Ads by Google Ads by Google

Sauni Aufusu Amerika Samoa puipui le Ipu Palemia o lo o latou umia

Ua sauni atu nei le aufusu a Amerika Samoa e puipui lona tulaga siamupini i le Ipu a le alii Palemia (Prime Minister’s Cup) o lo o latou umia, i le taamilosaga o fusuaga lea o le a faia i Apia i le faamanatuina o le 51 tausaga o le sisigafu’a a Samoa Tuto’atasi.

 

I se faatalatalanoaga ma le faiaoga o le aufusu a Amerika Samoa, le afioga Toleafoa Henry Tavake, sa ia faamaonia mai ai i le Samoa News le sauni o le aufusu e to’alima a le atunuu e puipui le latou tulaga siamupini.

 

“Ua matou sauni,” o le saunoaga lea a Toleafoa ina ua fesiligia e le Samoa News i tulaga ua i ai a latou tapenapenaga.  “E toalima le au lea ua faamoemoe e auina atu i Samoa mo le puipuiina o le Ipu a le Alii Palemia, faatasi ai ma le tama fusu e toatasi lea ua alo atu mo lana fusuaga faapolofesa lona lua, ma o ia taaloga e faataunuuina uma i Apia i le aso o le fu’a a Samoa”.

 

O le aufusu e toalima ua sauni atu nei mo Apia o lo o aofia ai alii e toafa ma le tamaitai o Onolina Viliamu.

 

O Viliamu na aofia i le aufusu lea na auina atu i Samoa i le masina o Iuni o le tausaga na te’a nei ma fo’i mai ai ma le Ipu a le alii Palemia ina ua toilalo ai le tamaitai fusu a Samoa.

 

E to’aono le aofa’i o le aufusu a Amerika Samoa na malaga i Samoa i le tausaga na tea nei na manumalo mai ai i le Ipu a le alii Palemia, ina ua manumalo i paga e 4 ae 2 paga na faiaina.

 

O isi sui o le au sa malaga i Samoa na manumalo e aofia ai Sililo Sokimi, Toetu Auomanu ma Imo Aieti, ae o le toalua e le’i faamanuiaina a la taumafaiga e aofia ai Toefuaina Faileaso ma Sione Lefao.

 

O le aufusu e toalima o le a malaga i Samoa o le a tausinio i fusuaga faa ‘amateur’ ae o le isi toatasi o le a tauva i fusuaga faapolofesa, o le susuga lea ia Alapasi Aasa.

 

O Aasa na ulua’i fusu faapolofesa i le taamilosaga sa faia i Samoa i le masina o Iuni 2012, ma faiaina ai ia Saipeti Asiata o Samoa i se fusuaga finau ma le mataina, peitai e ui i lea faiaina na taua e Toleafoa e faapea, o lo o tele le lumana’i o Aasa e manumalo ai i isi ana fusuaga o lo o lumana’i nei.

 

O tapenaga a le aufusu mo le sauni atu i Samoa o lo o faia i le nofoaga fou lea ua fausiaina e le Asosi o Fusuaga, i totonu o le VA Stadium i Tafuna.

 

Na faamaonia mai e Toleafoa e faapea, o se tasi o fale ua silia ma le 17 tausaga talu ona fausia i totonu o le stadium ae le  o faaaogaina lava, ua faaaoga e Toleafoa e fausia ai le maea fusu mo koleniga a le au fusu a le atunuu, ae o le isi itu o le fale ua tuuina atu i le Asosi o Piiga a Amerika Samoa e faaaoga i a latou koleniga e pei ona faamaonia mai e Toleafoa.

 

“E le mafai ona atina’e ma faaleleia le taleni fusu a tamaiti pe afai e leai se nofoaga e faatinoina ai a latou tapenaga,” o le saunoaga lea a Toleafoa.

 

O le nofoaga tuai sa avea ma Ofisa o Fitafita Tuai i Tafuna na faaaoga e le Asosi Fusu e faia ai a latou fusuaga i tausaga ua mavae.

 

O le vaiaso nei na faalauiloa mai ai e le Asosi o Fusuaga a Samoa (Samoa Amateur Boxing Association (SABA) le sauni o le latou aufusu e lu’i le Ipu a le alii Palemia o lo o umia e Amerika Samoa, i le taamilosaga lea ua faatulaga mo le taimi tonu o le sisigafu’a o lenei tausaga.

 

Na taua foi i lea ripoti le galulue faatasi o le SABA ma le Faalapotopotoga o lo o faalauiloaina Fusuaga Faapolofesa i le Pasefika (South Pacific Boxing Incorporated - SPBI) mo le tuu faatasia o le ulua’i taamilosaga o fusuaga faapolofesa i Samoa i le aso 31 Me, 2013, lea e sosoo ma le aso e faamanatuina ai le 51 tausaga o le Tuto’atasi a Samoa.

 

O le amataga o le masina fou lea ua faamoemoe e faalauiloa mai ai loa paga mo lea taamilosaga, lea foi ua faamoemoe e taualuga i le fusuaga i le va o le siamupini a Samoa i le aupaga mamafa, susuga ia Vaitele Soi ma le sui mai Fiti e le’i faalauiloaina mai i le taimi nei mo le fusi o le Pasefika i Saute i le paga mamafa.