Ads by Google Ads by Google

SAUNI ‘TALAVALU LAITI’ TAU LE TAUA I LE APIA PARK

O ananafi na tuuvaa ese atu ai le au fili a tama aoga i lalo o le 19 tausaga le matutua, le Talavalu Laiti, mo le tauina o le taua i le taamilosaga a le Oceania U19’s Championship, lea o le a tali malo ai Samoa mo le lua vaiaso i le malae o le Apia Park Stadium.

E ui o le faalua ai lea ona ofi atu se au fili a tamaiti aoga e i lalo o le 19 tausaga le matutua mai si o tatou atunuu nei, e tausinio i taamiloaga a le Pasefika, e le o avea lea ma itu e taofia ai le taula’i o le vaai a le tatou i le avanoa e mafai ai ona avea i latou ma siamupini o le Pasefika i se aso o i luma.

O le taamilosaga ua faamoemoe e amata i le aso 26 Novema, o le aso Gafua lea o le vaiaso fou, ae maea i le aso 6 Tesema 2012, ma o alii talavou ua filifilia i le tatou au fili, o i latou ia o le a tauina le taua mo Amerika Samoa.

O le taamilosaga lenei a le Oceania U19, o se tasi lea o polokalame o lo o i lalo o le faamalu a le Faalapotopotoga o Iuni Lakapi i le Pasefika, le Federation of Oceania Rugby Unions (FORU), lea o lo o unaia ai le atina’eina o le taaloga lakapi i atunuu o le Pasefika.

I se faatalatalanoaga ma le alii faiaoga o le au a tamaitai aoga, susuga Jerry Chang a’o le’i tuua le atunuu i le aso ananafi, sa ia taua ai le maualuga o lona talitonuga, ua lava tapena le au a le atunuu mo le taamilosaga.

Saunoa Chang, ua tolu masina talu ona tuu faatasia le au, ma e ui o le toatele o tamaiti o le au o le uluai taimi lenei ua taaalo lakapi ai, peitai o le tomai na o latou maua mai i taimi ao taalo i au Football a aoga i le atunuu, ua fesoasoani malosi lea i a latou tapenaga.

“I le vaavaai atu i ai i a matou tapenaga ao taumafai e tuu faatasia lenei faamoemoe, ua atoatoa ai se talitonuga ia te au ma lou fesoasoani, o le a maualuga se tulaga e oo i ai le taumafaiga a le tatou au fili i lenei faamoemoe,” o le saunoaga lea Chang.

O le toatele o tamaiti o le au na soifua mai i Amerika Samoa nei, sei vagana ai se vaega toaititi e malaga mai fafo, e pei o le alii mai Tonga e toafa, toatolu mai Upolu ma le toatasi o se alii Initia/Samoa.

E 6 au o lo o auai i lenei taamilosaga lea e pei ona vaevaeina ai i pool e lua. O au e 6 e aofia ai Samoa; Amerika Samoa ma Vanuatu i le Pool A, ae o Tonga; Papua Niu Kini ma Solomona i le Pool B.

I se pepa o faamatalaga na tuuina mai i le Pulesili o le Iuni Lakapi a Samoa, susuga Fred Amoa, sa ia faafetaia ai le FORU ona o le avanoa ua mafai ona tuu atu ia Samoa latou te faatautaia ai lenei taamilosaga.

Na taua e Amoa e faapea, e le gata o lenei taamilosaga o le a atili faafiafia ai loto o tagata Samoa e fiafia i le lakapi, ae o se avanoa lelei foi lea mo au uma o le a tausinio i le faaleleia lea ma le siitia i luga o le tulaga o le taaloga lakapi mo a latou au.

O Samoa o lo o umia le siamupini o le taamilosaga lenei talu mai le 2010, ma ua latou sauni e toe puipui lo latou tulaga siamupini o lo o i ai.

O le susuga ia Siliva Patu o lo o fai ma faiaoga fesoasoani i lenei faamoemoe.