Ads by Google Ads by Google

SASAO FA’AAFI LE GAOI MA LE TALEPE FALE?

TU’UAIA LEAI O NI GALUEGA MAFUAAGA GAOI MA LE TALEPE FALE

O le sasao faaafi o le faama’i o le gaoi ma le talepe fale i le atunu’u i le taimi nei, ua tula’i mai ai se fesili tele, pe aisea ua mafua ai lenei amioga.

Na taua e ni isi o tagata faipisinisi i le Samoa News, o ni isi o mafuaaga e ala ai ona tutupu solitulafono nei i tupulaga, o le toatele lea o tupulaga e le o maua ni galuega e maua ai tupe e faatino ai manaoga o lo o faananau i ai o latou loto.

O ituaiga oloa o lo o gaoia i taimi o osofaiga nei e le gata o ava malosi e pei o fagu uaina, fagu malosi ma fagu pia, ae oo lava foi i pepa sikaleti, meaai ma tupe, atoa ai ma oloa e mafai ona faatau atu ae maua ai tupe e pei o laptops, DVD player ma isi.

O le masina o le lua masina ua tuana’i atu, na atagia mai ai le faila lea e le malo o mataupu tau talepe fale ma le gaoi se 11 i luma o le Faamasinoga, ma le faaupuga o lo o faaauau pea ona faila mai isi mataupu i le taimi nei.

Toeitiiti le misi se masina ma faila e le malo mataupu tau talepe fale ma le gaoi i luma o le faamasinoga.

O le tele o mataupu nei o lo o aafia ai faleoloa ma fale o aiga e iloa e le au gaoi e mafai ona maua i ai tupe poo ni oloa e mafai ona faatau atu ina ia maua ai se vaega tupe mo i latou.

“O le isi mea o lo o maitauina i tupulaga a le matou nuu, e feofeoa’i feofeoa’i lava tupulaga i le po ma inupia, te’i lava ua fai le tonu e osofai se faleoloa ma gaoi, ae fesili atu i ai ae fai mai ua ova le ‘ona, o se alofaga faavalevalea lea alofaga,” o le tala ata lea a le isi matai talavou e sau mai se tasi o afioaga i le itu i Sisifo o le atunuu.

I mataupu tau talepe fale e 5 lea na faila e le malo i le lua vaiaso talu ai e aofia ai ma le vaiaso lenei, o lo o aafia ai ni tupulaga e laiti i lalo o le tulafono, o se auuso, faapea ai i latou e le’i faauu mai i aoga maualuluga.

O le isi vaega o i latou sa o latou talepeina ni faleoloa se lua i le amataga o le tausaga, o le isi vaega sa latou talepeina ni faleolo se tolu atoa ai ma se faleaiga se tasi, ma o ia osofaiga uma e le gata e faatulaga lelei, ae tatau foi ona i ai ni isi e avea ma leoleopo i le taimi e faatino ai le solitulafono, ina ia mautinoa e leai se isi na te iloaina.

Ae o le itu malie e pei ona maua i faamaumauga a le faamasinoga, a uma loa ona faatino le solitulafono, ona o lea o le au gaoi ua faatasitasi i se nofoaga ae vaevae ai oloa sa latou gaoia mai e aofia ai ma tupe, peitai e le umi se taimi e va ai ae oso loa le manatu i se tasi o i latou nei, e sili pe a faailoa i leoleo le mea sa tupu, ina ia taofia ai le toe tulai mai o se isi osofaiga faapea i le lumana’i, ma aafia ai ni isi faleoloa.

Sei vagana ai i latou o lo o faatino lava na o latou a latou osofaiga, faatoa maua lava i latou pe afai ua sili ma le lua faleoloa po o nofoaga ua ia osofaia.

Poo a lava auala e mafai ai ona faailoa solitulafono nei i leoleo, e tasi lava le talitonuga a le au faalogologo, e le gata e leai se mea lilo e le faaalia, ae o le fili fo’i o le kama o le maua.