Ads by Google Ads by Google

SASA FOLIGA O LE GAOI FAGUPIA I LE ATIGI FAGU

O le ali'i lea na ia sasaina foliga o le ali'i na nofo ma gaoi fagupia mai luga o la latou laulau ma ana uo, ua ta’usalaina nei o ia i le moliaga mamafa o le fa'ao'olima i le tulaga tolu, ma ua fa'amoemoe o le aso 11 Fepuari o le a lau ai lona fa'asalaga.

O Lilomaiava Sa’olotoga na ulua'i tu'ua'ia e le malo i le moliaga o le fa'ao'olima i le tulaga muamua ma le fa'atupu vevesi i nofoaga faitele, peita'i i lalo o se maliliega sa ia sainia ma le malo lea fo'i ua talia e le fa'amasinoga maualuga, ua toe suia ai e le malo le mamafa o le moliaga sa faia fa'asaga ia te ia, ae solofua isi moliaga o lo o totoe ai fa'asaga ia te ia.

O lenei fa'alavelave na tula'i mai i le masina o Fepuari 2011, ao eva ai Sa'olotoga ma ni isi o ana uo i totonu o le Rubble Tavern lea ua tapunia nei i Nu'uuli.

E tusa ai ma fa'amaumauga a le fa'amasinoga o lo o ta'ua ai, sa inu le ua molia ma le ali'i na a'afia i totonu o le Rubbles, peita'i ina ua alu i fafo le ua molia e ula lana sikaleti, sa ia fai ai i le ali'i lea ua a'afia e aua le tago fua i pia o lo o i luga o la latou laulau, peita'i na ta'ua e le ali'i leoleo sa su'esu'eina lenei mata'upu, na nana e le ali'i na a'afia se fagupia se tasi mai luga o le laulau i totonu o lona 'ofu.

Ina ua fo'i mai Sa'olotoga, sa fesili i le ali'i na a'afia po o fea le fagu sa i luga o le laulau, fai mai le ripoti a le leoleo lea sa ia su'esu'eina lenei mata'upu, ao taumafai le ali'i na a'afia e toe fa'afo'i le fagu ia Sa'olotoga, na ta e le ua molia o ia i le fagu ma tau ai i ona foliga, ona ia toe tu’iina lea o ia ma tau i lona mata.

Ina ua taunu'u atu i fafo, sa toe ta ai e le ua molia le ali'i na a'afia i le fagu ma toe tau ai fo'i i ona foliga ma toe manu’a ai ma auina atu ai o ia i le falema'i mo togafitiga, lea na mana'omia ai ni filo e su’i ai ona foliga.

Ua malamalama le ali'i ua molia i ona aia fa'aletulafono  e uiga i lenei mata'upu, ua ia iloa fo'i ma mautinoa, tusa lava pe finau loia i le fa'amasinoga mo se fa'asalaga mama mo ia, e pule le fa'amasinoga pe talia pe te'ena ia fa'afinauga, aua o lo o i ai i le fa'amasinoga le malosi e fa'asala ai o ia i so o se ituaiga fa'asalaga e manatu le fa'amasinoga e talafeagai ma fetaui mo le solitulafono sa ia faia.

Ua iloa fo'i ma malamalama le ua molia, e le mafai ona toe suia lana tali ioe ua tu'uina atu i le fa'amasinoga, pe afai e tu'uina mai lona fa'asalaga e le tau ai lona loto.

O le moliaga o le fa'ao'olima i le tulaga lua, e mafai ona fa'asala ai o se tasi i le to'ese mo le umi e le sili atu i le 1 tausaga, pe fa'asala fo'i i le salatupe e le silia ma le $1,000, po o le fa'asala fo'i i fa'asalaga ia e lua.

O lo o tumau pea poloa'iga a le fa'amasinoga o lo o tatala ai le ua molia i tua e fa'atali ai le aso lea ua fa'atulaga e lau ai lona fa'asalaga.