E ui i le tulaga pagatia o lo o i ai le tamaoaiga i le taimi nei, ma le maualuga o le tau o le soifua ua i ai, e le o avea lea ma itu e taofia ai matua mai le ave o le faamuamua i faatauga mo alo ma fanau, a’o agai atu i le faamanatuina o le latou Aso Sa Pa’epa’e i le faaiuga o le vaiaso nei.

“E tiga lava le tele o mea fai i lenei taimi, ae ua ma manatu lava e faaalu tupe e faatau ai ofu mo si a ma fanau mo le lotu tamaiti i lenei tausaga,” o le saunoaga lea a le susuga Viliamu Logofaatasi ina ua fesiligia e le Samoa News i le taeao ananafi, a’o pisi ai ma le tina o le aiga i faatauga a tamaiti.

O isi matua na fesiligia e le Samoa News i tulaga o a latou tapenaga mo le lotu a tamaiti i lenei tausaga, sa latou taua “Pau lava lenei o le aso mo nai fanau, o a uma mea lelei e tatau ona fai, ia tatou faia mo i latou, e pei foi ona o latou faia mea uma e mananao ai tatou o matua i aso uma o le olaga,” o le tala ata lea a le susuga Filisi Lagafuaina, ao pisi ai ma nai ona alo e toatolu i le faiga o le latou faatau ananafi.

Na taua e le tamaitai faatauoloa o Iuliana Fepulea’i-Atoa o le faleoloa o le Gifts Shop i Tafuna e faapea, e le o toe tutusa lava le pisi o faatauga i vaitau nei o le lotu a tamaiti i tausaga ua mavae.

I le silia ai ma le 15 tausaga o avea Iuliana ma faatauoloa i faleoloa eseese i le teritori, o lana molimau i aso faapitoa faapenei, o le taimi lenei ua matua pisi matua i le faiga o faatauga a fanau, ua tele foi oloa e pei o lavalava, seevae ma isi lava ituaiga oloa ua alu ma taulia.

“O lea ua toe tolu aso oo i le lotu tamaiti ae o lenei lava e tau leai ni matua e o mai e faatau, atonu o le utiuti o le faasoa i lenei taimi ua mafua ai,” o le molimau lea a Iuliana.

O nisi o faipisinisi Asia o lo o i ai a latou pisinisi i le taulaga i Fagatogo na fesiligia e le Samoa News, sa latou taua le feololo o le pisi o faatauga i lenei tausaga, e le tutusa ma le pisi sa i tausaga ua mavae.

Na taua e le susuga Livisitone Amituana’i, o se Faiaoga Aoga Aso Sa mai le Ekalesia Faalapotopotoga a Iesu i Aua, “O tala faatino o loo matou faatinoina i lenei tausaga, o tala masani lava mai le Tusi Paia e faatatau i galuega a Iesu i le lalolagi, o le agaga autu, ia mafai ona toto le fatu o le avea ma Soo mo Iesu i loto o tama ma teine ao laiti i latou, ina ia matutua ane ua malamalama ma mulimuli i ai,” o le saunoaga lea a Amituana’i.

E lua ni ekalesia o lo o faamoemoe e faataunuu ni a latou polokalama, e manatua ai alo ma fanau na maliliu i le galulolo ia Setema 2009.