Ads by Google Ads by Google

Sauni Ausiisii Uamea mamafa mo le Oceania

Ua sauni atu nei le Asosi Siisii Uamea mamafa a le atunuu mo le auina atu o lana au e tausinio i le taamilosaga a atumotu o le Pasefika (Oceania), lea e faia i Niu Kaletonia i le aso 26-31 Me 2014.

 

O le taamilosaga a le Oceania lea e faia i Niu Kaletonia, o le a tuu faatasi ai ma le taamilosaga a Tupulaga Talavou (Youth Competition), ma o le faamoemoe ua faatulaga i lea taamilosaga, o tupulaga talavou e manuia a latou taumafaiga i le taamilosaga a le Oceania mai atunuu eseese, e maua le avanoa e tausinio ai i le taamilosaga a le Youth Olympics lea e faia i Saina i le tausaga fou.

 

O le taamilosaga a le Oceania na faamoemoe e tali malo ai Samoa i le tausaga nei, ae ua toe suia i Niu Kaletonia ina ua tuuina atu se fautuaga mai ta’ita’i o le malo o Samoa, o le a le avanoa i latou mo le faatinoina o lea talimalo, ona o le fonotaga faavaomalo a malo Aufaatasi lea ua faamoemoe e usuia i Samoa i le ogatotonu o le tausaga nei.

 

I se faatalatalanoaga ma le faiaoga o le ausiisii uamea mamafa a le atunuu ia Lopesi Fa’agu, sa ia taua ai le pisi o le Asosi i le tapenaina o sana au e auina atu i taaloga a le Oceania, faatasi ai ma le tapenaina o tupulaga talavou ia ausia le maualuga e tatau ona oo i ai le sii, ina ia agavaa ai e tausinio i le Youth Olympics i Saina i le tausaga fou.

 

“O le taimi nei o lo o faagasolo pea koleniga a le au i le vaega o alii ma tamaitai, e ta’ilua lava vaiaso ma faia a matou suega ina ia faamautuina ai le tulaga maualuga ma le malosi ua oo i ai sii a tamaiti, ma le faamoemoe o le masina o Aperila e faia ai le suega faai’u ma fili ai loa le au e fai ma sui o le atunuu i le Oceania,” o le saunoaga lea a le susuga Fa’agu, o se tasi sa fai ma sui o Amerika Samoa i taaloga siisii uamea mamafa i taamilosaga eseese i le lalolagi i tausaga ua mavae.

 

O lo o maualuga le vaai a le Asosi i le au a tamaitai, o le a maua mai ai nisi pine mo Amerika Samoa i le Oceania, pe a fuafua i le tulaga lelei ua i ai a latou taumafaiga i le taimi nei, ma le tulaga o lo o i ai le maualuluga o sii a tamaitai o lo o tauva i aupaga eseese o lo o tausinio ai i latou nei.

 

E pei ona silafia, o le tausaga na tea nei na ulua’i tauva ai ni tamaitai i taaloga siisii uamea mamafa mo Amerika Samoa, ma faamanuiaina ai le tamaitai e toatasi mai le toalua sa tausinio i ni pine.

 

O le tamaitai o Tempo Fuimaono na ia maua le pine siliva ma le pine apamemea i le taamilosaga a Tupulaga Talavou sa faia i Ausetalia i le tausaga na te’a nei.

 

“O le tausaga lenei ua toalima tamaitai ua auai i koleniga o lo o faia, ma o lo o i ai le faanaunaugataiga e talia pea nisi tamaiti e fia tausinio i lenei taaloga i le vaega o alii ma tamaitai,” o le saunoaga lea a Fa’agu.

 

I le vaega o alii, o lo o tumau pea ni isi o sui tuai o le au e pei o le susuga ia Apineru lea o lo o tausinio i le vaega o le 105+ kg; o Tanumafili Jungblut lea o lo o tausinio i le aupaga o le 94 kg; o le susuga ia Ah Su lea o lo o tausinio i le 83 kg, ma le isi sui fou o le au ia Malaki Sitagata lea o lo o tauva i le vaega o Tupulaga talavou i le aupaga o le 105+ kg.

 

“O le isi faamoemoe taua o lo o matou taumafai atu i ai, a manuia le taumafaiga a le tatou au mo le Oceania, lona uiga o le a lelei fo’i sa tatou taumafaiga mo taaloga a le Pasefika lea e faia i Papua Niu Kini i le tausaga fou,” o le isi lea saunoaga a Fa’agu.

 

E pei ona silafia, o Amerika Samoa na pine auro silia i le taamilosaga a le ‘South Pacific Games’ sa faia i le 1991, lea e 6 pine auro, 4 pine siliva ma pine apamemea e 3, ae o le au lea sa fai ai tamaiti sa soifua a’e i Samoa ae sa aumau i Amerika Samoa nei ma sui o le atunuu, ae o le suiga lea ua i ai le taimi nei i soo se taaloga i le Pasefika, e le o toe taliaina le taalo o le isi tagata i le isi atunuu, se’i vagana ai lava le atunuu na soifua mai ai.

 

“O le faanaunauga maualuga a le Asosi o lo o i ai, ia toatele ni tama fanau a Amerika Samoa e taaalo i le taaloga siisii uamea mamafa, ina ia mafai ai ona toe ausia le matati’a na ausia e le au a le atunuu i le 1991, a’o fai nai uso mai Samoa ma sui o Amerika Samoa,” o le saunoaga lea a Faagu.