E le o toe mamao se taimi e filiina loa le ulua’i ‘au ta’ito’a 15 faavaomalo a Amerika Samoa, mo le faamoemoe e tausinio i le taamilosaga taitoa 15 a le Oceania lea e faia i Papua Niu Kini i le aso 3 Iulai 2013, e pei ona faamaonia mai e le Taitaifono o le Iuni Lakapi a Amerika Samoa (ASRU), le afioga i le matua ia Togiola Tulafonno.

O lea mataupu na faalauiloa e Togiola i le po na tatala aloaia ai le taamilosaga taitoa 7 a le TMO Marist Pago 7s, i se ‘aiga sa faia i le Fale Laumei i Utulei i le po o le aso Tofi, Aperila 11, 2013.

Na taua e Togiola e faapea, o le tulaga taua o le taamilosaga lea o le a auina atu i ai le au taitoa 15 a le atunuu, afai ae manumalo mai ai, lona uiga ua maua le avanoa e taaalo ai ma le au malosi a Fiti, e saili ai se ‘au e ofi atu i le Ipu o le Lalolagi i Enelagi.

“Ina ua ou vaai i le lisi o ‘au o le a taalo ma Amerika Samoa i le taamilosaga a le Oceania i Papua, sa ou fiafia ina ua ou le vaaia le igoa o Samoa ma Tonga i le lisi o au o le a taalo ma Amerika Samoa,” o le saunoaga lea a Togiola.

O ‘au la mai le Pasefika o lo o totoe ai i le lisi o ‘au o le taamilosaga, o ‘au ia sa masani ona manumalo ai Amerika Samoa e pei ona saunoa Togiola.

I le taumafai ai e atina’e le lakapi i Amerika Samoa na taua ai e Togiola e faapea, o se tasi o faafitauli o lo o feagai ma le Iuni, o le taumafai lea e faatosina fanau i le lakapi, ona o le toatele o i latou e fiafia i le taaloga Football a Amerika, o ni isi foi o i latou e fiafia i le taaloga o le soka e faigofie ona faataunuu.

I le au taitoa 7 a le atunuu na auina atu i le taamilosaga a le Oceania i Ausetalia i le tausaga na tea nei, sa le mafai ai ona auina atu ni isi o tama lakapi lelei sa tatau ona i ai i le au, ona o ni isi o faafitauli e pei o le le mafai lea ona maua ni faanoi mai a latou galuega.

Na faailoa e Togiola i le aofia sa auai i le ‘aiga e faapea, o le faafitauli na mafua ai ona le mafai ona auina tama lelei i le au a le atunuu, e leai se tupe a le Iuni e totogi ai a latou alauni, e le gata i lea, e le mafai foi e le Iuni ona faamalosi kamupani mo ni livi a i latou nei.

E talitonu le Samoa News, o ni isi o i latou nei sa galulue i le kamupani a le Star Kist Samoa Inc.

“O ni isi o tama taaalo nei sa faafefe e a latou kamupani, afai e o i le au lona uiga o le taimi lava e toe foi mai ai e le toe maua se avanoa e galulue ai i le kamupani, o le mafuaaga lena na ave ai le ‘au fili na malaga e aunoa ma ni isi o tama lelei o le ‘au,” o le saunoaga lea a Togiola.

E le gata i le au taitoa 7 ae faapena foi i le au a tama aoga e i lalo o le 19 tausaga le matutua sa auina atu i Samoa, o le faafitauli lava foi lea e tasi na latou faafeagai, o le le lava o le tupe toe le avanoa ni isi o tama taaalo.

Ae ui i le tulaga faaletonu sa fetaiai ma le au taitoa 7 sa auina atu, peitai sa mafai lava ona faatoilalo e Amerika Samoa ia le ‘au mai Tonga lea na avea ma siamupini o lea taamilosaga i ‘ai e 14-7.

Fai mai Togiola, e ui i le manumalo ai o Tonga i le taamilosaga lea, peitai e na o le tasi lava le latou faiaina sa i ai, e na o le faiaina mai ia Amerika Samoa.

Ua lua taamilosaga a le Oceania ua mafai ona faatasi atu i ai le au taitoa 7 a le atunuu, le Talavalu, ma o ia taamilosaga o lo o tumau ai pea le Talavalu i le tulaga 6. O le taamilosaga a le Oceania i le 2011 sa faia i Samoa, na faiaina ai le Talavalu i le ‘au mai Cook Island i le sailiga o le tulaga 5 ma le 6 i ‘ai e 7-12, ae o le tausaga na te’a nei na faiaina ai ia Papua Niu Kini i ‘ai e 21-24.

I le tausaga e 2011 na siamupini ai Samoa ina ua faiaina ai Fiti i le sailiga o le siamupini, ae o le taamilosaga o le 2012 na siamupini ai Ausetalia ina ua faiaina ai Samoa i le sailiga o le siamupini.

Na faafetaia e Togiola le susuga ia Frank Gaisoa ma le kamupani a le Tautua Mo Oe (TMO), ona o le latou lagolagoina malosi o le taaloga lakapi taitoa 7 mo le lona lua lenei o tausaga.

Na faaoloolo maau Togiola i le aufai pisinisi i le atunuu, ina ia talia le talosaga a le Iuni lakapi a Amerika Samoa o le a tuuina atu i se taimi o i luma, mo sa latou fesoasoani e auina atu ai ‘au a le atunuu i taamilosaga a le Pasefika i se taimi o lenei tausaga.

Na faatepa e Togiola le aufai pisinisi i le tulaga mataina ua i ai le sao o le lakapi i le tamaoaiga o le malo ma pisinisi i Samoa i le taimi nei, ona o le lelei o le faalauiloaina o fuafuaga a le Manu Samoa, e le gata i le taitoa 7 ae faapena foi i le taitoa 15.

O le faafitauli na feagai ma le Iuni lakapi a le atunuu i le tausaga na te’a nei e pei ona saunoa Togiola, e le’i lava le tupe na maua e auina atu ai ‘au a le atunuu i taamilosaga sa faia i Samoa ma Ausetalia, ma avea ai le le lava o le tupe na itu na afaina ai ma taumafaiga a ‘au sa auina atu, ona ua le mafai e le Iuni lakapi ona totogi alauni o tama taalo.

Fai mai Togiola, afai e tutu faatasi le aufaipisinisi e lagolago le atina’eina o soo se taaloga i le atunuu e pei o le lakapi, o le a manuia le tula’i mai o alo ma fanau a le atunuu i le lumanai i soo se taaloga.

I le saunoaga a le alii kovana sili ia Lolo, sa ia toe faatepa ai le tulaga sa i ai le taaloga lakapi i tausaga e tele ua mavae, ma le suiga ua i ai lenei talutalu fou.

Saunoa Lolo e faapea, o le taaloga lakapi i tausaga ua mavae, e tasi lava le mea na autu i ai o le faatautino poo le faaaliali o le malosi, peitai o le taimi nei ma suiga ua i ai le lakapi, e tolu mea taua ua tulai mai ai, e le gata o le malosi, o le loto atoa ai ma le mafaufau.

Na faafetaia e Lolo le afioga i le matua ia Togiola, i lona tula’i mai lea e siitia le taaloga lakapi i Amerika Samoa i le isi laasaga e pei ona i ai i le taimi nei, ma ia folafola ai lona faia o gaioiga uma ina ia mautinoa ai e tula’i mai le malo e lagolago le atina’eina o ituaiga gaioiga faapenei i le atunuu.