O le aso Gafua o le vaiaso fou e tuua ai e le au taitoa 7 a Samoa le atunuu mo le faamoemoe e auai i le ulua’i taamilosaga taitoa 7 a le HSBC Sevens World Series, lea o le a faia i Sini i Ausetalia i le aso  13-14 Oketopa, o le vaiaso fou lea.

E 5 suiga fou o le au ua maea ona faalauiloa mai e le alii faiaoga, susuga Tausa Faamaoni Lalomilo i se pepa o faamatalaga na tuuina mai i vaega faasalalau a Samoa i le vaiaso nei, ma o i latou ia e aofia ai Lio Lolo, Faleniu Iosi, Tulolo Tulolo mo le laina i luma, ae o Patrick Faapale ma Phillip Tuigamala i le laina i tua.

Ao lei tuuvaa ese atu le au a Samoa e tausinio i lenei faamoemoe, na momoli atu ai e le alii palemia o le malo, o ia foi lea o le taitaifono o le Iuni Lakapi a Samoa, susuga Tuilaepa Sailele Malielegaoi upu faalaeiau ma upu faamalosi, e faamalosia ai loto o le au ina ia finau ma i le manumalo.

I ni ripoti mai Samoa, sa taua ai e Tuilaepa i le au a le atunuu le tatau lea ona televave i le polo i taimi uma, ma ia mataalia i soo se gaioiga latou te faia ina ia taofia ai le tulai mai o mea sese i taimi o a latou taaloga.

Fai mai Tuilaepa, e le tatau i le au ona latou faatinoina ni gaioiga le fetaui poo le faia foi lea o ni aga e le tusa ai ma tulafono o le taaloga, leaga o loo maua uma atu e mea pu’eata atoa ai ma le atunuu o loo maimoa atu.

Sa ia fautuaina tama o le au ina ia taumamao mai le aafia i ni gaioiga e le tusa ai ma tulafono o le taaloga, atoa ai ma le taumamao lea mai nisi aafiaga i tua atu o le malae.

Na taua e le alii faiaoga o le au ia Tausa e faapea, o le au ua filifilia nei o loo faafefiloi ai tama tuai ma tama fou ua lava lo latou tomai i le faatinoina o le taaloga.

E ui ua toatele nisi o le atunuu i Samoa ma Amerika Samoa nei e fiafia i le taaloga lakapi, ua amata ona lusi lo latou fiafia ina ua le toe faalogoina nisi i igoa lauiloa i le lisi o le au e pei o Lolo, Uale, Ofisa, Pesamino ma Alafoti, ae na taua e Tausa e faapea, o le au ua filifilia nei ua atoatoa ma lava tapena mo le uluai vae o le taamilosaga o lenei tausaga.

O Samoa o loo faatulaga mai i le Pool C ma England, Kenya ma Spain.

O le aso Toona’i o le vaiaso fou i le itula e 10:52 i le taeao (taimi Ausetalia), ae o le 1:52 i le aoauli (taimi Samoa), o le a taaalo ai Samoa ma Spain, sosoo ai le taaloga lona lua ma Keyna i le 13:58 i le aoauli (taimi Ausetalia), tusa lea o le 3:58 aoauli (taimi Samoa), ae faaiu i le taaloga ma England i le 18:40 i le aoauli (taimi Ausetalia), tusa lea o le 7.40 i le afiafi (taimi Samoa.

I le faatulagaina o Pool o le taamilosaga, o au o loo i ai i le Pool C lea e aofia ai Samoa, e ui agai i au o loo i le Pool B lea e aofia ai Fiti, Ausetalia, Sikotilani ma Tonga.

O le Pool A o loo i ai NZ, Aferika i Saute, USA ma Kanata, ma le Pool E o loo i ai Argentina, Wales, France ma Portugal.

O le taamilosaga a le Australia Gold Coast sa siaupini ai le au mai Fiti i le tausaga nei, ma ua faamoemoe o le a sauni atu foi le au malosi mai Fiti mo le puipuiina o lona tulaga siamupini.

O le faamoemoe maualuga o le alii faiaoga ma le pulega o le au, ia lava tapena tama taaalo mo le taamilosaga o le Ipu a le lalolagi i le taitoa 7, lea ua faamoemoe e faia i le masina o Iuni o le tausaga fou i le aai o Moscow.

Lisi o le au: Afa Aiono, Faalemiga Selesele, Levi Asi Faamatala, Lio Lolo, Faleniu Iosi, Tulolo Tulolo, Alatasi Tupou, Taulagai Afamasaga, Robert Lilomaiava, Patrick Faapale, Tom Iosefo ma Phillip Tuigamala. Faiaoga: Tausa Faamaoni Lalomilo.