiilaina o lana taleni fusu.

I sana faatalatalanoaga ma le 3 News a Niu Sila i le vaiaso nei, na teena ai e Tua faamatalaga e faapea o ia ua litaea.

“Ou te le’i litaea, toe 3 i le 4 o’u tausaga o loo totoe i totonu o le maea faatoa ou litaea lea,” o le faamatalaga lea a Tua i luga o le 3 News a Niu Sila.

Sa ia taua foi i le isi ana faamatalaga e faapea, “se’iloga e faaletonu lo’u mafaufau ona ou vave litaea lea, ae o lea lava e totoe o’u aso e tele ou te toe fusu ai.”

Na taua e Tua, na mafua ona le toe vaaia o ia i totonu o le maea i nai taimi e lei mamao atu, ona sa i ai ni nai mataupu taua sa manaomia le ave atoa i ai o lona taimi e faamaea ai, ona faatoa toe foi ai lea i le maea.

Sa ia faailoa i le au faasalalau, o fusi e lua sa ia umia lea na se’i e le alii o Monte Barrett, ina ua tutusa le la fusuaga muamua ae faiaina i ai i le fusuaga lona lua, na mafua ai loa ona faia lana faaiuga e malolo mo sina taimi.

O le toe fo’i mai ai o Tua i le maea talu le taimi na toesea ai, na la feiloa’i ai loa ma le alii fusu a Niu Sila o Shane Cameron, ma ia faatoilaloina ai i le taamilosaga lona lua.

A’o le’i faia le fusuaga a Shane Cameron ma le alii o Monte Barrett i le masina o Iuni na te’a nei, lea na oti mataga ai Barrett ia Cameron i le taamilosaga lona fa, na folafola ai loa e Barrett lona faanaunauga o loo i ai e fia faia sa la fusuaga lona tolu ma Tua.

I lana faamatalaga na faasalalau i luga o le TV3 a Niu Sila, sa ia faia ai ni folafolaga mamafa ma le mataga faasaga ia Tua, fai mai o Tua ua lapo’a, paie ma ua le toe aoga ona toe fusu.

Sa ia folafola foi lona faatoilaloina o Tua pe afai e faataunuu le la fusuaga lona tolu, peitai na faailoa e Tua ia Barrett, o ia e le o se tagata lapo’a, ae o ia o se tagata e faigofie ona iloa.

E lei faailoa e Tua pe ua ia taliaina le lu’i a Barrett mo se la fusuaga lona tolu, na pau le itu sa folafola e Tua ao lei faia le fusuaga a Barrett ma Cameron, e oti mataga Barrett ia Cameron, ma o lea folafolaga sa sa’o ma taunuu lelei, ina ua oti Barrett ia Cameron i le taamilosaga lona fa o le la fusuaga sa faia i Niu Sila i le masina o Iuni, ma ua umia nei e Cameron fusi e lua sa se’i mai e Barrett ia Tua.