O lea ua toe lua aso ona faamanatu lea o le atoaga o le 112 tausaga talu ona sisiina a’e le fu’a a le Iunaite Setete, i totonu o laufanua o Amerika Samoa, e pei sauni atu i ai i le aso  Lua, 17 Aperila ma le aso Lulu, 18 Aperila i le vaiaso fou.

A’o alo atu ai le atunuu i le fa’amanatuina o ia aso taua, o le aso lea ua fa’amoemoe e manino ai fautasi e 6 pito i luga e tausinio i le sailiga o le siamupini i tu’ugava’a, lea ua fa’amoemoe e faia i le aso Lulu o le vaiaso fou, ae o le aso foi lea ua fa’amoemoe e iloa ai le au taitoa 7 o le a sola ma le Ipu o le siamupini, i le ta’amilosaga fa’avaomalo a le TMO Pago Marist 7’s na amata mai ananafi.

Ua le masino ni matematega ma ni tusitusiga e faatatau i fautasi e 6 o le a agai atu mo le tuuga faitaulia i le vaiaso fou, atoa ai ma le au lakapi o le a sola ma le siamupini o lenei tausaga.

Na taua e nisi o le mamalu o le atunuu, o le tuuga fautasi i le taeao nei o le a manino mai ai le ata o le aso Lulu o le vaiaso fou, e ui o lea e le o tausinio le vaa e tasi mai Samoa, le Tolotolo o Tama Uli, peitai na taua e nisi i aoga sa faia i le vaiaso lenei le tulaga ese o le  saoasaoa  ma le malolosi o le au vaa lea mai Samoa, ao faaauau ai pea a latou aoga i afiafi ma taeao.

Ua masani le atunuu i le faaaliina o mafaufauga ma matematega i soo se taimi e sauni ai ni faagatama e pei o tuuga fautasi ma lakapi, i le muamua lea fai matematega ao le’i taunuu le faamoemoe.

O nisi o vaa ua  maitauina le tulaga ese o a  latou tapenaga mo le tuuga i le taeao nei e aofia ai le Satani mai Nuuuli, lea e toatele o loo mate o le a toe sola foi le Satani ma le siamupini o lenei tausaga.

Ae na taua e nisi e faapea, e le’i toilalo lava le Fealofani Samoa mai Fagasa i soo se taimi e tuu ai i lalo o le sami sana vaa fou, e tatau lava ona mua i lana uluai tuuga, ma e i ai le talitonuga  nisi o le atunuu e tupu le tulaga lena i le taeao nei.

Ae a tuu atu foi i le vaa fou mai Vatia, le Fuao lea ua maitauina le saoasaoa ma le malolosi o lana auvaa, ona manatu ai foi lea o nisi o le atunuu, o le a lele le Fuao ma le meaatoa i le taeao nei, peitai fai mai nisi o manatunatuga ma matematega a le atunuu, afai e tutu’u ni manulele se lua, e tatau lava  ona mua le manu lapo’a.

O lona uiga, e tatau ona sola le Aeto, le manu lapo’a ma le mea atoa i le taeao nei, ona sosoo atu ai loa lea ma le Fuao e pei ona talitonu i ai nisi o le au tapua’i.

Ae a tuu atu foi i le tulaga  mataina lea ua i ai tapenaga a tamaitai o le Motu Sa ma lana vaa o le Matasaua, ona manatu lea o nisi, e i ai le talitonuga e sola Manu’a ma le nea atoa i le taeao nei.

Ne’i faagalo alo ma fanau aoga lea ua maitauina le lava tapena o lo latou malosi ae a le faamoemoe mo le taeao nei, ma ua manatu ai foi nisi, afai e lelei le auala e faatino ai e le Samoana Shark le tuuga i le taeao nei, o lona uiga o le a sola foi o ia ma le mea atoa.

Ae aua nei galo le atunuu, faatoa iloa lava le auro i le afi pe afai e taunuu le tuuga i le taeao nei, ma iloa ai loa vaa e 6 o lea agai atu i le sailiga siamupini mo le aso Lulu o le vaiaso fou.

O le po o le aso Lulu na tea nei na amata aloaia ai faafiafiaga i pese ma siva faa Samoa, e pei ona faamanatuina ai e le Vaega a le Arts Council le atoaga ol e 39 tausaga talu ona faia lea polokalame, ma faaiuina ai i le po anapo.

O le afiafi a taeao lea o le a faataunuuina ai le sauniga lotu e tatala aloaia ai polokalame o le sisiga fu’a o lenei tausaga, ona sosoo atu ai loa lea ma le faapaiaina o le Fale Samoa i le aso Gafua o le vaiaso fou.

Ia manuia le faamoemoe o Amerika Samoa i lenei tausaga.