Ads by Google Ads by Google

Sauni Carmen Hunkin e tali ioe i tu’uaiga a le malo

O le tina talavou lea o loo tu’uaia e le malo i lona faia lea o ni uiga mataga fa’afeusuaiga i se tamaititi e i lalo o le 16 tausaga le matua, ua ia sauni e ta’utino i le fa’amasinoga e fa’amaonia tu’uaiga fa’asaga ia te ia, i lalo o se maliliega lea ua mae’a ona latou sainia ma le malo ma ua mae’a fo’i ona faila i luma o le Fa’amasinoga Maualuga i le vaiaso nei.

 

E 5 moliaga eseese o loo tu’uaia ai e le malo ia Carmen Hunkin, ona o le fa’alavelave lea na tula’i mai i le va o Oketopa 2013 ma Iulai 2014, lea o loo tu’uaia ai o ia sa la faiaiga ma le ali’i e igoa ia “J.A” e 16 tausaga le matua, e pei ona taua i fa’amaumauga a le fa’amasinoga.

 

O moliaga eseese e 5 o loo tu’uaia ai Hunkin e aofia ai le faiaiga ma se tamaititi e talavou i lalo o le tulafono; faia o uiga fa’asotoma; faia o gaioiga fa’afeusuaiga; tagofia o itutinosa o se tamaititi e le fa’aipoipo i ai i le tulaga muamua, ma le moliaga mama e tasi o lona faia o ni gaioiga e ono lamatia ai le saogalemu o fanau laiti.

 

E tusa ai ma fa’amaumauga a le fa’amasinoga, o le mataupu lenei na tofu atu i le Ofisa o Leoleo, ina ua faila e le tuafafine o le ali’i na a’afia sana tagi i le ofisa o leoleo, ina ua masalomia le i ai o se mafutaga i le va o lona tuagane ma le ua molia.

 

Na taua e le tama’ita’i lea i leoleo e fa’apea, i tausaga ua mavae, sa o ‘A’ lava e maua atu i le ripoti a lona tuagane, peita’i talu mai suiga ua vaaia ia te ia e pei o le sola ese ma le aiga, ua avatu ai lana ripoti e na o ‘D’ ma ‘F’ o loo tusi atu ai.

 

Ina ua fesiligia e leoleo ni isi o molimau e aofia ai ma Hunkin, sa taua ai e molimau i leoleo lo latou vaaia o Hunkin o fai’aiga ma le ali’i na a’afia i le fale a le ua molia.

 

Sa faamaonia fo’i e Hunkin i leoleo le la faiaiga ma le ali’i o “J.A” mo le tele o taimi, sa ia iloaia fo’i e na o le 16 ona tausaga.

 

I le maliliega lea ua mae’a ona sainia e Hunkin ma le malo, ua ia malie ai e tali ioe i le moliaga o lona tagofia lea o itutinosa o se tamaititi e le fa’aipoipo i ai.

 

O loo taua e Hunkin i le maliliega lea ua mae’a ona latou sainia ma le malo e fa’apea, i le va o Oketopa 2013 ma Iulai 2014, sa la faia ai ni uiga mataga fa’afeusuaiga e ala i lona tagofia o itutinosa o “J.A”, ona o le fa’anaunauga ia fa’amalie ai lagona tu’inanau sa ia te ia.

 

O loo ta’utino Hunkin i totonu o le maliliega aufa’atasi e fa’apea, sa ia iloaina lelei lava e na o le 16 tausaga o “J.A”.

 

I faamaumauga a le fa’amasinoga, na taua e Hunkin i leoleo e faapea, sa i ai le taimi sa ia taumafai ai e fa’amuta le la mafutaga ma “J.A”, peita’i sa fai atu le ali’i ia te ia, o le a ia pule i lona ola pe afai e fa’amuta le la mafutaga.

 

Ua sauni le malo e talosaga i le fa’amasinoga, ina ia solofua isi moliaga e fa o loo totoe i le pepa o tagi sa latou fa’aulu fa’asaga ia Hunkin, pe afai ae talia e le fa’amasinoga le tali ioe ai le ua molia i le moliaga lona fa o loo i le pepa o tagi sa latou fa’aulu.

 

Ua malilie itu e lua e finau i le fa’amasinoga mo se fa’asalaga fa’anofovaavaaia mo Hunkin, peita’i ua malamalama lelei le ua molia, tusa lava pe finau loia i le fa’amasinoga mo se fa’asalaga mama mo ia, e pule le fa’amasinoga pe talia pe teena ia fa’afinauga.

 

O lo o taofia pea Hunkin i le toese i Tafuna ina ua le mafai ona ia totogiina le $20,000 sa fa’atulaga e tatala ai o ia, e fa’atalitali ai taualumaga o lana mataupu lea o loo faagasolo pea lava i luma o le fa’amasinoga maulauga i le taimi nei.