Ads by Google Ads by Google

Sauni 'Au Volipolo a le Fiafia Youth ...

i le Fu’a Samoa

E ui e le 'ese mai le ta'amilosaga Volipolo lea o le a faia i Apia i le masina fou mai isi ta'amilosaga masani, peita'i e mafua ona tulaga 'ese ona o le ta'amilosaga lea o le a fa'amanatuina ai le 50 tausaga o le fu’a a le  malo o Samoa, lea fo'i ua tulimata’i i ai le va'ai a le kalapu a le Fiafia Youth ina ia fai so latou sao, ma ia fo’i mai ma le manumalo.

E ui i le tele o 'au volipolo na vala'aulia mai e le Asosi Volipolo a Samoa ina ia malaga atu e fai so latou sao i lo latou aso fiafia, peita'i e na o le kalapu lava a le Fiafia Youth o le a malaga.

O le 'au volipolo ua fa'amaonia le malaga i le fu’a a Samoa e aofia ai 'au voli e lua i vaega o ali'i ma tama'ita'i mai le Fiafia Youth mai Nu’uuli, lea fo'i na o latou mauaina le siamupini i le Ta'amilosaga o le Fu’a ma le Liki a le Islandwide Volleyball Association i le masina na te’a nei.

Na ta'ua e le faia'oga o le 'au volipolo i le vaega o ali'i a le Fiafia Youth, e le o se taimi muamua lenei ua latou malaga atu i ni vala'aulia mai Samoa, ma o lo latou fa'amoemoe fo'i e pei ona tapena atu i ai, ua matua sauni lava 'au e lua e malaga atu i Samoa.

ìE tele vala'aulia na tu'uina mai i Samoa mo 'au volipolo i Amerika Samoa nei, peita'i e na o le Fiafia Youth lea ua fa'amaonia le malaga e tali i lea vala'aulia, ma ua sauni fo'i 'au a ali'i ma tama'ita'i mo lenei fa'amoemoe,î o le saunoaga lea a Alapati Tiatia, o ia lea o le faia'oga o le 'au a ali'i a le Fiafia Youth.

Na ta'ua e Tiatia, o se tasi o itu taua o lenei fa'amoemoe, o le a mafai ai ona fa'alautele le tomai ma le iloa o tama ma teine i le ta'aloga volipolo, ae maise ai o le avanoa lelei lea e feiloa'i ma fa'amasani ai ma isi fo'i tagata ta'alo i lenei ta'aloga.

O le aso 27 o Me lea ua fa'amoemoe e malaga atu ai 'au volipolo a le Fiafia Youth mo lenei fa'amoemoe.

O le susuga Junior Soli o ia lea o le faia'oga o le 'au a tama'ita'i, ma le susuga i le ali'i faife'au ia Rev. Luao Soli, o ia lea o le fa'atama a le kalapu.