Ads by Google Ads by Google

Sasa ma taumafai e ta tui i le seleulu se ali’i a’o moe

O le ali’i lea o lo o tu’uaia i lona ulufale fa’amalosi i totonu o se fale o se aiga i Vaitogi, fa’aaoga se komipiuta e sasa ai le ulu o se ali’i a’o moe, toe taumafai e fa’aaoga se seleulu e tui ai lea ali’i, ua molia nei e le malo i moliaga fa’aopoopo e aofia ai le talepe fale i le tulaga muamua, fa’ao’olima i le tulaga lua, fa’apea ai ma isi moliaga mama e lua o le inupia ae le’i atoa lona 21 tausaga, fa’apea ai ma le fa’atupu vevesi i nofoaga faitele.O le vaiaso na te’a nei na loka mai ai e leoleo le ali’i o Taligalu Ah Sui, ona o tu’uaiga i lona ulufale fa’amalosi i se fale o se aiga i Vaitogi, i le po o le aso 19 Novema.I fa’amaumauga a le fa’amasinoga o lo o taua ai, o lenei fa’alavelave na tofu atu i le Ofisa o Leoleo i Tafuna, ina ua vala’au le ali’i na a’afia mo se fesoasoani a leoleo, ona o se tagata ua ulufale fa’amalosi atu i totonu o lona fale, i le 2 i le vaveao, a’o tofa o ia.E tusa ai ma se fa’amatalaga a le na a’afia, na fa’ate’ia o ia a’o moe, ina ua ia va’aia se tagata o tu i tafatafa o lona moega.O le taimi lea na fa’aaoga ai e Ah Sui se (monitor) o le komipiuta a le ali’i na a’afia ma sasa ai ona foliga. Na taumafai le na a’afia e tu i luga e vaai po o ai lenei tagata ua taumafai e osofa’i o ia, peita’i na te’i ina ua ia vaaia Ah Sui o alu atu ma se seleulu ma taumafai e ta tui ai o ia, peita’i na misi ma mafai ai loa e le ali’i na a’afia ona kiki Ah Sui ma pau ai i lalo.Na sulu le ali’i na a’afia i le pito i luma o le latou fale mo se fesoasoani, ma avea ai ma itu na feala mai ai nisi o lona aiga.Na taumafai Ah Sui e sola ese mai le fale peita’i na vave gaioiga a le aiga ma latou pu’eina ai o ia ma taofi, a’o fa’atalita’i le taunu’u ane o leoleo.Na teena e Ah Sui moliaga uma a le malo fa’asaga ia te ia ina ua tula’i i le taeao ananafi. Sa ia fa’ailoa fo’i i le fa’amasinoga lona mana’o ina ia aua ne’i fa’ataunu’uina lana ulua’i iloiloga lea sa fa’amoemoe e faia i le vaiaso fou, ae tu’u sa’o atu loa lana mataupu i luma o le fa’amasinoga e fa’ataunu’u ai sana fa’amasinoga autu.O le taeao nei lea ua fa’amoemoe e tula’i ai Ah Sui i luma o le fa’amasinoga maualuga.E $1,000 le tupe na fa’atulaga e le fa’amasinoga e totogi ona mafai lea ona tatala Ah Sui i tua mai le toese, peita’i ina ua mae’a ona faila e le malo moliaga fa’aopoopo fa’asaga ia te ia ananafi, na suia ai loa e le fa’amasinoga le tupe taofia mo ia i le $25,000.